• ເຈົ້າແຂວງໄຊຍະບູລີ ເນັ້ນໃຫ້ປະຊາຊົນ ເອົາໃຈໃສ່ສ້າງເສດຖະກິດຄອບຄົວ

ໂດຍ: ສີເປື້ອນມື 28 ພຶດສະພາ 2020 (10.32 ນ.) Read : 405

ໃນໂອກາດລົງຢ້ຽມຢາມ ແລະ ໂອ້ລົມປະຊາຊົນ 5 ບ້ານຄື: ບ້ານຫ້ວຍເລິກ, ບ້ານ ນາລວມ, ບ້ານປາກທັງ, ບ້ານຫ້ວຍຊໍາອໍ້ ແລະ ບ້ານຫ້ວຍແສນຄໍາ ເມືອງໄຊຍະບູລີ ວັນທີ 27 ພຶດສະພາ 2020 ນີ້, ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ໃຫ້ທິດຊີ້ນຳແກ່ຄະນະບ້ານ ແລະ ປະຊາຊົນແຕ່ລະບ້ານ ຈົ່ງສືບຕໍ່ເອົາໃຈໃສ່ໃນການສ້າງເສດຖະກິດຂອງແຕ່ລະຄອບຄົວ ໃຫ້ມີຢູ່ມີກິນ ໂດຍການຊຸກຍູ້ສົ່ງເສີມປະຊາຊົນປູກພືດອຸດສາຫະກໍາເປັນສິນຄ້າ ຕາມທ່າແຮງຂອງແຕ່ລະຄອບຄົວ ແລະ ພູມສັນຖານຂອງແຕ່ລະທ້ອງຖິ່ນ, ການລ້ຽງສັດໃຫຍ່ກໍຕ້ອງຕິດພັນກັບການປູກຫຍ້າ, ເອົາໃຈໃສ່ສືກສາອົບຮົມລູກຫລານ ແລະ ພໍ່ແມ່ປະຊາຊົນໃຫ້ເຫັນໄດ້ຜົນຮ້າຍຂອງຢາເສບຕິດ.
ໄປພ້ອມໆກັນນີ້, ກໍຕ້ອງເອົາໃຈໃສ່ແກ້ໄຂບັນຫາຢາເສບຕິດຢູ່ແຕ່ລະບ້ານໃຫ້ໄດ້, ແກ້ໄຂບັນຫາສາສະໜາ, ເອົາໃຈໃສ່ປັບປຸງການຈັດຕັ້ງໃຫ້ເຂັ້ມແຂງ ແລະ ໜັກແໜ້ນ, ຊຸກຍູ້ລູກຫລານໃນເກນອາຍຸໃຫ້ໄດ້ເຂົ້າຮຽນ, ປ້ອງກັນບໍ່ໃຫ້ມີການປະລະການຮຽນ, ເອົາໃຈໃສ່ເຝົ້າລະວັງຕໍ່ພະຍາດ ໂຄວິດ-19, ການລະບາດຂອງພະຍາດໄຂ້ຍຸງລາຍດ້ວຍການເຮັດອານາໄມບ້ານ-ເຮືອນ ສໍາຄັນແມ່ນໃຫ້ປະຕິບັດຕາມ 5ປ ຂອງສາທາລະນະສຸກວາງອອກໃຫ້ເປັນປົກກະຕິ ແລະ ປຸກລະດົມປະຊາຊົນໃຫ້ສາມັກຄີກັນສ້າງຄັນຄູກັກກັນນໍ້າຕາມຫ້ວຍຮ່ອງຕ່າງໆຢູ່ແຕ່ລະບ້ານ ເພື່ອກັກຕຸນນໍ້າໃນລະດູຝົນໄວ້ໃຊ້ທໍາການຜະລິດ ແລະ ບໍລິໂພກໃນລະດູແລ້ງ.
ປະຊາຊົນ 5 ບ້ານກດັ່ງກ່າວ ແມ່ນມີອາຊີບທໍາການຜະລິດ ໂດຍສະເພາະແມ່ນປູກພືດອຸດສາຫະກໍາເປັນສິນຄ້າເຊັ່ນ: ສາລີ, ໝາກງາ, ໝາກເດືອຍ, ແລະ ອື່ນໆ, ສໍາລັບລະດູປີນີ້ປະຊາຊົນແມ່ນສືບຕໍ່ປູກ ສາລີ ແລະ ໝາກເດືອຍ ໃນເນື້ອທີ່ 2.260 ກວ່າເຮັກຕາ, ໝາກງາ ເນື້ອທີ່ ເກືອບ 100 ເຮັກຕາ, ມາຮອດປັດຈຸບັນແມ່ນປູກສໍາເລັດແລ້ວ 70-85%, ພ້ອມດຽວກັນຍັງໄດ້ລ້ຽງສັດໃຫຍ່ເຊັ່ນ: ງົວ-ຄວາຍ ມີທັງໝົດ 1.000 ກວ່າໂຕ, ໝູ-ແບ້ 2.390 ກວ່າໂຕ ແລະ ສັດປີກ 5.000 ກວ່າໂຕ.
ຂ່າວ-ພາບ: ອຸ່ນເຮືອນ ໂພທິລັກ

ທີ່ມາ: ປະເທດລາວ Pathedlao
  • ແທັກທີ່ກ່ຽວຂ້ອງ