• ເມືອງ ສາມັກຄີໄຊ ຈະຜະລິດເຂົ້ານາປີໃຫ້ໄດ້ 4.600 ເຮັກຕາ

ໂດຍ: ສີເປື້ອນມື 28 ພຶດສະພາ 2020 (13.47 ນ.) Read : 375

ໃນລະດູຝົນປີ 2020 ນີ້, ເມືອງສາມັກຄີໄຊ ແຂວງອັດຕະປື ຈະຊຸກຍູ້ປະຊາຊົນຊາວກະສິກອນໃນທົ່ວເມືອງ ສຸມໃສ່ຜະລິດເຂົ້ານາປີໃຫ້ໄດ້ 4.600 ເຮັກຕາ, ຄາດສະມັດຕະພາບຜົນຜະລິດ ໃຫ້ໄດ້ 2,8 ໂຕນຕໍ່ເຮັກຕາ ແລະ ວາງຄາດໝາຍຜົນຜະລິດເຂົ້າເປືອກໃນທ້າຍປີໃຫ້ບັນລຸ 12.000 ກວ່າໂຕນ.
ທ່ານນາງ ລັດສະໄໝ ຄໍາພິລາວົງ ຫົວໜ້າຫ້ອງການກະສິກໍາ ແລະ ປ່າໄມ້ ເມືອງສາມັກຄີໄຊ ໃຫ້ສໍາພາດ ເມື່ອບໍ່ດົນນີ້ວ່າ: ເພື່ອບັນລຸຕາມແຜນການທີ່ວາງໄວ້ນັ້ນ, ປັນຈຸບັນ ຫ້ອງການກະສິກໍາ ແລະປ່າໄມ້ ເມືອງສາມັກຄີໄຊ ໄດ້ແຕ່ງຕັ້ງຄະນະຊີ້ນໍາ ແລະ ທີມງານວິຊາການ ລົງເກັບກໍາຂໍ້ມູນຄວາມຕ້ອງການດ້ານປັດໄຈການຜະລິດ ເພື່ອສະເໜີຂັ້ນເທິງພິຈາລະນາສະໜອງປັດໄຈຕ່າງໆ ແລະ ທີມງານວິຊາການທີ່ລົງປະຈໍາແຕ່ລະບ້ານ ຍັງໄດ້ເຮັດໜ້າທີ່ຕິດຕາມໃຫ້ຄໍາແນະນໍາດ້ານເຕັກນິກໃນການຜະລິດ ເພື່ອຮັບປະກັນໃຫ້ຜົນຜະລິດຂອງປະຊາຊົນໄດ້ຮັບຜົນດີ.
ນອກຈາກການປູກເຂົ້ານາປີແລ້ວ, ເມືອງສາມັກຄີໄຊ ຍັງໄດ້ຊຸກຍູ້ສົ່ງເສີມປະຊາຊົນປູກພືດລະດູຝົນທົ່ວໄປ ເພື່ອໄວ້ບໍລິໂພກ ແລະ ປູກເພື່ອຂາຍເປັນສິນຄ້າ, ປັດຈຸບັນ ມີໂຄງການຊ່ວຍເຫລືອລ້າ ເພື່ອຊຸກຍູ້ສົ່ງເສີມປະຊາຊົນໃນ 12 ບ້ານພາຍໃນເມືອງສາມັກຄີໄຊ ປູກພືດໂດຍນໍາໃຊ້ເຮືອຮົ່ມ, ເຊິ່ງໄດ້ສໍາເລັດການມອບອຸປະກອນແລ້ວ 100 ກວ່າຄອບຄົວ ແລະ ຄາດວ່າອີກບໍ່ດົນຈະໄດ້ລົງມືປູກ.
ຂ່າວ: ຂ.ອັດຕະປື ວ.ຫລວງອາໄພ.

ທີ່ມາ: ປະເທດລາວ Pathedlao
  • ແທັກທີ່ກ່ຽວຂ້ອງ