• ນາຊາຍທອງເປີດຂະບວນການຕ້ານພະຍາດໄຂ້ຍຸງລາຍ

ໂດຍ: ສີເປື້ອນມື 06 ກໍລະກົດ 2020 (22.43 ນ.) Read : 287

ໃນຕອນເຊົ້າຂອງວັນທີ 4 ກໍລະກົດ 2020 ຢູ່ທີ່ປົກຄອງເມືອງນາຊາຍທອງນະຄອນຫລວງວຽງຈັນ ເປີດຂະບວນການຕ້ານໄຂ້ຍຸງລາຍແບບຊຸມຊົນເປັນເຈົ້າການ ເຂົ້າຮ່ວມໃນພິທີມີທ່ານ ບຸນຊູ ພະວິເສດ ຮອງເຈົ້າເມືອງນາຊາຍທອງ, ມີພະສົງ, ອົງການຈັດຕັ້ງຕ່າງໆ ອ້ອມຂ້າງເມືອງ ບັນດາແພດໝໍ ອາສາສະໝັກ, ມີຄູອາຈານ ແລະ ນ້ອງນັກຮຽນເຂົ້າຮ່ວມ.
ທ່ານ ດຣ. ຄຳພັນ ຂັນຕິລາດ ຫົວໜ້າຫ້ອງການສາທາລະນະສຸກເມືອງນາຊາຍທອງ ໃຫ້ຮູ້ວ່າ: ນັບແຕ່ເດືອນມັງກອນປີ 2020 ມາຮອດປັດຈຸບັນເມືອງນາຊາຍທອງ ມີຜູ້ເປັນໄຂ້ຍຸງລາຍແລ້ວ 40 ຄົນ ນັ້ນຈຳນວນຜູ້ເປັນໄຂ້ຍຸງລາຍແມ່ນກວມເອົາ 18 ບ້ານ ໃນທົ່ວເມືອງມີ 54 ບ້ານ,ໄລຍະຜ່ານມາ ສາທາລະນະສຸກເມືອງໄດ້ສົມທົບກັບອົງການປົກຄອງບັນດາບ້ານທີ່ມີກໍລະນີໄຂ້ຍຸງລາຍແມ່ນໄດ້ລົງພົ່ນຢາຂ້າຍຸງ ໃນບໍລິເວນເຮືອນຜູ້ທີ່ເປັນໄຂ້ຍຸງລາຍນັ້ນໃນລັດສະໝີ 200 ແມັດ ພ້ອມທັງມີການສ້າງຂະບວນການທຳລາຍແຫລ່ງເພາະພັນຂອງຍຸງທຸກໆວັນເສົາ ແຕ່ວ່າການສ້າງຂະບວນການໃນແຕ່ລະຄັ້ງຍັງເຫັນໄດ້ວ່າຄວາມໜາແໜ້ນຂອງຍຸງແມ່ນຍັງຢູ່ໃນອັດຕາຂ້ອນຂ້າງສູງ. 
ສະນັ້ນ, ຈິ່ງໄດ້ສ້າງຂະບວນການໃຫຍ່ຄັ້ງນີ້, ເພື່ອໃຫ້ສັງຄົມ ເຫັນໄດ້ຄວາມສຳຄັນໃນການປ້ອງກັນພະຍາດໄຂ້ຍຸງລາຍ.
ການສ້າງຂະບວນການຄັ້ງນີ້, ເປັນການກະຕຸນໃຫ້ປະຊາຊົນເປັນເຈົ້າການປ້ອງກັນພະຍາດໄຂ້ຍຸງລາຍ ໂດຍສະເພາະທໍາລາຍແຫລງແຜ່ພັນຂອງຍຸງລາຍຕາມນອກ ແລະ ໃນສະຖານທີ່ຢູ່ອາໃສຂອງທຸກໆຄົວເຮືອນປະຕິບັດເປັນປະຈໍາຈິ່ງຈະສາມາດຮັບມືກັບການລະບາດຂອງພະຍາດໄຂ້ຍຸງລາຍນີ້ໄດ້,ພ້ອມນີ້ຍັງເປັນການປຸກລະດົມໃຫ້ທຸກພາກສ່ວນມີສ່ວນຮ່ວມນັບມື້ນັບຫລາຍຂຶ້ນ, ເຊິ່ງກິດຈະກໍາຄັ້ງນີ້ ພະອາຈານ ເກດ ສີບຸນເຮືອງ ຍັງໄດ້ມອບ ເສື້ອຈຳນວນ 427 ຜືນມູນຄ່າ 7 ລ້ານກວ່າກີບ ທີ່ໄດ້ລະດົມຈາກສັງຄົມ ອອກຕົນຍາດຍົມ ທັງພາຍໃນ ແລະ ຕ່າງປະເທດ ເພື່ອ ໃຫ້ແກ່ ອາສາສະໝັກ ຕ້ານໄຂ້ຍຸງລາຍ ໄດ້ມີກໍາລັງໃຈໃນການສືບຕໍ່ສ້າງຂະບວນການຢູ່ແຕ່ລະບ້ານ ທຸກໆວັນເສົາໃຫ້ເປັນຂະບວນກວ້າງຂວາງ ແລະ ຕໍ່ເນື່ອງ ເພື່ອປ້ອງກັນພະຍາດໄຂ້ຍຸງລາຍທົ່ວເມືອງນາຊາຍທອງ.

ທີ່ມາ: ປະເທດລາວ Pathedlao
  • ແທັກທີ່ກ່ຽວຂ້ອງ