• ປະຊາຊົນ ບ້ານໜອງປີງ ເມືອງປະທຸມພອນ ແຂວງ ຈໍາປາສັກ ໄດ້ມີໄຟຟ້າໃຊ້ແບບຖາວອນແລ້ວ.

ໂດຍ: Admin Mahason 05 ສິງຫາ 2020 (18.26 ນ.) Read : 223

     ໃນລະຫວ່າງວັນທີ 13 ກໍລະກົດ ຫາ 2 ສິງຫາ 2020 ທີ່ຜ່ານມາ ລັດວິສາຫະກິດໄຟຟ້າລາວ ສາຂາ ແຂວງ ຈໍາປາສັກ ສົມທົບ ກັບພະແນກພະລັງງານ ແລະ ບໍ່ແຮ່ແຂວງ, ການນໍາເມືອງ ປະທຸມພອນ ແລະ ປະຊາຊົນບ້ານໜອງປີງ ເພື່ອເອົາໄຟຟ້າໃຫ້ປະຊາຊົນໄດ້ມີໄຟຟ້າໃຊ້ແບບຖາວອນ ແຕ່ຍ້ອນບ້ານດັ່ງກ່າວຢູ່ຫ່າງໄກ ຕ້ອງໄດ້ສ້ອມແປງຂົວໄມ້ຂ້າມນໍ້າ, ເສັ້ນທາງເຂົ້າບ້ານເປ່ເພຫຼາຍຈຸດ ແລະ ເພື່ອເອົາກົນຈັກໜັກເຂົ້າໄປຕິດຕັ້ງ. ໜ້າວຽກແມ່ນ ກໍ່ສ້າງຕາຂ່າຍໄຟຟ້າແຮງກາງ 5,72 ກິໂລແມັດ ລວມມີເສົາ 88 ຕົ້ນ, ໃຊ້ສາຍຈ່ອງ 44 ຈຸດ. ກໍ່ສ້າງຕາຂ່າຍແຮງຕໍ່າ 1,9 ກິໂລແມັດ ລວມມີເສົາເບຕົງ 8 ແມັດ 31 ຕົ້ນ ໃຊ້ສາຍຈ່ອງ 7 ຈຸດ, ຕິດຕັ້ງໝໍ້ແປງ 100 ກິໂລໂວນອໍາແປ ຈໍານວນ 1 ໜ່ວຍ, ຕິດຕັ້ງໄຟເຂົ້າເຮືອນ 70 ຫຼັງ ການຕິດຕັ້ງແມ່ນຈະໃຫ້ສໍາເລັດພາຍໃນ 1 ເດືອນ, ບ້ານ ໜອງປີງ ເປັນບ້ານທີ່ຫ່າງໄກ ທາງເຂົ້າຍາກ ເປັນທາງດິນແດງ ການສັນຈອນສ່ວນໃຫຍ່ໃຊ້ລົດຈັກ ແລະ ລົດຕ໋ອກໆ ເປັນພາຫະນະ, ເປັນບ້ານມີແຫຼ່ງທໍາມະຊາດທີ່ອຸດົມສົມບູນ ເໝາະສົມໃນການປູກຝັງ, ລ້ຽງສັດ. ຖ້າຫາກໂຄງການສໍາເລັດ ກໍ່ຈະສາມາດນໍາໃຊ້ກະແສໄຟຟ້າເຂົ້າໃນການຜະລິດ ແລະ ເປັນບ້ານສຸດທ້າຍທີ່ມີໄຟໃຊ້ 100 % ຂອງ ແຂວງ ຈໍາປາສັກ.


ທີ່ມາ: ພາບແລະຂ່າວຈາກ: ລັດວິສາຫະກິດໄຟຟ້າລາວ ສາຂາແຂວງຈຳປາສັກ
  • ຮູບພາບ

  • ແທັກທີ່ກ່ຽວຂ້ອງ