• ເປີດບໍລິການແລ້ວ “ວັງລາວ ດາວຄໍາ” ອັກຄະລະສະຖານ ສວນອາຫານທີ່ຍິ່ງໃຫຍ່ທີ່ສຸດໃນລາວ

ໂດຍ: ສີເປື້ອນມື 23 ກັນຍາ 2020 (15.52 ນ.) Read : 684

ໃນວັນທີ 18 ກັນຍາ 2020 ທີ່ຜ່ານມາ ທາງກຸ່ມໂຮງແຮມ-ພັດຕະຄານ ດາວຄໍາ ໄດ້ຈັດພິທີເປີດບໍລິການ ວັງລາວ ດາວຄໍາອັກຄະລະສະຖານ ສວນອາຫານທີ່ຍິ່ງໃຫຍ່ທີ່ສຸດໃນນະຄອນຫຼວງວຽງຈັນ ສປປ ລາວ ຢ່າງເປັນທາງການ. ໂດຍການເປັນປະທານຂອງທ່ານ ຂັນທອງ ສີຊະນະດີ ປະທານກຸ່ມໂຮງແຮມ-ພັດຕະຄານ ດາວຄໍາ ແລະໃຫ້ກຽດເຂົ້າຮ່ວມມີ: ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ ຜູ້ຊີ້ນໍາວຽກງານ ວັດທະນະທໍາ-ສັງຄົມ, ທ່ານ ປອ. ໂພຄໍາ ໄຊຍະສອນ ເຈົ້າເມືອງໆ ໄຊເສດຖາ,​ ທ່ານ ນາງ ວິໄລວອນ ຈັນທະລາດີ ຫົວໜ້າພະແນກຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ແລະທ່ານ ບຸນມີ ພົນເສນາ ຜູ້ອໍານວຍການ ກຸ່ມໂຮງແຮມ-ພັດຕະຄານດາວຄໍາ ແລະສວນອາຫານ ວັງລາວ ດາວຄໍາ ພ້ອມດ້ວຍແຂກທີ່ຖືກເຊີນຢ່າງຫຼວງຫຼາຍ.

ທ່ານ ຂັນທອງ ສີຊະນະດີ ປະທານກຸ່ມໂຮງແຮມພັດທະຄານດາວຄຳ ໄດ້ໃຫ້ຮູ້ວ່າ: ສວນອາຫານ ວັງລາວ ດາວຄໍາ ມີເນື້ອທີ່ທັງໝົດ 36 ໄຮ່, ໄດ້ເລີ່ມສ້າງມາແຕ່ປີ 2017 ເປັນຕົ້ນມາ, ປະກອບດ້ວຍວິວທໍາມະຊາດແບບບ້ານນາ ຕັ້ງຢູ່ໃຈກາງຕົວເມືອງ. ຈຸດປະສົງຂອງການການປຸກສ້າງສະຖານທີ່ແຫ່ງນີ້ ກໍເພື່ອເປັນການເຜີຍແຜ່, ສ້າງສັນສິລະປະທາງດ້ານສະຖາປັດຕະຍະກໍາທີ່ຊົງຄຸນຄ່າຢ່າງງົດງາມຂອງຕົ້ນກໍາເນີດເມືອງລາວບູຮານ ທີ່ສື່ຄວາມຄິດ ແລະສັນຍະລັກທາງວັດທະນະທໍາຂອງລາວ ໃຫ້ຄົນລາວໃນຍຸກໃຫມ່ໄດ້ສໍາພັດ ແລະພາກພູມໃຈໃນຄວາມເປັນລາວ ທີ່ມີສິລະປະວັດທະນະທໍາບໍ່ແພ້ຊາດອື່ນໃນໂລກ. ນອນນັ້ນ, ຍັງເປັນສະຖານທີ່ສໍາຄັນ ສໍາລັບນັກທ່ອງທ່ຽວຈະທີ່ເດີນທາງມາໃນນະຄອນຫຼວງວຽງຈັນ ວັງລາວ ດາວຄໍາ ຈະເປັນອີກສະຖານທີ່ໜຶ່ງທີ່ນັກທ່ອງທ່ຽວບໍ່ຄວນພາດ. ສໍາລັບອາຫານແມ່ນລົດຊາດແບບພື້ນບ້ານຂອງລາວ, ເນັ້ນບັນຍາກາດທີ່ປອດໂປ່ງ ອາກາດຮົ່ມເຢັນ ແລະຈັດສັນໃຫ້ມີຄວາມເປັນລະບຽບຮຽບຮ້ອຍສະອາດຈົບງາມ ພ້ອມທັງທຸກໆຄໍ່າຄືນຈະມີການສະແດງສິລະປະ ທີ່ສ່ອງແສງໃຫ້ເຫັນເຖິງວັດທະນະທຳ ແລະຮີດຄອງປະເພນີອັນດີງາມຂອງຊາດລາວເຮົາ ເຊັ່ນ: ການຟ້ອນພື້ນເມືອງລາວ, ຂັບລໍາແຕ່ລະພາກ, ແຕ່ລະຊົນເຜົ່າ, ແຕ່ລະແຂວງແບບພື້ນບ້ານ.

ນອກນັ້ນ, ສວນອາຫານ ວັງລາວ ດາວຄໍາ ຍັງມີຕູບໃຫ້ບໍລິການຫຼາຍກວ່າ 70 ຕູບ, ມີອາຫານລາວ, ອາຫານຕາມສັ່ງ ແລະເຄື່ອງດື່ມໄວ້ໃຫ້ບໍລິການ ລວມທັງມີທີ່ພັກທີ່ສະອາດຈົບງາມ ແລະມີບ່ອນສໍາລັບຖ່າຍຮູບງາມໆ ສະແດງໃຫ້ເຫັນເຖິງທັດສະນີຍະພາບຂອງສວນໃນຫຼາຍໆມູມ ແລະໃນຕໍ່ໜ້າທາງສວນອາຫານ ວັງລາວ ດາວຄໍາ ກໍຈະໄດ້ມີການພັດທະນາໄປເລື້ອຍໆ ເພື່ອດຶງດູດນັກທ່ອງທ່ຽວທັງພາຍໃນ ແລະຕ່າງປະເທດ.

ວັງລາວ ດາວຄໍາອັກຄະລະສະຖານ ສວນອາຫານທີ່ຍິ່ງໃຫຍ່ທີ່ສຸດໃນລາວ ຕັ້ງຢູ່ບ້ານ ເມືອງນ້ອຍ ເມືອງ ໄຊເສດຖາ ນະຄອນຫຼວງວຽງຈັນ. ເບີໂທລະສັບ 021 256 232 ແລະຕິດຕາມການອັບເດດຂໍ້ມູນໄດ້ທີ່ແຟນເພຈເຟສບຸກ: Suan Vanglao Daokham ສວນ ວັງລາວ ດາວຄໍາ.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ