• 6 ສະຖານທີ່ທ່ອງທ່ຽວສໍາລັບນັກພະຈົນໄພ

ໂດຍ: ສີເປື້ອນມື 05 ຕຸລາ 2020 (17.32 ນ.) Read : 190

ສໍາລັບໃຜທີ່ມັກຄວາມພະຈົນໄພ ແລະຄວາມທ້າທ້າຍ ອາດຈະຖືກໃຈກັນຢ່າງແນ່ນອນ ຫຼືໃຜທີ່ຢາກທົດລອງປະສົບການໃໝ່ໆທີ່ບໍ່ເຄີຍເຮັດມາກ່ອນ ກໍສາມາດທີ່ຈະເຮັດໄດ້ເຊັ່ນກັນ ຖືວ່າເປັນປະສົບການຄັ້ງໜຶ່ງໃນຊີວິດ. ພວກເຮົາຈະມາແນະນໍາສະຖານທີ່ທ່ອງທ່ຽວ ທີ່ຫຼາຍຄົນອາດຈະຄຸ້ນຫູ ແລະອາດຈະເຄີຍໄດ້ໄປ ຫຼືບາງຄົນກໍອາດຈະຍັງບໍ່ທັນເຄີຍໄປສໍາຜັດ ເຊິ່ງສະຖານທີ່ທ່ອງທ່ຽວເຫຼົ່ານີ້ ລ້ວນແຕ່ມີຄວາມສວຍສົດງົດງາມດ້ວຍທໍາມະຊາດອ້ອມຮອບ ແລະມີກິດຈະກໍາຕ່າງໆໃຫ້ຫຼິ້ນຢ່າງຫຼວງຫຼາຍ. ເຊື່ອວ່າເມື່ອທ່ານໄດ້ໄປສໍາຜັດກັບສະຖານທີ່ທ່ອງທ່ຽວເຫຼົ່ານີ້ແລ້ວ ບໍ່ຜິດຫວັງຢ່າງແນ່ນອນ ຈະມີສະຖານທີ່ທ່ອງທ່ຽວໃດແນ່ ລອງມາເບິ່ງນໍາກັນ.

1.   ນໍ້າກັດຢໍລະປາ: ຕັ້ງຢູ່ເມືອງ ໄຊ ແຂວງ ອຸດົມໄຊ ເຊິ່ງເປັນສະຖານທີ່ທ່ອງທ່ຽວທາງທໍາມະຊາດອີກແຫ່ງໜຶ່ງ ທີ່ເໝາະສໍາລັບຜູ້ທີ່ມັກຄວາມທ້າທາຍ ແລະມີຫຼາກຫຼາຍກິດຈະກໍາໃຫ້ໄດ້ຮ່ວມຫຼິ້ນຢ່າງມ່ວນຊື່ນ ແລະຕື່ນເຕັ້ນ ພ້ອມທັງມີສະຖານທີ່ພັກໃນຮູບແບບຣີສອດ ເພື່ອອໍານວຍສະດວກໃຫ້ແກ່ນັກທ່ອງທ່ຽວທີ່ຢາກພັກຜ່ອນຢູ່ໃນສະຖານທີ່ແຫ່ງນີ້. ກິດຈະກໍາພາຍໃນ ສະຖານທີ່ທ່ອງທ່ຽວ ນໍ້າກັດຢໍລະປາ ມີ: ຍ່າງປ່າ, ຂີ່ສະລິງ, ໄຕ່ຂົວອູ່, ຂີ່ລົດເອທີວີຊົມນໍ້າຕົກ ແລະອື່ນໆ.

-    ສໍາລັບລາຄາ ແລະລາຍລະອຽດຂອງກິດຈະກໍາຕ່າງໆ ສາມາດສອບຖາມເພີ່ມຕື່ມໄດ້ທີ່ແຟນເພຈເຟສບຸກ: Nam Kat Yotla Pa.

2.   ນໍ້າປຽນຢໍລະປາ: ຖືວ່າເປັນແຫຼ່ງທ່ອງທ່ຽວນ້ອງໃຫມ່ເອົາໃຈສາຍລຸຍ ເພາະສະຖານທີ່ທ່ອງທ່ຽວແຫ່ງນີ້ ຫາກໍເປີດໂຕໄດ້ປະມານ 2-3 ເດືອນ ຜ່ານມາ ເຊິ່ງເປັນສາຂາຂອງນໍ້າກັດຢໍລະປາ ທີ່ຢູ່ແຂວງ ອຸດົມໄຊ. ນໍ້າປຽນຢໍລະປາ ຕັ້ງຢູ່ບ້ານ ຊຽງແລທ່າ ເມືອງ ປາກງື່ມ ນະຄອນຫຼວງວຽງຈັນ ຫຼືເຂດພູເຂົາຄວາຍ. ກິດຈະກໍາ ແລະທໍາມະຊາດກໍມີຄວາມຄ້າຍຄືກັນກັບ ນໍ້າກັດຢໍລະປາ ເຊັ່ນ: ມີສວນນໍ້າ, ຂີ່ສະລິງ, ໄຕ່ຂົວອູ່, ຢືນແປ້ນ, ຊົມນໍ້າຕົກ, ຂີ່ໂລເລີ, ຂີ່ລົດເອທີວີ ແລະຂີ່ລຸກ ເຊິ່ງເປັນບ່ອນທໍາອິດໃນປະເທດລາວ.

-    ຄ່າເຂົ້າຊົມສະຖານທີ່ ເລີ່ມຕົ້ນທີ່ 30,000 ກີບ ແລະສາມາດສອບຖາມຂໍ້ມູນເພີ່ມຕື່ມໄດ້ທີ່ເພຈເຟສບຸກ: Nam Pien Yorla Pa.

3.   ພູຜາມ່ານ (The Rock Viewpoint): ເປັນອີກແຫຼ່ງທ່ອງທ່ຽວໜຶ່ງທີ່ຫຼາຍຄົນໃຫ້ຄວາມສົນໃຈ ບໍ່ວ່າຈະເປັນນັກທ່ອງທ່ຽວທັງພາຍໃນ ແລະຕ່າງປະເທດ ເພາະເປັນແຫຼ່ງທ່ອງທ່ຽວທີ່ມີທິວທັດທໍາມະຊາດທີ່ສວຍສົດງົດງາມໜ້າອັດສະຈັນ ແລະມີກິດຈະກໍາທີ່ທ້າທາຍຫຼາຍຢ່າງ ເຊັ່ນ: ຂີ່ຊິບລາຍ, ໄຕ່ຂົວອູ່,​ການປີນຜາ... ຈຸດເດັ່ນຂອງກິດຈະກໍາແມ່ນ ການໄຕ່ຮັງແມງມຸມ.

-    ສະຖານທີ່ຕັ້ງຢູ່ບ້ານ ຄູນຄໍາ ເມືອງ ຄູນຄໍາ ແຂວງ ຊຽງຂວາງ, ໃຊ້ເວລາໃນການເຮັດກິດຈະກໍາປະມານ 1-2 ຊົ່ວໂມງ ແລະລາຄາຂອງການຫຼິ້ນກິດຈະກໍາ ປະມານ 30-40 ໂດລາ.

4.   ຜາເງິນວັງວຽງ: ຕັ້ງຢູ່ເມືອງ ວັງວຽງ ແຂວງ ວຽງຈັນ. ການເດີນທາງຈາກວັງວຽງ ແມ່ນຕ້ອງໄດ້ຂ້າມຂົວນໍ້າຊອງທາງທີ່ຈະໄປບລູລາກູນ ແລ້ວຂີ່ໄປຕາມທາງ ໃຫ້ສັງເກດເບິ່ງປ້າຍນ້ອຍໆຢູ່ເບື້ອງຂວາມື ທີ່ບອກວ່າ: ຜາເງິນ ເຊິ່ງຈະໄດ້ເສຍຄ່າຜ່ານປະຕູ 10,000 ກີບ/ຄົນ. ຜາເງິນ ເປັນສະຖານທີ່ ທີ່ມີຊື່ສຽງໃນເລື່ອງຂອງການປີນຜາທີ່ໃຊ້ເວລາດົນພໍສົມຄວນ. ສ່ວນແຮງບັນດານໃຈທີ່ເຮັດໃຫ້ຜູ້ຄົນຢາກປີນຂຶ້ນໄປນັ້ນ ກໍຄື ຈຸດຊົມວິວທິວທັດທໍາມະຊາດ ແລະຕົວເມືອງວັງວຽງ ບໍ່ວ່າຈະເປັນຈຸດຕໍ່າສຸດ ມີຄວາມສູງປະມານ 400 ແມັດ ແລະຈຸດສູງສຸດ ມີຄວາມສູງ ປະມານ 800 ແມັດ ເຊິ່ງໃຊ້ເວລາໃນການປີນຂຶ້ນໄປປະມານ 1 ຊົ່ວໂມງ ຍ້ອນເສັ້ນທາງທີ່ໃຊ້ປີນຂຶ້ນໄປນັ້ນ ມີຄວາມຫຍຸ້ງຍາກ ແລະສະດວກປະປົນກັນໄປ.

ເມືອເຮົາປີນຜາໄປເຖິງຈຸດທີ 1 ຈະມີຮ້ານຈໍາໜ່າຍສິນຄ້າຢູ່ເບື້ອງເທິງອີກດ້ວຍ ແລະສໍາລັບຈຸດທີ່ມີຄວາມສູງ 800 ແມັດ ແນະນໍາໃຫ້ເອົານໍ້າຂຶ້ນໄປນໍາ ເພາະມັນຈະບໍ່ມີບ່ອນຂາຍ ແລະຈະມີພຽງຕູບເທົ່ານັ້ນ.

5.   ຜາກະຕ່າຍ ເມືອງ ຍົມມະລາດ: ເປັນສະຖານທີ່ທ່ອງທ່ຽວທີ່ຕັ້ງຢູ່ເທິງຜາສູງ ອ້ອມຮອບໄປດ້ວຍພູຜາປ່າໄມ້ ແລະທໍາມະຊາດທີ່ສວຍສົດງົດງາມ ເຊິ່ງມີຄວາມສູງຈາກລະດັບໜ້ານໍ້າທະເລ 260 ແມັດ ແລະເສັ້ນທາງຍ່າງຂຶ້ນໄປຮອດຈຸດຊົມວິວ 750 ແມັດ ເປັນຈຸດຊົມວິວທີ່ສາມາດແນມເຫັນວິວທໍາມະຊາດ ແລະຕົວເມືອງແບບ 360 ອົງສາ ພ້ອມທັງມີລົມເຢັນພັດສົດຊື່ນ. ສາມາດທ່ອງທ່ຽວໄດ້ທຸກລະດູ ໂດຍສະເພາະຊ່ວງລະດູໜາວ ເດືອນ ຕຸລາ ຫາເດືອນ ກຸມພາ ເພາະທ່ານຈະໄດ້ສໍາຜັດກັບບັນຍາກາດເຢັນສະບາຍ. ຜາກະຕ່າຍ ມີໄລຍະຫ່າງຈາກຕົວເມືອງ ທ່າແຂກປະມານ 58 ກິໂລແມັດ (ເສັ້ນທາງໄປເຂື່ອນນໍ້າເທີນ 2) ໃຊ້ເວລາເດີນທາງປະມານ 1 ຊົ່ວໂມງປາຍ.

6.   ຜາໜາມໄຊ ເມືອງ ວັງວຽງ: ເປັນສະຖານທີ່ໜຶ່ງ ທີ່ໄດ້ຮັບຄວາມນິຍົມຈາກນັກທ່ອງທ່ຽວທັງພາຍໃນ ແລະຕ່າງປະເທດ ຍ້ອນມີວິວທິວທັດທໍາມະຊາດທີ່ສວຍງາມ ແລະບໍ່ຈໍາເປັນຈະຕ້ອງຍ່າງໄກຫຼາຍ ເປັນຜາທີ່ມີຄວາມຄ້າຍຄືກັນກັບຜາເງິນ ຕັ້ງຢູ່ຟາກນໍ້າຊອງ ເບື້ອງຕາເວັນຕົກທີ່ບໍ່ໄກຈາກບລູລາກູນ 1, ມີໄລຍະທາງຂຶ້ນໄປຜາແມ່ນ 350 ແມັດ ເຊິ່ງໃຊ້ເວລາປະມານ 25-30 ນາທີ ແລະທາງຂຶ້ນມີຄວາມສະດວກສະບາຍ. ຈຸດເດັ່ນຂອງຜາແຫ່ງນີ້ ຈະມີລົດຈັກຄັນໜຶ່ງທີ່ປັກທຸງຊາດລາວ ຢູ່ເທິງຈຸດຊົມວິວ. ຄ່າເຂົ້າຊົມສະຖານທີ່ພຽງແຕ່ 10,000 ກີບ/ຄົນເທົ່ານັ້ນ.

ຂໍ້ມູນ: muan.la


ທີ່ມາ: muan.la
  • ຮູບພາບ

  • ແທັກທີ່ກ່ຽວຂ້ອງ