• ສໍາຜັດບັນຍາກາດແບບທໍາມະຊາດ ທີ່ຕາດນໍ້າຊ່ວງ ແຫຼ່ງທ່ອງທ່ຽວທີ່ຫຼາຍຄົນຍັງບໍ່ຮູ້

ໂດຍ: ສີເປື້ອນມື 13 ຕຸລາ 2020 (14.44 ນ.) Read : 1,973

ຕາດຊ່ວງ ຫຼື ຕາດນໍ້າຊ່ວງ ເປັນຕາດແຫ່ງໜຶ່ງທີ່ຕັ້ງຢູ່ໃນເຂດປ່າສະຫງວນແຫ່ງຊາດພູພະນັງ, ສະຖານທີ່ພັກຜ່ອນກິນເຂົ້າປ່າທີ່ງຽບສະຫງົບ, ບັນຍາກາດດີ, ມີທໍາມະຊາດທີ່ສວຍສົດງົດງາມ ແລະທີ່ສຳຄັນແມ່ນຢູ່ບໍ່ໄກຈາກຕົວເມືອງ ນະຄອນຫຼວງວຽງຈັນ!!

      ການເດີນທາງໄປຕາດແຫ່ງດັ່ງກ່າວ ເຊິ່ງເຮົາຈະເລີ່ມເດີນທາງຈາກສາມແຍກສີເກີດ ເຂດເມືອງ ນາຊາຍທອງ ຂຶ້ນໄປຕາມເສັ້ນທາງເລກທີ 13 ເໜືອ ແມ່ນຈະມີໄລຍະທາງ ປະມານ 56KM, ພໍເຮົາຮອດເຂດບ້ານ ນາງ່າ ເມືອງ ນາຊາຍທອງ (40KM ທຳອິດ) ໃຫ້ສັງເກດປ້າຍຮ່ອມເຂົ້າບ້ານ ຖໍ້າ (ປ້າຍຢູ່ຂວາມື ແຕ່ຮ່ອມເຂົ້າຈະຢູ່ເບື້ອງຊ້າຍມື) ຈາກປາກຮ່ອມ ໄປຮອດຕາດແມ່ນມີໄລຍະທາງ ປະມານ 16KM ໂດຍທີ່ທາງຈະເປັນທາງດິນແດງ ຖ້າເປັນລົດເກງນ້ອຍຈະໄປລຳບາກໜ້ອຍໜຶ່ງໂດຍສະເພາະໃນຍາມຝົນນີ້ ແຕ່ຢາກແນະນໍາໃຫ້ເອົາລົດກະບະ ຫຼືລົດສູງໄປຈະສະດວກສະບາຍກວ່າ.

      ສະຖານທີ່ທ່ອງທ່ຽວແຫ່ງນີ້ແມ່ນມີນໍ້າຕົກຕາດໃຫ້ຮັບຊົມ ແລະຖ່າຍຮູບໄດ້ຢ່າງສວຍງາມ,​ບໍລິເວນນໍ້າຕົກຈະບໍ່ສາມາດຫຼິ້ນນໍ້າໄດ້ ແຕ່ຈະສາມາດຫຼິ້ນໄດ້ຢູ່ບໍລິເວນເທິງນໍ້າຕົກ, ຈະບໍ່ມີຮ້ານຂາຍອາຫານ ແລະເຄື່ອງດື່ມ ຫຼືສິ່ງອໍານວຍຄວາມສະດວກຕ່າງໆ (ຂໍແນະນໍາວ່າ ເຮົາຕ້ອງໄດ້ກຽມອຸປະກອນແຕ່ງກິນ ລວມເຖິງອາຫານການກິນໄປແຕ່ເຮືອນ ເພາະໃນສະຖານທີ່ນັ້ນບໍ່ມີໃຫ້) ແຕ່ຖ້າຂີ່ລົດກາຍຂື້ນໄປອີກໜ້ອຍໜຶ່ງເພິ່ນຈະຈັດເປັນຕູບແຄມນໍ້າໃຫ້ ຈະອາລົມຄືກັນກັບຢູ່ຕາດມູນ ແຕ່ຈະມັນງຽບສະຫງົບກວ່າ ເພາະຄົນໄປໜ້ອຍ ແລະມັນເຂົ້າໄປເລິກຫລາຍຄົນເລີຍເຂົ້າມາບໍ່ຮອດ. ຢູ່ບ່ອນນີ້ ເພິ່ນຈະມີບໍລິການຂາຍເຄື່ອງດື່ມ, ອາຫານປະເພດປິ້ງ, ຈືນລູກຊີ້ນ ແລະຕຳປະເພດຕ່າງໆ.

      ອີກຢ່າງໜຶ່ງທີ່ສຳຄັນພໍໆກັບເລື່ອງກິນຢູ່ກໍຄື ໃນເຂດດັ່ງກ່າວບໍ່ມີສັນຍານໂທລະສັບ, ສັນຍານອິນເຕີເນັດ ແລະບໍ່ມີໄຟຟ້າ. ສະນັ້ນ, ສໍາລັບທ່ານໃດຈະອອກໄປທ່ອງທ່ຽວແນະນໍາໃຫ້ກະກຽມເຄື່ອງໃຫ້ພ້ອມ ບໍ່ວ່າຈະເປັນອຸປະກອນແຕ່ງກິນ ເຊັ່ນ: ຖ້ວຍ, ບ່ວງ, ຈານ, ມີດ, ໝໍ້, ເຕົາໄຟ, ຖ່ານດັງໄຟ, ສາດປູນັ່ງ ແລະອື່ນໆທີ່ຈໍາເປັນໃຊ້ ເພື່ອຄວາມສະດວກສະບາຍ ພ້ອມທັງກະກຽມສະບຽງອາຫານໃຫ້ພ້ອມ ແລ້ວຢ່າລືມຮັກສາຄວາມສະອາດຊ່ວຍກັນແນ່ເດີ ທ່ອງທ່ຽວຢ່າງມີຄວາມຮັບຜິດຊອບ ເພື່ອຮັກສາແຫຼ່ງທ່ອງທ່ຽວໃຫ້ຄົງຢູ່ຄູ່ຄົນຮຸ່ນຫຼັງຕະຫຼອດໄປ. ຢ່າລືມໄປທ່ອງທ່ຽວ ເພື່ອສົ່ງເສີມໂຄງການ ລາວທ່ຽວລາວ ນໍາກັນເດີ.

 

- ພິກັບສຳລັບ Google Maps : maps.app.goo.gl/nDtLwx8jmKmZiesb9

- ພິກັດສຳລັບ Maps me : http://ge0.me/00sL6Ra-Fx/Unknown_Place

ຂໍ້ມູນຈາກ: Sommixay Boutchanthalath




ທີ່ມາ: ທ່ອງທ່ຽວເມືອງລາວ muang lao travelling
  • ຮູບພາບ

  • ແທັກທີ່ກ່ຽວຂ້ອງ