• ມິນິດສຕີຣ໌ ອອຟ ຊີວ (MINISTRY OF SILK) ເປີດໂຕຄໍເລັກຊັ່ນໃໝ່

ໂດຍ: ສີເປື້ອນມື 21 ຕຸລາ 2020 (14.42 ນ.) Read : 100

ມິນິດສ໌ຕີຣ໌ ອອຟ ຊີວ (MINISTRY OF SILK) ເປັນແບຣນເສື້ອຜ້າລະດັບສາກົນທໍາອິດຂອງ ລາວ ທີ່ໄດ້ຈົດທະບຽນການຄ້າພາຍໃຕ້ກົດໝາຍປົກປ້ອງຊັບສິນທາງປັນຍາຂອງປະເທດ ອັງກິດ, ໂດຍໄດ້ຈັດງານເປີດຕົວຄໍເລັກຊັນໃໝ່ ທີ່ມີຊື່ວ່າ NEW NORM ທີ່ຮ້ານ ມິນິດສ໌ຕີຣ໌ ອອຟ ຊິ້ວ, ນໍ້າພຸ, ນະຄອນຫຼວງວຽງຈັນ.

ຄໍເລັກຊັ່ນໃໝ່ນີ້ ໄດ້ຮັບການອອກແບບໂດຍ ນັກອອກແບບໜຸ່ມນ້ອຍ ທີ່ມີຄວາມສາມາດໂດຍເດັ່ນ ຈາກໂຄງການ ສົ່ງເສີມນັກອອກແບບຫນຸ່ມນ້ອຍຂອງລາວ.

ນາງ ມະນີວອນ ວັນສະຫວັດ, ອາຍຸ 21 ປີ ມາຈາກ ນະຄອນປາກເຊ, ແຂວງ ຈໍາປາສັກ, ໄດ້ຮັບລາງວັນຮອງອັນດັບທີ 1 ຂອງການແຂ່ງຂັນນັກອອກແບບໜຸ່ມນ້ອຍດີເດັ່ນຂອງລາວ ປີ 2017 ແລະ ໄດ້ຮັບທຶນຈາກ ລາວແຟຊັ່ນວີກ ແລະໂຄງການສົ່ງເສີມນັກອອກແບບໜຸ່ມນ້ອຍຂອງລາວ ໃຫ້ໄປສຶກສາດ້ານການອອກແບບແຟຊັ່ນ ເປັນໄລຍະ 6 ເດືອນ ທີ່ສະຖາບັນ NAFR ສິງກະໂປ ທີ່ມີຊື່ສຽງ, ໂດຍການຮ່ວມມືກັບ ສະຖານທູດສິງກະໂປປະຈໍາລາວ ແລະສະຖາບັນ NAFA.

ພາຍຫຼັງຈາກຈົບການສຶກສາ, ນາງ ມະນີວອນ ໄດ້ຍ້າຍມາອາໄສຢູ່ ນະຄອນຫຼວງວຽງຈັນ ເພື່ອໃຫ້ໄດ້ມີໂອກາດເຄື່ອນໄຫວ ໃນວົງການແຟຊັ່ນໃຫ້ຫຼາຍຂຶ້ນ, ຄວາມສາມາດທີ່ໂດດເດັ່ນຂອງລາວ ເຮັດໃຫ້ລາວໄດ້ຖືກຮັບເລືອກໃຫ້ເປັນ ນັກອອກແບບ ສໍາລັບຄໍເລັກຊັ່ນເສື້ອຜ້າຜູ້ຍິງ ປະຈໍາແບຣນ ມິນິດສຕີຣ໌ ອອຟ ຊິ້ວ.

ທ້າວ ກີ້ ເພຍຄໍາໂງ່ນ ອາຍຸ 22 ປີ ມາຈາກນະຄອນຫລວງວຽງຈັນ, ໄດ້ຮັບລາງວັນເຂົ້າຮອບ 5 ຄົນດີເດັ່ນ ຂອງການແຂ່ງຂັນນັກອອກແບບຫນຸ່ມນ້ອຍດີເດັ່ນຂອງລາວ ໃນປີ 2013 ແລະໄດ້ຮັບທຶນຈາກ ລາວແຟຊັ່ນວີກ ແລະໂຄງການສົ່ງເສີມນັກອອກແບບຫນຸ່ມນ້ອຍຂອງລາວ ໃຫ້ໄປສຶກສາ ແລະເຝິກງານ ດ້ານການອອກແບບແຟຊັ່ນກັບນັກອອກແບບ ທີ່ມີຊື່ສຽງຂອງປະເທດໄທ ທີ່ຫ້ອງເສື້ອ ອິດທິກອນ ທີ່ ກຸງເທບ ປະເທດໄທ ໂດຍການຮ່ວມມືກັບຫ້ອງເສື້ອ ອິດທິກອນ. ໜຶ່ງໃນອັນຍະມະນີ ທີ່ຖືກເຈຍລະໃນ ໂດຍ ລາວແຟຊັ່ນວີກ ແລະໂຄງການສົ່ງເສີມນັກອອກແບບຫນຸ່ມນ້ອຍຂອງລາວ. ຄວາມສາມາດທີ່ໂດດເດັ່ນຂອງລາວ ເຮັດໃຫ້ລາວໄດ້ຖືກຮັບເລືອກໃຫ້ເປັນ ນັກອອກແບບ ສໍາລັບຄໍເລັກຊັ້ນເສື້ອຜ້າຜູ້ຊາຍ ປະຈໍາແບຣນ ມິນິດສຕຣ໌ ອອຟ ຊິ້ວ.

ຄໍເລັກຊັ່ນໃຫມ່ນີ້ ໄດ້ຮັບການອອກແບບໃຫ້ເຂົ້າກັບວິຖີຊີວິດໃຫມ່ຂອງເຮົາ ພາຍຫຼັງໄດ້ຖືກກະທົບຈາກການແຜ່ລະບາດຂອງພະຍາດໂຄວິດ 19 ເຊິ່ງໄດ້ເນັ້ນເຖິງຄວາມຮຽບງ່າຍ, ສວມໃສ່ສະບາຍ ແລະ ລາຄາບໍ່ແພງ ແຕ່ຍັງແຝງດ້ວຍຄວາມເປັນເອກະລັກຂອງແບຣນ ມິນິດສ໌ຕຣີ ອອຟ ຊິ້ວ ເຊິ່ງເນັ້ນເລື່ອງຄວາມໂກ້ຫລູ ແລະສະຫງ່າງາມ.

ການເປີດຕົວຄໍເລັກຊັ່ນໃຫມ່ໃນຄັ້ງນີ້ ແມ່ນເພື່ອຊຸກຍູ້ວົງການແຟຊັ່ນຂອງລາວໃຫ້ຜ່ານຜ່າຄວາມຫຍຸ້ງຍາກສັບສົນຂອງສະພາບໃນປັດຈຸບັນ, ສ້າງວຽກເຮັດງານທໍາ ແລະລາຍຮັບໃຫ້ທຸກພາກສ່ວນທີ່ກ່ຽວຂ້ອງກັບການຜະລິດ ແລະເພື່ອສືບຕໍ່ສົ່ງເສີມ ພັດທະນາວົງການແຟຊັ່ນໃນລາວ.

ມິນິດສ໌ຕີຣ໌ ອອຟ ຊິ້ວ ເປັນຫນຶ່ງໃນແບຣນຜູ້ກໍ່ຕັ້ງ ລາວແຟຊັ່ນວີກ ແລະໂຄງການສົ່ງເສີມນັກອອກແບບຫນຸ່ມນ້ອຍຂອງລາວ ໂດຍມີເປົ້າຫມາຍນໍາພາເອົາວົງການແຟຊັ່ນຂອງລາວ ກ້າວໄປໃນເວທີສາກົນ ແລະໃຫ້ໂອກາດແກ່ໄວຫນຸ່ມລາວ ຜູ້ທີ່ມີຄວາມສາມາດ ໃຫ້ໄດ້ມີວຽກເຮັດງານທໍາໃນອາຊີບທີ່ເຂົາເຈົ້າມັກຮັກ. ພາຍຫລັງທີ່ສໍາເລັດການສຶກສາ ແລະເຝິກອົບຮົມດ້ານ ແຟຊັ່ນ ຈາກທຶນຂອງລາວແຟຊັ່ນວີກ ແລະໂຄງການສົ່ງເສີມນັກອອກແບບຫນຸ່ມນ້ອຍຂອງລາວ.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ