• ບຸນທາດຫລວງປີນີ້ ເນັ້ນໃຫ້ໃສ່ຜ້າອັດປາກປ້ອງກັນໂຄວິດ-19

ໂດຍ: Admin Mahason 22 ຕຸລາ 2020 (14.24 ນ.) Read : 1,990

ຂປລ. ການຈັດງານບຸນນະມັດສະການພະທາດຫລວງວຽງຈັນ, ປະຈໍາປີ 2020 ປີນີ້ແມ່ນໄດ້ຖືເອົາປະເພນີເປັນຕົ້ນຕໍ ສ່ວນການຈັດຕະຫລາດນັດວາງສະແດງສິນຄ້າ ແລະ ການຂາຍເຄື່ອງດື່ມ (ທີ່ມີທາດເຫລົ້າ) ແລະ ງານບັນເທີງຕ່າງໆ ແມ່ນໃຫ້ໂຈະກ່ອນ. ສໍາລັບຮ້ານຂາຍອາຫານ, ເຄື່ອງດື່ມ (ທີ່ບໍ່ມີທາດເຫລົ້າ), ຮ້ານຂາຍດອກໄມ້, ທູບ-ທຽນ ເພື່ອບູຊາ ແມ່ນເຫັນດີໃຫ້ວາງຂາຍ ໂດຍໃຫ້ເວັ້ນໄລຍະຫ່າງ ແລະ ມີຫລາຍຈຸດ, ທ່ານ ນາງ ວິໄລວອນ ຈັນທະລາສີ ຫົວໜ້າພະແນກຖະແຫລງຂ່າວ, ວັດທະນະທຳ ນະຄອນຫລວງວຽງຈັນ ກ່າວໃນພິທີຖະແຫລງຂ່າວ, ເຊິ່ງຈັດຂຶ້ນໃນວັນທີ 21 ຕຸລາ 2020 ທີ່ນະຄອນຫລວງວຽງຈັນ.

     ສໍາລັບວັນ ແລະ ເວລາ ແມ່ນຈະຈັດໃນ ລະຫວ່າງ ວັນທີ 29-31 ຕຸລາ 2020 (ກໍານົດໃຫ້ 3 ວັນ) ໂດຍມີລາຍລະອຽດດັ່ງນີ້: ມື້ຂຶ້ນ 13 ຄໍ່າ ເດືອນ 12 ລາວ ກົງກັບວັນທີ 29 ຕຸລາ 2020 ພິທີຄອບໄຄວ່ ແລະ ແຫ່ຜາສາດເຜິ້ງ, ມື້ຂຶ້ນ 14 ຄໍ່າ ເດືອນ 12 ລາວ ກົງກັບວັນທີ 30 ຕຸລາ 2020 ພິທີແຫ່ລູກຄີ ແລະ ແຂ່ງຂັນປະເພນີຕີຄີ, ມື້ຂຶ້ນ 15 ຄໍ່າ ເດືອນ 12 ລາວ ກົງກັບວັນທີ 31 ຕຸລາ 2020 ພິທີຕັກບາດ ແລະ ວຽນທຽນ. ສ່ວນຮູບແບບການຕັກບາດໃນຕອນເຊົ້າ ແມ່ນຈະມີການຈໍາກັດ ແລະ ຈັດຢູ່ສະເພາະແຕ່ເດີ່ນສະໜາມຫລວງ, ໂດຍກໍາກັບການວາງບາດຄູບາ ໃຫ້ມີໄລຍະຫ່າງທີ່ເໝາະສົມ.
     ໂອກາດນີ້, ທ່ານ ນາງ ວິໄລວອນ ຈັນທະລາສີ ຍັງໄດ້ຮຽກຮ້ອງມາຍັງ ພໍ່ແມ່ປະຊາຊົນ ແລະ ມວນຊົນ ທີ່ຈະເຂົ້າມາທ່ຽວຊົມ ຫລື ມາກາບໄຫວ້ພະທາດຫລວງ ໃຫ້ໃສ່ຜ້າອັດປາກ-ດັງ ແລະ ມີເຈວລ້າງມືພົກຕິດໂຕມານຳ, ສ່ວນຜູ້ທີ່ບໍ່ສະບາຍ ຫລື ມີໄຂ້ ແມ່ນຢາກໃຫ້ຫລີກລ້ຽງ ແລະ ບໍ່ຢາກໃຫ້ມາໃນສະຖານທີ່ແອອັດ ເພື່ອປ້ອງກັນການແຜ່ລະບາດຂອງພະຍາດໂຄວິດ-19 ແລະ ພະຍາດຕິດຕໍ່ ອື່ນໆ. ພ້ອມກັນນີ້, ເພື່ອຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍ, ຄວາມບໍ່ສະອາດງາມຕາ ໃນຂອບເຂດການຈັດງານບຸນປະເພນີນະມັດສະການພະທາດຫລວງ ຈົ່ງພ້ອມກັນຮັກສາ ສິ່ງ ແວດລ້ອມ ບໍ່ໃຫ້ຖິ້ມຂີ້ເຫຍື້ອຊະຊາຍ ຈົ່ງຖິ້ມໃສ່ບ່ອນທີ່ເພິ່ນກຳນົດໄວ້ໃຫ້.
ຂ່າວ: ມະນີທອນ, ພາບ: ເກດສະໜາ


ທີ່ມາ: ປະເທດລາວ
  • ແທັກທີ່ກ່ຽວຂ້ອງ