• ບໍລິສັດ ລາວ ໂມບາຍມັນນີ ຮ່ວມທຸລະກິດ ກັບສອງບໍລິສັດຍັກໃຫຍ່

ໂດຍ: ສີເປື້ອນມື 28 ຕຸລາ 2020 (14.06 ນ.) Read : 2,214

ໃນຕອນເຊົ້າຂອງວັນທີ 28 ຕຸລາ 2020 ຢູ່ທີ່ບໍລິສັດ ລາວ ໂທລະຄົມມະນາຄົມ ມະຫາຊົນ ນະຄອນຫຼວງວຽງຈັນ ໄດ້ມີການຈັດພິທີເຊັນສັນຍາວ່າດ້ວຍການເປັນຄູ່ຮ່ວມທຸລະກິດ ລະຫວ່າງ ບໍລິສັດ ລາວ ໂມບາຍມັນນີ ຈໍາກັດຜູ້ດຽວ ແລະບໍລິສັດ ພີທີທີ (ລາວ) ຈໍາກັດ ແລະບໍລິສັດ ລາວ ເບເວີເຣຊ ຈໍາກັດຜູ້ດຽວ ເພື່ອເຊື່ອມຕໍ່ລະບົບການຊໍາລະຜ່ານບໍລິການຂອງ ເອັມມັນນີ ກະເປົ໋າເງິນເທິງມືຖື. ໃຫ້ກຽດເຂົ້າຮ່ວມໃນງານດັ່ງກ່າວມີ: ທ່ານ ສຸພົນ ຈັນທະວີໄຊ ຜູ້ອໍານວຍການໃຫຍ່ ບໍລິສັດ ລາວ ໂທລະຄົມມະນາຄົມ ມະຫາຊົນ, ທ່ານ ທັນສະໄໝ ຊາມຸນຕີ ຜູ້ອໍານວຍການ ບໍລິສັດ ລາວ ໂມບາຍມັນນີ ຈໍາກັດຜູ້ດຽວ, ທ່ານ ມົນໄຊ ບຸນອິ່ມ ຜູ້ອໍານວຍການ ບໍລິສັດ ພີທີທີ (ລາວ) ຈໍາກັດ ແລະທ່ານ ວີເພັດ ສີຫາຈັກຣ໌ ປະທານບໍລິສັດ ລາວ ເບເວີເຣຊ ຈໍາກັດຜູ້ດຽວ ພ້ອມດ້ວຍຄະນະຜູ້ບໍລິຫານບໍລິສັດ ລາວ ໂທລະຄົມມະນາຄົມ ມະຫາຊົນ, ຄະນະຜູ້ບໍລິຫານ ບໍລິສັດ ລາວ ໂມບາຍມັນນີ ຈໍາກັດຜູ້ດຽວ, ຄະນະຜູ້ບໍລິຫານບໍລິສັດ ພີທີທີ (ລາວ) ຈໍາກັດ ແລະຄະນະຜູ້ບໍລິຫານ ບໍລິສັດ ລາວ ເບເວີເຣຊ ຈໍາກັດຜູ້ດຽວ ເຂົ້າຮ່ວມຢ່າງຫຼວງຫຼາຍ.

ພິທີເຊັນສັນຍາວ່າດ້ວຍການເປັນຄູ່ຮ່ວມທຸລະກິດ ເຊື່ອມຕໍ່ລະບົບການຊໍາລະຜ່ານ M Money ໃນຄັ້ງນີ້ ເປັນການຮ່ວມມືກັນລະຫວ່າງ 3 ບໍລິສັດ ໄດ້ແກ່: ທ່ານ ທັນສະໄໝ ຊາມຸນຕີ ຜູ້ອໍານວຍການ ບໍລິສັດ ລາວ ໂມບາຍມັນນີ ຈໍາກັດຜູ້ດຽວ, ທ່ານ ມົນໄຊ ບຸນອິ່ມ ຜູ້ອໍານວຍການ ບໍລິສັດ ພີທີທີ (ລາວ) ຈໍາກັດ ແລະທ່ານ ວີເພັດ ສີຫາຈັກຣ໌ ປະທານບໍລິສັດ ລາວ ເບເວີເຣຊ ຈໍາກັດຜູ້ດຽວ.

ຈຸດປະສົງຂອງການຈັດພິທີເຊັນສັນຍາໃນຄັ້ງນີ້ ເພື່ອເປັນການເປີດຕົວຄູ່ຮ່ວມທຸລະກິດ ທັງສອງບໍລິສັດ ຄື: ບໍລິສັດ ພີທີທີ (ລາວ) ຈໍາກັດ ແລະບໍລິສັດ ລາວ ເບເວີເຣຊ ຈໍາກັດຜູ້ດຽວ ຢ່າງເປັນທາງການ ໂດຍເຊື່ອມຕໍ່ລະບົບການຊໍາລະຜ່ານກະເປົ໋າເງິນເທິງມືຖື ເອັມ ມັນນີ ເພື່ອແນໃສ່ຕອບສະໜອງຄວາມຮຽກຮ້ອງຕ້ອງການຂອງລູກຄ້າ, ອໍານວຍຄວາມສະດວກໃຫ້ແກ່ລູກຄ້າ ແລະຄູ່ຮ່ວມທຸລະກິດ ໃນການຊໍາລະເງິນຮູບແບບໃໝ່ ຜ່ານກະເປົ໋າເງິນດິຈິຕອນເທິງມືຖື M Money ທີ່ມີຄວາມທັນສະໄໝ, ສະດວກ, ງ່າຍ, ວ່ອງໄວ ແລະປອດໄພ ໄດ້ມາດຕະຖານສາກົນ ພາຍໃຕ້ຄໍາຂັວນ: ໃຫ້ຊີວິດງ່າຍຂຶ້ນ ຕາມຍຸກດິຈິຕອນ.

ການບໍລິການຂອງບໍລິສັດ ພີທີທີ (ລາວ) ຈໍາກັດ ທີ່ຮັບຊໍາລະຜ່ານກະເປົ໋າເງິນເທິງມືຖື ເອັມ ມັນນີ ລວມມີ: ການຕື່ມນໍ້າມັນທີ່ປໍ້ານໍ້າມັນ ພີທີທີ ທຸກປໍ້າທົ່ວປະເທດ, ການປ່ຽນນໍ້າມັນເຄື່ອງ PTT Lubrican, ສູນບໍລິການລົດຍົນ Fit Auto, ສູນບໍລິການລົດຍົນ Pro Check, ຮ້ານ ຄາເຟ່ອາເມຊອນ, ຮ້ານເຂົ້າປຽກປູປາກເຊ ແລະຮ້ານຊານົມໄຂ່ມຸກ ເຟີລີ້ທີ.

ສ່ວນການບໍລິການຂອງບໍລິສັດ ລາວ ເບເວີເຣຊ ຈໍາກັດຜູ້ດຽວ ຮັບຊໍາລະຜ່ານກະເປົ໋າເງິນເທິງມືຖື ເອັມ ມັນນີ ລວມມີ: ຮ້ານອາຫານ MK ສາຂາ 1 ແລະ 2, ຮ້ານ Daiso ສາຂາ 1 ແລະ 2, ຮ້ານ miyazaki, ຮ້ານ Delilao Coffee  ແລະຮ້ານ Hard Rock Café.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ