• ປີ 2020-2021 ແຂວງສາລະວັນ ໄດ້ສຳເລັດການຂຸດຄົ້ນໄມ້ແລວທາງ

ໂດຍ: ສີເປື້ອນມື 01 ກໍລະກົດ 2021 (13.37 ນ.) Read : 7,383

ເພື່ອປະຕິບັດຕາມແຈ້ງການຂອງລັດຖະມົນຕີກະຊວງກະສິກໍາ ແລະ ປ່າໄມ້ ເລກທີ 0070/ກປ, ລົງວັນທີ 3 ກໍລະກົດ 2019 ເລື່ອງ: ການອະນຸມັດໃຫ້ຂຸດຄົ້ນໄມ້ເຂດໂຄງການກໍ່ສ້າງພື້ນຖານໂຄງລ່າງຢູ່ແຂວງສາລະວັນ ປະຈໍາປີ 2019 ແລະຂໍ້ຕົກລົງຂອງເຈົ້າແຂວງ ສະບັບເລກທີ 677/ຈຂ.ສວ, ລົງວັນທີ 1 ພະຈິກ 2019 ວ່າດ້ວຍ: ການແຕ່ງຕັ້ງຄະນະຮັບຜິດຊອບຄຸ້ມຄອງ ແລະຕິດຕາມການຂຸດຄົ້ນໄມ້ແລວທາງແຕ່ບ້ານສຸທິ ຫາບ້ານນາໂພ, ບ້ານນາລັນ ແລະບ້ານກອງລື ເມືອງວາປີ. ຕາມການອະນຸຍາດ 770 ຕົ້ນ, ບໍລິມາດ 1.411 ເມັດກ້ອນ.
ທ່ານ ສີນຸຍ ພົມສຸພາ ຮັກສາການຫົວໜ້າຂະແໜງປ່າໄມ້ ໄດ້ລາຍງານໃຫ້ຮູ້ວ່າ: ພະແນກກະສິກຳ ແລະປ່າໄມ້ແຂວງສາລະວັນ ໄດ້ຈັດຕັ້ງປະຕິບັດການຂຸດຄົ້ນໄມ້ອອກຈາກໂຄງການກໍ່ສ້າງເສັ້ນທາງ ແຕ່ບ້ານສຸທິ ຫາບ້ານນາໂພ, ບ້ານນາລັນ ແລະບ້ານກອງລື ໃນປີ 2020-2021, ໃນນັ້ນ ປະຕິບັດໄດ້ຕົວຈິງທັງໝົດ 749 ຕົ້ນ, ບັ້ນທ່ອນໄດ້ 811ທ່ອນ, ບໍລິມາດໄດ້ 1.584 ເມັດກ້ອນ ທຽບໃສ່ການອະນຸຍາດປະຕິບັດໄດ້ລື່ນແຜນ 100 ກວ່າເມັດກ້ອນ. ໄມ້ທີ່ຂຸດຄົ້ນທັງໝົດແມ່ນໄດ້ສຳເລັດການຈົດທະບຽນຂື້ນເປັນຊັບສິນຂອງລັດ ແລະ ໄດ້ສົ່ງໃຫ້ພະແນກການທີ່ກ່ຽວຂ້ອງ. ທັງນີ້ກໍ່ເພື່ອເປັນການກໍ່ສ້າງເສັ້ນທາງໃຫ້ມີຄວາມສະດວກສະບາຍໃນການໄປ-ມາຫາສູ່ລະຫວ່າງ ບ້ານຫາບ້ານ, ເມືອງຫາເມືອງ ກໍ່ຄື: ເມືອງວາປີ ແຂວງສາລະວັນ ກັບ ເມືອງທ່າປາງທອງ ແຂວງສະຫວັນນະເຂດ. ຈາກນັ້ນໃນພິທີກໍ່ໄດ້ມີການເຊັນບົດບັນທຶກມອບ-ຮັບ ຄວາມຮັບຜິດຊອບໃຫ້ເຂດຄຸ້ມຄອງປ່າສະຫງວນລະຫວ່າງ ທ່ານ ສີນຸຍ ພົມສຸພາ ຮັກສາການຫົວໜ້າຂະແໜງປ່າໄມ້ ກັບ ທ່ານ ຫີນແກ້ວ ປະສານສັກ ຫົວໜ້າໜ່ວຍງານປ່າສະຫງວນເຊບັ້ງນວນ ເມືອງວາປີ, ໂດຍຊ້ອງໜ້າທ່ານ ພູທົງ ຄໍາມະນີວົງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.
ພິທີສະຫຼຸບການຂຸດຄົ້ນໄມ້ເຂດກໍ່ສ້າງພື້ນຖານໂຄງລ່າງແຕ່ບ້ານສຸທິ ຫາບ້ານນາໂພ, ບ້ານນາລັນ ແລະບ້ານກອງລື ເມືອງວາປີ, ໄດ້ຈັດຂື້ນໃນວັນທີ 29 ມີຖຸນາ 2021 ຜ່ານມາທີ່ບ້ານນາໂພ ເມືອງວາປີ ແຂວງສາລະວັນ, ໂດຍການເປັນປະທານຂອງ ທ່ານ ພູທົງ ຄໍາມະນີວົງ ຮອງເຈົ້າແຂວງ ຜູ້ຊີ້ນໍາວຽກງານຂົງເຂດເສດຖະກິດ, ທ່ານ ບູນຍູ້ ຈັນທະລັງສີ ເຈົ້າເມືອງເມືອງວາປີ, ທ່ານ ອະນຸສັກ ຈໍາປາຄໍາ ຫົວໜ້າພະແນກກະສິກໍາ ແລະ ປ່າໄມ້ ແຂວງສາລະວັນ, ມີຫົວໜ້າບໍລິສັດຮັບເໝົາການປະມູນ, ຂະແໜງການທີ່ກ່ຽວຂ້ອງ ພ້ອມດ້ວຍນາຍບ້ານທັງ 4 ບ້ານ ແລະ ປະຊາຊົນເຂົ້າຮ່ວມ.

ທີ່ມາ: Media Laos
  • ຮູບພາບ

  • ແທັກທີ່ກ່ຽວຂ້ອງ