• ເມືອງຕຸ້ມລານ ປ່ອຍປາຄືນສູ່ທຳມະຊາດ ຈຳນວນ 8 ພັນກ່ວາໂຕ

ໂດຍ: ສີເປື້ອນມື 13 ກໍລະກົດ 2021 (17.21 ນ.) Read : 6,006

ວັນທີ 13 ກໍລະກົດ 2021 ເມືອງຕຸ້ມລ້ານ ແຂວງສາລະວັນ ໄດ້ຈັດພິທີປ່ອຍປາ ຄືນສູ່ທຳມະຊາດ ຈຳນວນ 8,050 ໂຕ ເນື່ອງໃນໂອກາດສະເຫຼີມສະຫຼອງອະນຸລັກສັດນ້ຳ ແລະ ສັດປ່າ ແຫ່ງຊາດ ວັນທີ 13 ກໍລະກົດ 2021, ເຊິ່ງຈັດຂຶ້ນຢູ່ທີວັງສະຫງວນ ບ້ານແກ້ງຮັງ, ເມືອງຕຸ້ມລານ, ໃຫ້ກຽດເຂົ້າຮ່ວມຂອງທ່ານ ວັນເພັງ ອິນທະສອນ ຄະນະປະຈໍາພັກເມືອງ ຮອງເຈົ້າເມືອງຕຸ້ມລານ ຜູ້ຊີ້ນຳວຽກງານເສດຖະກິດ, ທ່ານ ນ. ຄຳພຽນ ພັນທະບູລີ ຮອງຫົວໜ້າພະແນກກະສີກຳ ແລະປ່າໄມ້ແຂວງສາລະວັນ, ມີທ່ານ ວຽງໄຊ ວົງຄຳຈັນ ຫົວໜ້າຫ້ອງການກະສີກຳ ແລະ ປ່າໄມ້ເມືອງ, ມີບັນດາຫ້ອງການອ້ອມຂ້າງເມືອງ, ພະນັກງານ-ລັດຖະກອນ ຕະຫຼອດຮອດພໍ່ແມ່ປະຊາຊົນບ້ານໃກ້ຄຽງເຂົ້າຮ່ວມຢ່າງເປັນຂະບວນຟົດຟຶ້ນ. ລູກປາທີ່ນຳມາປ່ອຍໃນຄັ້ງນີ້ ມີລູກປາ 5 ຊະນິດຄື: ປານິນ, ປານວນຈັນ, ປາປາກ, ປາຈີນ ແລະ ປາດຸກ ໄດ້ປ່ອຍລົງວັງສະວັງສະຫງວນທຳມະຊາດ ນຳ້ເຊ ບ້ານແກ້ງຮັງ.
ໃນຕອນທ້າຍຂອງພິທີຜູ້ເຂົ້າຮ່ວມຍັງໄດ້ຮັບຟັງການມີຄຳເຫັນໂອ້ລົມຂອງ ທ່ານ ວັນເພັງ ອິນທະສອນ ຄະນະປະຈຳພັກເມືອງ ຮອງເຈົ້າເມືອງຕຸ້ມລານ ຜູ້ຊີ້ນຳວຽກງານເສດຖະກິດ, ເຊິ່ງທ່ານໄດ້ເນັ້ນໜັກໃຫ້ອຳນາດການປົກຄອງ, ພໍ່ແມ່ປະຊາຊົນບ້ານໃກ້ຄຽງ ເອົາໃຈໃສ່ໃນການປົກປັກຮັກສາ, ຄຸ້ມຄອງ, ຕິດຕາມ, ກວດກາ ເພື່ອບໍ່ໃຫ້ມີການລັກລອບຕຶກແຫ, ໃສ່ເບັດ, ໃສ່ມອງ ແລະອຶ່ນໆ ໃນວັງສະຫງວນດັ່ງກ່າວ ເພື່ອເຮັດໃຫ້ປາມີການຂະຫຍາຍພັນຫຼາຍຂຶ້ນ.
---------------------------
ໂດຍ: ວຽງສະຫວັນ ແສນຄໍາ

ທີ່ມາ: Media Laos
  • ແທັກທີ່ກ່ຽວຂ້ອງ