• ສໍາເລັດ ກອງປະຊຸມ ຄົບຄະນະບໍລິຫານງານພັກແຂວງ ໄຊຍະບູລີ ຄັ້ງທີ 3 ສະໄໝທີ VII

ໂດຍ: ສີເປື້ອນມື 19 ສິງຫາ 2021 (12.51 ນ.) Read : 1,985

ແຫລ່ງຂ່າວຈາກແຂວງໄຊຍະບູລີ ໃຫ້ຮູ້ວ່າ: ກອງປະຊຸມ ຄົບຄະນະບໍລິຫານງານພັກແຂວງ ໄຊຍະບູລີ ຄັ້ງທີ 3 ສະໄໝທີ VII ໄດ້ສຳເລັດລົງໃນວັນທີ 18 ສິງຫາ 2021 ພາຍຫລັງດຳເນີນມາເປັນເວລາ 2 ວັນ ໂດຍການເປັນປະທານ ຂອງ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າ ແຂວງໄຊຍະບູລີ, ມີກໍາມະການປະຈໍາພັກແຂວງ, ກໍາມະການພັກແຂວງ, ຫົວໜ້າພະແນກ ການ, ກົມກອງອ້ອມຂ້າງແຂວງ, ມີເລຂາພັກເມືອງ, ເຈົ້າເມືອງ 11 ເມືອງ ເຂົ້າຮ່ວມ.
ຕະຫລອດການດໍາເນີນກອງປະຊຸມ ຜູ້ແທນໄດ້ຍົກສູງຄວາມຮັບຜິດຊອບການເມືອງ, ຄົ້ນຄວ້າປະກອບຄໍາຄິດ-ຄໍາເຫັນໃນແຕ່ລະບັນຫາ ຢ່າງກົງໄປກົງມາຄົບຖ້ວນຈະແຈ້ງ ແລະເລິກເຊິ່ງ, ພ້ອມທັງມີການປຶກສາຫາລືແລກປ່ຽນຄໍາຄິດ-ຄໍາເຫັນ ເພື່ອຫັນເຂົ້າສູ່ການຈັດຕັ້ງປະຕິບັດຢ່າງເປັນຮູບປະທໍາ ແລະ ມີປະສິດທິຜົນ, ຜ່ານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ VII ຂອງອົງຄະນະພັກແຂວງພາຍໃຕ້ການນໍາພາຂອງພັກຂັ້ນຕ່າງໆ ຢູ່ພາຍໃນແຂວງ ເຮັດໃຫ້ບັນດາຄາດໝາຍວາງໄວ້ໄດ້ຮັບການຈັດຕັ້ງປະຕິບັດ ແລະ ມີຜົນສໍາເລັດທີ່ເປັນພື້ນຖານຈໍານວນໜຶ່ງເຊັ່ນ: ສາມາດຮັກສາສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ມີຄວາມເປັນລະບຽບຮຽບຮ້ອຍໂດຍພື້ນຖານ, ເສດຖະກິດຍັງສືບຕໍ່ຂະຫຍາຍຕົວ, ບັນຍາກາດການຜະລິດລະດູແລ້ງ ແລະ ຜະລິດລະດູປີ ຂອງປະຊາຊົນຍັງສືບຕໍ່ເປັນຂະບວນການດີ.
ບັນດາຄາດໝາຍສູ້ຊົນລະອຽດຂອງຂະແໜງການ, ຂອງບັນດາເມືອງ ໄດ້ຮັບການຈັດຕັ້ງປະຕິບັດ ແລະ ບັນລຸໄປແລ້ວຈໍານວນໜຶ່ງ, ບັນດາໂຄງການລົງທຶນຂອງລັດ ລວມທັງໂຄງການຂອງຂະແໜງການສູນກາງ ແລະ ໂຄງການລົງທຶນຂອງພາກເອກະຊົນທັງພາຍໃນ ແລະ ຕ່າງປະເທດ ໄດ້ດໍາເນີນໄປຕາມຂັ້ນຕອນຂອງກົດໝາຍ ມີຄວາມຄືບໜ້າ ແລະ ມີປະສິດທິຜົນເປັນສ່ວນຫລາຍ, ພື້ນຖານໂຄງລ່າງຢູ່ຊົນນະບົດໄດ້ຮັບການພັດທະນາ ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງປົວແປງຍົກລະດັບດີຂຶ້ນ, ການແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ, ການແກ້ໄຂບັນຫາຢາເສບຕິດ ກໍໄດ້ຮັບການແກ້ໄຂຢ່າງແຂງແຮງເລິກເຊິ່ງ.
ຂ່າວ-ພາບ: ອຸ່ນເຮືອນ ໂພທິລັກ

ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ