• ກອງທັບປົດປ່ອຍປະຊາຊົນ ຈີນ ມອບວັກຊິນປ້ອງກັນໂຄວິດ-19 ໃຫ້ກອງທັບ ປະຊາຊົນລາວ

ໂດຍ: ສີເປື້ອນມື 24 ສິງຫາ 2021 (14.19 ນ.) Read : 1,998

ໃນວັນທີ 23 ສິງຫາ 2021 ນີ້, ກອງທັບປົດປ່ອຍປະຊາຊົນຈີນ ໄດ້ນຳເອົາວັກຊິນປ້ອງກັນພະຍາດໂຄວິດ-19 (ຊີໂນຟາມ) ຈຳນວນ 4 ແສນໂດສ ແລະ ເຂັມສັກຢາ ມາມອບໃຫ້ກອງ ທັບປະຊາຊົນລາວ, ຕາງໜ້າມອບໂດຍ ທ່ານ ພັນເອກພິເສດ ຫລີປິ່ງ ທີ່ປຶກສາທູດປ້ອງກັນຊາດ ສປ ຈີນ ປະຈໍາ ສປປ ລາວ ແລະ ຮັບໂດຍ ທ່ານ ພົຕ ວົງຄຳ ພົມມະກອນ ຮອງລັດຖະມົນຕີ ກະຊວງປ້ອງກັນປະເທດ, ໂດຍມີພາກສ່ວນກ່ຽວຂ້ອງ ທັງສອງຝ່າຍ ເຂົ້າຮ່ວມເປັນສັກຂີພິຍານ.
ໂອກາດດັ່ງກ່າວ, ທ່ານ ພົຕ ວົງຄຳ ພົມມະກອນ ໄດ້ຕີລາຄາສູງຕໍ່ການຊ່ວຍເຫລືອອັນລ້ຳຄ່າ ແລະ ທັນການ ຕໍ່ລັດຖະບານຈີນ ບໍ່ວ່າຈະເປັນອຸປະກອນການແພດ, ໜ້າກາກອານະໄມ, ນ້ຳຢາກວດ ກາເຊື້ອພະຍາດ ໂດຍສະເພາະ ໃນໄລຍະຜ່ານມາ ກອງທັບປົດປ່ອຍປະຊາຊົນຈີນ ກໍ່ໄດ້ໃຫ້ການຊ່ວຍ ເຫລືອມອບວັກຊິນໃຫ້ແກ່ກອງທັບປະຊາຊົນລາວ ຈຳນວນ 300.000 ໂດສ ລວມທັງສົ່ງຊ່ຽວຊານກອງທັັບປົດປ່ອຍປະຊາຊົນຈີນ ມາປະຈຳຢູ່ ສປປ ລາວ ເພື່ອມາຊີ້ນຳການປ້ອງກັນ, ຕ້ານ ແລະ ສະກັດກັ້ນພະຍາດໂຄວິດ-19 ໃຫ້ແພດໝໍຝ່າຍລາວ ໃນໄລຍະຜ່ານມາ.
ກອງທັບປົດປ່ອຍປະຊາຊົນຈີນ ຈັດສົ່ງວັກຊິນ ໃຫ້ແກ່ກອງທັບປະຊາຊົນລາວ ໃນຄັ້ງນີ້, ເປັນຊຸດທີສອງ ຈຳນວນ 400.000 ໂດສ, ລວມທັງຊຸດຜ່ານມາ 300.000 ໂດສ ລວມເປັນ 700.000 ໂດສ. ມາຮອດປັດຈຸບັນ ກຳລັງກອງທັບ ໄດ້ຮັບການຊັກຢາວັກຊິນ ຊີໂນຟາມ ຄົບ 2 ເຂັມ 86.678 ຄົນ ແລະ 1 ເຂັມ 106.762 ຄົນ. ນອກນັ້ນ, ຍັງໄດ້ຊັກໃຫ້ປະຊາຊົນ, ພະນັກງານລັດ, ນັກທຸລະກິດ ແລະ ຊາວຄ້າຂາຍຄົນຈີນ ຢູ່ລາວຕື່ມອີກ.
ທ່ານ ພົຕ ວົງຄຳ ພົມມະກອນ ຢືນຢັນວ່າ: ຈະນໍາເອົາວັກຊິນຈຳນວນດັ່ງກ່າວ, ໄປນຳໃຊ້ໃຫ້ເກີດປະໂຫຍດສູງສຸດ ໃນການຕ້ານ ແລະ ສະກັດກັ້ນການແຜ່ລະບາດຂອງພະຍາດດັ່ງກ່າວ, ໂດຍສະ ເພາະນຳໃຊ້ຢູ່ໃນກອງທັບຂອງພວກເຮົາ ເລັ່ງໃສ່ເປົ້າໝາຍຜູ້ທີ່ເຮັດໜ້າທີ່ກັບກຸ່ມສ່ຽງ, ກຳລັງແພດ-ໝໍ, ກຳລັງທະຫານຊາຍແດນ, ບັນດາຄູ-ອາຈານ ຢູ່ວິທະຍາຄານຂອງກອງທັບ ແລະ ພະນັກງານທະຫານໃຫ້ທົ່ວເຖິງ.
ຂ່າວ: ທະນູທອງ ພາບ: ເກດສະໜາ

ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ