• ປະກາດຜົນແລ້ວ ລາງວັນຜະລິດຕະພັນ ໄອຊີທີ ລະດັບປະເທດ

ໂດຍ: ແມວດຳ 10 ກໍລະກົດ 2018 (10.07 ນ.) Read : 639

ໃນຕອນເຊົ້າຂອງວັນທີ 7 ກໍລະກົດທີ່ຜ່່ານມານີ້, ກະຊວງ ໄປສະນີ ໂທລະຄົມມະນາຄົມ ແລະການສື່ສານ (ກະຊວງ ປທສ) ໄດ້ຈັດການແຂ່ງຂັນ ໄອຊີທີລາວ 2018 ຫຼືLao ICT Award 2018 ຂຶ້ນທີ່ຫໍວັດທະນະທຳແຫ່ງຊາດ. ໂດຍການເປັນກຽດເຂົ້າຮ່ວມຂອງທ່ານ ປອ ທະວີສັກ ມະໂນທັມ ຫົວໜ້າກົມເຕັກໂນໂລຊີການສື່ສານຂໍ້ມູນຂ່າວສານ ກະຊວງ ປທສ, ພ້ອມດ້ວຍແຂກທີ່ຖືກເຊີນຈາກບັນດາກະຊວງ, ອົງການທຽບເທົ່າ, ບໍລິສັດທາງດ້ານໄອຊີທີ, ຫົວໜ່ວຍທຸລະກິດ ແລະສະຖາບັນການສຶກສາຕ່າງໆຫຼາຍກວ່າ 500 ທ່ານ.

ການແຂ່ງຂັນ Lao ICT Award 2018 ໃນຄັ້ງນີ້ຖືເປັນຄັ້ງທີ່ສອງ ເຊິ່ງຈຸດປະສົງກໍເພື່ອເປັນການສົ່ງເສີມໃຫ້ນັກຮຽນ, ນັກສຶກສາ, ນັກຄົ້ນຄວ້າຈາກຂະແໜງການພາກລັດ, ເອກະຊົນກໍຄືບັນດາບໍລິສັດ ແລະທຸກຄົນໃນສັງຄົມລາວໄດ້ສະແດງຄວາມສາມາດ, ໃຫ້ສັງຄົມໄດ້ເຫັນສັກກະຍະພາບໃນການພັດທະນາເຕັກໂນໂລຊີ, ຜະລິດຕະພັນ, ການບໍລິການ ແລະນະວັດຕະກຳດ້ານ ICT, ພ້ອມທັງເປັນການສ້າງຊື່ສຽງຜະລິດຕະພັນດ້ານ ໄອຊີທີ ຂອງຄົນລາວໃຫ້ສາມາດອອກສູ່ສາກົນໄດ້ ແລະເປັນການສົ່ງເສີມໃຫ້ຄົນລາວໃຊ້ບໍລິການດ້ານໄອຊີທີຂອງຄົນລາວເອງ.

ການແຂ່ງຂັນໄອຊີທີລາວ 2018 ໄດ້ເລີ່ມມາຕັ້ງແຕ່ກາງເດືອນ ມີນາ 2018 ເຊິ່ງມີຜະລິດຕະພັນໄອຊີທີທີ່ສົ່ງເຂົ້າປະກວດທັງໝົດ 18 ຜະລິດຕະພັນ ແລະຄັດເລືອກເຂົ້າມາໃນຮອບສຸດທ້າຍມີ 9 ຜະລິດຕະພັນປະກອບມີ LOCA, CV Connect, Typr, Mobile Business customer care application, Program Sabai Plus, BCEL Oneheart, Job JibJib, My Delivery, Ai Hak-Artificial Intelligence Customer Service. ໃນການແຂ່ງຂັນຮອບສຸດທ້າຍທັງ 9 ທີມໄດ້ນຳສະເໜີ ແລະຕອບຄຳຖາມຈາກຄະນະກຳມະການເພື່ອເປັນການຄັດເລືອກເອົາຜົນງານທີ່ດີທີ່ສຸດ. ເຊິ່ງຜະລິດຕະພັນທີ່ໄດ້ຮັບລາງວັນຊະນະເລີດແມ່ນ BCEL Oneheart ຈາກທະນາຄານການຄ້າຕ່າງປະເທດລາວ ໄດ້ຮັບເງິນລາງວັນມູນຄ່າ 8 ລ້ານກີບ, ລາງວັນຮອງອັນດັບໜຶ່ງແມ່ນ Job JibJib ຈາກກຸ່ມບໍລິສັດ 108-1009 ໄດ້ຮັບເງິນລາງວັນມູນຄ່າ 5 ລ້ານກີບ, ລາງວັນຮອງອັນດັບ 2 ແມ່ນ Typr ຈາກທ່ານ ສຸກສະຫວັນ ສີພັນຫຼະວົງ ໄດ້ຮັບເງິນລາງວັນມູນຄ່າ 3 ລ້ານກີບ ແລະລາງວັນຊົມເຊີຍແມ່ນ LOCA ຈາກທ່ານ ສຸລິໂຍ ວົງດາລາ ໄດ້ຮັບເງິນລາງວັນ 1 ລ້ານກີບ.

ພິເສດໄປກວ່ານັ້ນສຳລັບຜະລິດຕະພັນທີ່ໂດດເດັ່ນແມ່ນຈະຖືກສົ່ງເຂົ້າປະກວດໃນໂຄງການ Asean ICT Award 2018 ທີ່ຈະຈັດຂຶ້ນຢູ່ເກາະບາຫຼີ ປະເທດອິນໂດເນເຊຍໃນທ້າຍປີ 2018.



ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ