• ເຄັດລັບການແຕ່ງໜ້າແບບໝັ້ນໃຈ ໃນລະດູຝົນ

ໂດຍ: Admin Mahason 06 ສິງຫາ 2020 (10.09 ນ.) Read : 264

     ເຄັດລັບການແຕ່ງໜ້າແບບໝັ້ນໃຈ ໃນລະດູຝົນ ໃນຊ່ວງຍາມລະດູຝົນ ໄປໃສມາໃສກໍຄົງຈະລໍາບາກກັນແນ່ ໂດຍສະເພາະແມ່ນສາວໆທັງຫຼາຍ ທີ່ຂັບຂີ່ລົດຈັກ ຖ້າຫາກບໍ່ຖືຄັນຮົ່ມຕິດຕົວໄປນໍານີ້ ປຽກປານໝານ້ອຍຕົກນໍ້າພຸ້ນລະ! ແລະສິ່ງທີ່ເຮັດໃຫ້ເຮົາສູນເສຍຄວາມໝັ້ນໃຈກໍຄືຈະແມ່ນເຄື່ອງສໍາອາງເທິງໃບໜ້າໄຫຼຍ້ອຍລົງມາ ເຊິ່ງຖ້າຫາກມັນຖືກນໍ້າກໍຄົງຈະໄຫຼອອກມາໝົດຢ່າງແນ່ນອນ. ໃນສະບັບນີ້ ພວກເຮົາຈະນໍາເອົາເຄັດລັບໃນການແຕ່ງໜ້າຊ່ວງລະດູຝົນມາຝາກ ລອງມາອ່ານເບິ່ງພ້ອມກັນເລີຍ. 
1. ທາຮອງພື້ນທີ່ສາມາດຄວບຄຸມຄວາມມັນ ແລະກັນນໍ້າໄດ້. 
     ກ່ອນທີ່ຈະແຕ່ງໜ້າທຸກຄັ້ງຈະຕ້ອງໄດ້ທາຄຼີມຮອງພື້ນລົງກ່ອນ ເຊິ່ງຮອງພື້ນທີ່ຈະທານັ້ນ ຄວນເລືອກແບບທີ່ສາມາດກັນນໍ້າໄດ້ ແລະຖ້າຈະໃຫ້ດີ ໃຫ້ເລືອກແບບທີ່ມັນສາມາດຄວບຄຸມຄວາມມັນໄດ້ນໍາກໍຈະເປັນການດີ ເພາະໃນຊ່ວງຍາມຝົນ ນອກຈາກເຮົາຈະປຽກຝົນແລ້ວ ກໍຍັງພົບກັບສະພາບອາກາດທີ່ຮ້ອນອົບເອົ້າ ເຊິ່ງມັນອາດຈະເຮັດໃຫ້ເຄື່ອງສໍາອາງເຮົາຍ້ອຍອອກໄດ້ງ່າຍ. ດັ່ງນັ້ນ, ຄວນເລືອກຄຼີມຮອງພື້ນທີ່ສາມາດຄວບຄຸມຄວາມມັນ ແລະກັນນໍ້າໄດ້ໄວ້ກ່ອນ ເພື່ອໃຫ້ເຄື່ອງສໍາອາງຢູ່ເທິງໃບໜ້າໄດ້ດົນຂຶ້ນ. 
2. ເຄື່ອງສໍາອາງທຸກຢ່າງຕ້ອງເປັນເນື້ອຄຼີມ. 
     ໃນການລົງເຄື່ອງສໍາອາງຕ່າງໆ ບໍ່ວ່າຈະເປັນອາຍຊາໂດ້, ບັດ, ເຊັດດິ້ງ ຫຼືໄຮໄລ້ ໃນຊ່ວງຍາມຝົນ ແນະນໍາໃຫ້ໃຊ້ເຄື່ອງສໍາອາງເນື້ອຄຼີມ ຫຼືເນື້ອນໍ້າ ເພື່ອໃຫ້ເຄື່ອງສໍາອາງຕິດເທິງຜິວໄດ້ຫຼາຍທີ່ສຸດ ແຕ່ເຮົາໃຊ້ແບບຝຸ່ນມັນອາດຈະຫຼຸດອອກງ່າຍ ໂດຍສະເພາະເວລາຖືກນໍ້າ ຫຼືເຫື່ອອອກມັນກໍຈະໄຫຼຍ້ອຍອອກ ເຮັດໃຫ້ໃບໜ້າເຮົາເປື້ອນໄດ້. ດັ່ງນັ້ນ, ກ່ອນຈະແຕ່ງໜ້າຄວນເລືອກເຄື່ອງສໍາອາງແບບເນື້ອຄຼີມ ຫຼືແບບເນື້ອນໍ້າຈະດີທີ່ສຸດ. 
3. ແຕ້ມຄິ້ວດ້ວຍແທັດທູ ຫຼືເມຈິກ. 
     ຄິ້ວ ເປັນມົງກຸດຂອງໃບໜ້າຂອງສາວໆຫຼາຍຄົນ ຖ້າບໍ່ມີຄິ້ວຈະເຮັດໃຫ້ຮູ້ສຶກບໍ່ໝັ້ນໃຈ. ດັ່ງນັ້ນ, ໃນຊ່ວງລະດູຝົນແບບນີ້ ບໍ່ວ່າຝົນຈະຕົກແຮງເທົ່າໃດ ຄິ້ວຂອງເຮົາຕ້ອງຍັງຢູ່. ແນະນໍາໃຫ້ໃຊ້ສໍແຕ້ມຄິ້ວແບບແທັດທູທີ່ແຕ້ມແລ້ວມັນສາມາດຕິດຢູ່ໄດ້ໝົດມື້ ຫຼືເປັນແບບເມຈິກທີ່ແຕ້ມລົງໄປແລ້ວຈະເຮັດໃຫ້ສີຕິດ ແລະກົມກືນໄປກັບສີຜິວຂອງເຮົາ. ສ່ວນຫຼາຍສໍແຕ້ມຄິ້ວພວກນີ້ ຈະສາມາດກັນນໍ້າໄດ້ ເຖິງແມ່ນວ່າໜ້າເຮົາຈະຖືກຝົນກໍຕາມ ແຕ່ຄິ້ວກໍຍັງຢູ່ຄືເກົ່າ. 
4. ອາຍໄລເນີ ແລະມາດສ໌ຄາລ່າຕ້ອງກັນນໍ້າ. 
     ສິ່ງນີ້ເປັນສິ່ງສໍາຄັນ ແລະເປັນບັນຫາທີ່ຫຼາຍຄົນມັກພົບ ເມື່ອໜ້າຖືກນໍ້າ ຫຼືປຽກຝົນ ເຮົາຈະກາຍເປັນໝີແພນດ້າທີທີ ເນື່ອງຈາກອາຍໄລເນີ ແລະມາດສ໌ຄາລ່າ ທີ່ເຮົາແຕ້ມລົງໄປນັ້ນຍ້ອຍອອກ. ດັ່ງນັ້ນ, ເຮົາຄວນໄປຊອກຊື້ອາຍໄລເນີ ແລະມາດສ໌ຄາລ່າ ທີ່ສາມາດກັນນໍ້າໄດ້ມາໃຊ້. ສ່ວນຫຼາຍແມ່ນຈໍາພວກນີ້ລະ ທີ່ເຮັດໃຫ້ໜ້າເຮົາເພ ເມື່ອຖືກນໍ້າ. ດັ່ງນັ້ນ, ຖ້າບໍ່ມີແບບກັນນໍ້າ ແນະນໍາບໍ່ໃຫ້ໃຊ້ຈະດີກວ່າ. 
5. ລິບສະຕິກທີ່ສາມາດກັນນໍ້າໄດ້. 
     ຫຼາຍຄົນອາດຈະມັກໃຊ້ລິບສະຕິກແບບເປັນແທ່ງ ເພາະສີມັນຂ້ອນຂ້າງຊັດເຈນ ແລະຕິດດົນນານ ແຕ່ສ່ວນໃຫຍ່ມັນກໍເຮັດໃຫ້ປາກເຮົາເປື້ອນງ່າຍໄດ້. ສໍາລັບໃຜທີ່ຢາກໃຫ້ຮິມສົບຂອງຕົນເອງງາມຕະຫຼອດເວລາ ຖືກແມ່ນວ່າຈະຖືກນໍ້າຖືກປຽກຝົນ ແນະນໍາໃຫ້ໃຊ້ລິບທີນທີ່ຕິດກົມກືນໄປກັບສີປາກເລີຍຈະດີກວ່າ ຫຼືຈະເປັນລິບຈຸ້ມຈິ໋ມແມັດທີ່ທາງແລ້ວແຫ້ງທັນທີກໍໄດ້ເຊັ່ນກັນ.



ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ