• ອາຫານຮອບເດິກ ທີ່ກິນເທົ່າໃດກໍບໍ່ຕຸ້ຍ

ໂດຍ: Admin Mahason 09 ຕຸລາ 2020 (11.15 ນ.) Read : 177

ຫຼາຍຄົນກໍອາດຈະເປັນຄືກັນ ໂດຍສະເພາະແມ່ນຄົນທີ່ມັກກິນເຂົ້າແຕ່ຕອນແລງກ່ອນ 6 ຫຼື 7ໂມງແລງ ເມື່ອຮອດຕອນເດິກ ກໍມັກຈະຫິວເຂົ້າ ແລະຍາກຫຼາຍທີ່ເຮົາຈະຫັກຫ້າມຄວາມຫິວນັ້ນໄດ້ ຈຶ່ງເຮັດໃຫ້ເຮົາຕ້ອງໄດ້ກິນເຂົ້າ ແລະສຸດທ້າຍກໍຕ້ອງມານັ່ງຄິດເສຍໃຈພາຍຫຼັງ ເພາະການທີ່ເຮົາກິນເຂົາຮອບເດິກເປັນປະຈໍານັ້ນ ມັນເຮັດໃຫ້ນໍ້າໜັກຂອງເຮົາ ເພີ່ມຂຶ້ນເລື້ອຍໆຈົນເຮັດໃຫ້ເຮົາຮູ້ສຶກກັງວົນໃຈ. ໃນສະບັບນີ້ ເຮົາມີເມນູແນະນໍາໃນຮອບເດິກມາຝາກ ອາຫານປະເພດນີ້ ຈະມີແຄລໍລີ່ໜ້ອຍ, ໄຂມັນໜ້ອຍ ແລະກິນຫຼາຍຊໍ່າໃດກໍບໍ່ມີທາງຕຸ້ຍຂຶ້ນ. 
1. ໂຢເກິດ: ສິ່ງທີ່ຕ້ອງມີຕິດຕູ້ເຢັນໄວ້ ສໍາລັບຄົນທີ່ມັກຫິວຕອນເດິກ ກໍຄົງຈະແມ່ນ “ໂຢເກິດ” ເນື່ອງຈາກໂຢເກິດເປັນແຫຼ່ງສໍາຄັນຂອງແຄລຊ້ຽມ ທີ່ຊ່ວຍເສີມສ້າງກະດູກ ແລະແຂ້ວໃຫ້ແຮງແຮງ. ນອກນັ້ນ, ຍັງເປັນສ່ວນສໍາຄັນໃນການສ້າງສານເມລາໂທນິນ (Melatonin) ເຊິ່ງຊ່ວຍໃນການນອນຫຼັບໄດ້ອີກດ້ວຍ ພ້ອມທັງຊ່ວຍໃນເລື່ອງຂອງລະບົບຂັບຖ່າຍ, ຊ່ວຍປ້ອງກັນອາການເຈັບທ້ອງ ແລະທີ່ສໍາຄັນຫຼາຍກວ່ານັ້ນແມ່ນ ເປັນອາຫານທີ່ເຮັດໃຫ້ເຮົາຮູ້ສຶກອິ່ມ ແຕ່ມີໄຂມັນໜ້ອຍ ແລະແຄລໍລີ່ໜ້ອຍ. ແຕ່ເຮົາຄວນເລືອກກິນໂຢເກິດລົດຊາດທໍາມະດາ ຫຼືໂຢເກິດໄຂມັນໜ້ອຍ ທີ່ບໍ່ປະສົມໝາກໄມ້ເຊື່ອມ. 
2. ປັອບຄອນ: ເຖິງແມ່ນວ່າປັອບຄອນຈະເປັນເຂົ້າໜົມທີ່ມີແຄລໍລີ່ຫຼາຍ ແຕ່ໃນຄວາມຈິງແລ້ວແຄລໍລີ່ໃນປັອບຄອນນັ້ນມີໜ້ອຍ. ປັອບຄອນປະມານ 3 ຖົງນ້ອຍ ຈະໃຫ້ແຄລໍລີ່ບໍ່ເຖິງ 100 ກຼາມ ແລະມີໃຍອາຫານ ຫຼາຍກວ່າ 4 ກຼາມ ເຮັດໃຫ້ເຮົາຮູ້ສຶກອິ່ມທ້ອງໂດຍທີ່ບໍ່ເຮັດໃຫ້ນໍ້າໜັກເຮົາເພີ່ມຂຶ້ນ. ເຖິງຢ່າງໃດກໍຕາມ, ເຮົາຄວນເລືອກກິນປັອບຄອນທີ່ບໍ່ໃສ່ເນີຍ, ຄາຣາເມວ ຫຼືເກືອ ແຕ່ອາດຈະລອງໄປເຮັດໃຫ້ມັນສຸກດ້ວຍການອົບໃນເຕົາໄມໂຄເວັບ ແລະປະສົມກັບເຄື່ອງປຸງ ແລະສະໜຸນໄພແຫ້ງ ເພື່ອຊ່ວຍເພີ່ມລົດຊາດ. 
3. ເມນູໄຂ່: ອາຫານເມນູໄຂ່ ບໍ່ວ່າຈະເປັນໄຂ່ຕົ້ມ, ໄຂ່ລວກ, ໄຂ່ຕຸ໋ນ, ໄຂ່ດາວ ຫຼືໄຂ່ທອດ ກໍລ້ວນແຕ່ເປັນເມນູທີ່ສາມາດເຮັດໄດ້ຢ່າງງ່າຍດາຍ, ປະຢັດເວລາ, ອິ່ມທ້ອງ, ມີຄຸນຄ່າທາງໂພຊະນາການ ແລະມີແຄລໍລີ່ໜ້ອຍ. ໄຂ່ໜຶ່ງໜ່ວຍ ຈະມີແຄລໍລີ່ພຽງ 72 ແຄລໍລີ່ເທົ່ານັ້ນ ແຕ່ຈະໃຫ້ໂປຼຕີນທີ່ເຮັດໃຫ້ເຮົາຮູ້ສຶກອິ່ມເຖິງ 6 ເທົ່າ. ຖ້າເປັນໄປໄດ້ ຄວນເລືອກກິນໄຂ່ຕົ້ມ,ໄຂ່ລວກ ຫຼືໄຂ່ຕຸ໋ນ ທີ່ບໍ່ໃຊ້ນໍ້າມັນພືດໃນການປະກອບອາຫານ ແຕ່ຖ້າຫາກຈະທອດໄຂ່ ແນະນໍາໃຫ້ໃຊ້ນໍ້າມັນໜ້ອຍໆ ຫຼືອາດຈະເຮັດເປັນໄຂ່ດາວແທນ. 
4. ໝາກໄມ້: ຖ້າຫາກຮູ້ສຶກຢາກກິນຂອງຫວານຕອນເດິກ ແທນທີ່ຈະກິນເຂົ້າໜົມຫວານ ໃຫ້ລອງປ່ຽນມາເປັນໝາກໄມ້ແທນ ເພາະໝາກໄມ້ຈະມີສານເມລາໂທນິນທີ່ຊ່ວຍໃນການນອນຫຼັບ, ມີລົດຊາດຫວານຈາກທໍາມະຊາດ ແລະມີໃຍອາຫານເປັນຈໍານວນຫຼາຍ ຊ່ວຍໃຫ້ເຮົາອິ່ມທ້ອງ ແລະປ້ອງກັນບໍ່ໃຫ້ລະດັບນໍ້າຕານໃນເລືອດສູງຂຶ້ນ. ນອກຈາກນັ້ນ, ໝາກໄມ້ຫຼາຍຊະນິດ ຍັງມີວິຕາມິນ, ແຮ່ທາດ ແລະສານຕ້ານອະນຸມູນອິດສະຫຼະ ທີ່ຊ່ວຍຕ້ານການອັກເສບ ແລະຊະລໍຄວາມເຖົ້າແກ່. 
5. ຜັກສົດ ແລະນໍ້າແຈ່ວ: ຖ້າຫາກເຮົາຮູ້ສຶກຢາກກິນຫຍັງແບບກອບໆ ກໍລອງເລືອກກິນຜັກສົດ ບໍ່ວ່າຈະເປັນຫົວກະລົດ, ໝາກແຕງ, ໝາກເລັ່ນ, ຜັກຊະນາລີ່ ຫຼືຜັກສະຫຼັດ ອາດຈະກິນກັບນໍ້າແຈ່ວຕ່າງໆຕາມທີ່ເຮົາມັກ. ຜັກສົດນອກຈາກຈະມີໃຍອາຫານຫຼາຍແລ້ວ ຍັງມີຄຸນຄ່າທາງສານອາຫານ, ກິນແລ້ວຮູ້ສຶກສົດຊື່ນ, ບໍ່ໜັກທ້ອງ, ແຄລໍລີ່ໜ້ອຍ ແລະຊ່ວຍໃນເລື່ອງລະບົບການຂັບຖ່າຍ ພ້ອມທັງຊ່ວຍໃນການຄວບຄຸມນໍ້າໜັກອີກດ້ວຍ. 
     ສ່ວນອາຫານຮອບເດິກທີ່ເຮົາບໍ່ຄວນກິນ ຫຼືຄວນຫຼີກລ່ຽງນັ້ນ ມີຄື: ຈໍາພວກຂອງທອດ ໂດຍສະເພາະມັນຝຣັ່ງ ເພາະມັນເປັນການຈັບຄູ່ກັນລະຫວ່າງໄຂມັນ ແລະເກືອ ເຊິ່ງເປັນຕົວການທີ່ຈະເຮັດໃຫ້ນໍ້າໜັກເຮົາເພີ່ມຂຶ້ນ, ຊ໋ອກໂກແລັດ ຖ້າເປັນຊ໋ອກແກັດແທ້ທີ່ບໍ່ປະສົມນໍ້າຕານກໍອາດຈະບໍ່ມີບັນຫາ ແຕ່ຖ້າສ່ວນຫຼາຍຊ໋ອກໂກແລັດທົ່ວໄປມັກປະສົມນໍ້າຕານຂ້ອນຂ້າງຫຼາຍ ເພື່ອເພີ່ມລົດຊາດຄວາມຫວານ ເຊິ່ງອາດຈະເພີ່ມລະດັບນໍ້າຕານໃນເລືອດ ແລະເຮັດໃຫ້ນໍ້າໜັກຕົວເພີ່ມຂຶ້ນ, ກະແລັມ ຈະປະກອບດ້ວຍນົມ, ໄຂ່ ແລະນໍ້າຕານໃນປະລິມານຫຼາຍ. ກະແລັມສ່ວນຫຼາຍຈະມີປະລິມານຂອງແຄລໍລີ່ປະມານ 200 ແຄລໍລີ່/ກະແລັມ 100 ກຼາມ ແຕ່ຖ້າຫາກເປັນກະແລັມທີ່ມີການເສີມລົດຊາດຕ່າງໆເຂົ້າໄປ ຍິ່ງຈະມີປະລິມານຂອງແຄລໍລີ່ເພີ່ມຂຶ້ນອີກ. 



ທີ່ມາ: Sanook.com
  • ແທັກທີ່ກ່ຽວຂ້ອງ