• ເຄັດລັບປຸກພະລັງ ໃນວັນໄປເຮັດວຽກ

ໂດຍ: Admin Mahason 15 ຕຸລາ 2020 (10.03 ນ.) Read : 139

     ເມື່ອໄດ້ພັກວຽກໄປເປັນເວລາ 2 ວັນ ມາຮອດຕອນເຊົ້າວັນຈັນ ກໍອາດຈະລຸກຈາກບ່ອນນອນຂ້ອນຂ້າງຍາກ ເພາະໃນໃຈແລ້ວກໍຢາກນອນພັກຜ່ອນຕໍ່ ແຕ່ກໍຈໍາເປັນຈະຕ້ອງໄດ້ຝືນລຸກຂຶ້ນມາ ເພື່ອໄປເຮັດວຽກຫາເງິນລ້ຽງປາກລ້ຽງທ້ອງ. ໃນສະບັບນີ້ ພວກເຮົາຈະນໍາເອົາເຄັດລັບດີໆ ທີ່ຈະເຮັດໃຫ້ເຮົາຕື່ນນອນລຸກໄປວຽກໄດ້ຢ່າງສົດຊື່ນ. 
1. ບໍ່ກົດເລື່ອນໂມງປຸກ. 
     ເຊື່ອວ່າຫຼາຍຄົນຄົງຈະເຄີຍເຮັດຈົນກາຍເປັນນິໄສ ຮູ້ບໍ່ວ່າມັນບໍ່ຄ່ອຍດີປານໃດ. ເນື່ອງຈາກຮ່າງກາຍຂອງຄົນເຮົາບໍ່ສາມາດເປີດ-ປິດ ການນອນຫຼັບໄດ້ຢ່າງກະທັນຫັນ. ດັ່ງນັ້ນ, ຖ້າຫາກເຮົາເລື່ອນເວລາໄປນອນອີກ 10-15 ນາທີ ເຮົາຈະຮູ້ສຶກວ່າພັກຜ່ອນບໍ່ພຽງພໍ ເພາະເຮົາໄດ້ຕື່ນຂຶ້ນມາກ່ອນໜ້ານີ້ແລ້ວ. ຈຶ່ງເຮັດໃຫ້ສະໝອງສັບສົນ ແລະສົ່ງຜົນເຮັດເຮົາອ່ອນເພຍໝົດມື້, ບໍ່ສົດຊື່ນ ແລະບໍ່ມີພະລັງ. 
2. ອອກກໍາລັງກາຍເປັນປະຈໍາ. 
     ເນື່ອງຈາກຮ່າງກາຍບໍ່ມີຄວາມພ້ອມ ຈຶ່ງເຮັດໃຫ້ເຮົາຮູ້ສຶກຂີ້ຄ້ານທີ່ຈະເຮັດກິດຈະກໍາຕ່າງໆ, ສຸຂະພາບບໍ່ຄ່ອຍດີ, ອ່ອນເພຍ, ເມື່ອຍ... ການອອກກໍາລັງກາຍເປັນປະຈໍາ ຈະຊ່ວຍກະຕຸ້ນໃຫ້ຮ່າງກາຍມີພະລັງງານຢູ່ຕະຫຼອດເວລາ, ຮູ້ສຶກສົດຊື່ນ, ຮ່າງກາຍມີຄວາມທົນທານ... ນອກຈາກນີ້, ເຮົາຈະຕ້ອງໄດ້ນອນພັກຜ່ອນໃຫ້ພຽງພໍອີກດ້ວຍ. 
3. ຢ່າເອົາວຽກມາເຮັດໃນວັນພັກຜ່ອນ. 
     ວັນພັກຜ່ອນກໍຕ້ອງໄດ້ພັກ ເພາະຮ່າງກາຍ ແລະຈິດໃຈຂອງເຮົາບໍ່ແມ່ນເຄື່ອງຈັກ ຈະເຮັດໃຫ້ວຽກຢູ່ຕະຫຼອດກໍຄົງຈະບໍ່ໄຫວ. ເມື່ອເຮັດວຽກຕິດຕໍ່ກັນມາຫຼາຍມື້ແລ້ວ ກໍຕ້ອງໄດ້ພັກຜ່ອນໃຫ້ມີແຮງກັບໄປເຮັດວຽກອີກຄັ້ງ. ເມື່ອເຮົາໄດ້ພັກຜ່ອນຢ່າງເຕັມທີ່ແລ້ວ ເຮົາຈະມີແຮງກັບມາເຮັດວຽກຕໍ່ໃນຕອນເຊົ້າຂອງວັນຈັນ. ຖ້າເຮົາພັກຜ່ອນບໍ່ພຽງພໍ ກໍຈະເຮັດໃຫ້ເຮົາຮູ້ສຶກເມື່ອຍ, ບໍ່ສົດຊື່ນ, ອ່ອນເພຍ ແລະຮູ້ສຶກຢາກນອນໝົດມື້. 
4. ຈັດຕາຕະລາງຂອງແຕ່ລະວັນ. 
     ການໃຊ້ຊີວິດຕາມໃຈອາດຈະເຮັດໃຫ້ທຸກຢ່າງຂ້ອນຂ້າງສັບສົນ ແລະຮູ້ສຶກວ່າຕົນເອງບໍ່ມີລະບຽບ ເມື່ອເຮັດວຽກບໍ່ໄດ້ດັ່ງໃຈກໍມັກຫງຸດງິດ ແລະໃຈຮ້າຍ. ດັ່ງນັ້ນ, ການວາງແຜນຂອງການໃຊ້ຊີວິດປະຈໍາວັນ ຈະເຮັດໃຫ້ເຮົາເປັນຄົນມີລະບຽບ ແລະຮູ້ວ່າໃນມື້ໜຶ່ງເຮົາຈະຕ້ອງໄດ້ເຮັດຫຍັງແດ່ ເມື່ອເຮົາເຮັດສໍາເລັດຕາມທີ່ເຮົາໄດ້ວາງແຜນໄວ້ ເຮົາກໍຈະຮູ້ສຶກສະບາຍໃຈ. 
5. ເລື່ອງອາຫານການກິນ. 
     ອາຫານເປັນແຫຼ່ງພະລັງງານ ຖ້າຮ່າງກາຍບໍ່ໄດ້ຮັບພະລັງງານຢ່າງພຽງພໍ ກໍຈະເຮັດໃຫ້ເຮົາຮູ້ສຶກອ່ອນເພຍ, ເມື່ອຍງ່າຍ ແລະຖ້າຫາກຂາດນໍ້າ ກໍຈະເຮັດໃຫ້ຮ່າງກາຍລໍາລຽງສານອາຫານ ແລະອົກຊີແຊນ ໄປລ້ຽງຮ່າງກາຍໄດ້ຊັກຊ້າ. ການເລືອກກິນອາຫານທີ່ມີປະໂຫຍດ ເຊັ່ນ: ອາຫານຈໍາພວກໂປຼຕີນ, ໄຂມັນດີ... ຈະເຮັດໃຫ້ຮ່າງກາຍອິ່ມດົນ. ນອກນັ້ນ, ອາດຈະດື່ມເຄື່ອງດື່ມທີ່ຈະຊ່ວຍປຸກພະລັງໃນຕົວເຮົາ ເຊັ່ນ: ນໍ້າໝາກກ້ຽງ, ນໍ້າໝາກນາວ, ນົມສົ້ມ ແລະອື່ນໆ ເພື່ອໃຫ້ຮ່າງກາຍສົດຊື່ນ.



ທີ່ມາ: Sanook.com
  • ແທັກທີ່ກ່ຽວຂ້ອງ