• ຫັນມາສ້າງມູນຄ່າໃຫ້ກັບພູມປັນຍາຈາກສີມືຄົນລາວ

ໂດຍ: Admin Mahason 21 ກັນຍາ 2017 (00.00 ນ.) Read : 553

“ລາວເຮັດ ລາວໄດ້ ເມື່ອສາມາດສົ່ງອອກຕ່າງປະເທດໄດ້ ຈະເຮັດໃຫ້ລາວເຮົາຈະເລີນ” ເປັນໜຶ່ງປະໂຫຍກເດັດທີ່ຍ້ຳເຕືອນໃຈ ເພື່ອທີ່ຈະສືບສານພູມປັນຍາພື້ນບ້ານສູ່ສາຍຕາສາກົນຂອງ ນາງ ຂັນທອງ ຄຳວິໄລທອງ ເຈົ້າຂອງຜະລິດຕະພັນແກະສະລັກໄມ້ ແລະ ຈັກສານ ຈາກບໍລິສັດວຽງທອງ ເທຣດດີ້ງ ທີ່ໄດ້ເປັນການສ້າງມູນຄ່າ ແລະ ວຽກເຮັດງານທຳໃຫ້ກັບຊ່າງສີມືຜູ້ຮັກຫອມໃນອາຊີບຫັດ ຖະກຳ. 

ນາງ ຂັນທອງ ເລົ່າວ່າ ຄວາມຈິງຕົນເອງກໍມີກິດຈະການຢາພື້ນເມືອງທີ່ຮູ້ຈັກກັນດີໃນນາມ ຢາພື້ນເມືອງກາກະທິງທອງ ເປັນອາຊີບຫຼັກຢູ່ແລ້ວ ແຕ່ອາດຈະດ້ວຍຄວາມຮັກມັກ ແລະ ຮູ້ສຶກຫວງແຫນພູມປັນຍາພື້ນບ້ານທີ່ນັບມື້ເລີ່ມຈະຈືດຈາງຫ່າງຫາຍໄປ ຈຶ່ງໄດ້ຫັນມາຈັບເອົາອາຊີບນີ້ເປັນອີກກິດ ຈະການໜຶ່ງ. ເຊິ່ງຫາກຈະກ່າວຍ້ອນຫຼັງໄປຈຸດເລີ່ມຕົ້ນ ແມ່ນນັບແຕ່ປີ 2000 ເປັນຕົ້ນມາ, ໃນຊ່ວງເວລານັ້ນຕົນເອງແມ່ນປະກອບອາຊີບເກັບຊື້ຢາພື້ນເມືອງສະມຸນໄພເພື່ອນຳມາປຸງແຕ່ງ ໄປພ້ອມກັບການເກັບຊື້ເຄື່ອງປ່າຂອງດົງ ແລະ ປະເພດໄມ້ຕູດເພື່ອສົ່ງອອກ ເຊິ່ງໃນໄລຍະນັ້ນກໍແມ່ນດຳເນີນທຸລະກິດພຽງແຕ່ຊື້ມາຂາຍໄປ ໂດຍບໍ່ໄດ້ມີການແປຮູບແຕ່ຢ່າງໃດ ຈຶ່ງເຮັດໃຫ້ຕົນເອງເສຍໂອກາດໃນການທີ່ຈະເພີ່ມມູນຄ່າໃຫ້ກັບສິນຄ້າມາໂດຍຕະຫຼອດ. 

ດ້ວຍເຫັນໄດ້ຈຸດອ່ອນດັ່ງກ່າວຈຶ່ງໄດ້ເລີ່ມສຶກສາ ແລະ ຮ່ວມມືກັບສູນວິຈິດຕະກຳແຫ່ງຊາດ ແລະ ນາຍຊ່າງຊຳນານງານຈຳນວນໜຶ່ງ ເພື່ອຫັນປ່ຽນວິທີການມາແປຮູບຜະລິດຕະພັນໃຫ້ກາຍເປັນງານສິລະປະສາກ່ອນແລ້ວຈຶ່ງສົ່ງອອກ ແລະ ວາງຂາຍ ເຊິ່ງກໍເຫັນວ່າໄດ້ຮັບການຕອບສະໜອງ ພ້ອມກັບໄດ້ຮັບການສົ່ງເສີມຈາກພາກລັດເປັນຢ່າງດີ ອັນເນື່ອງມາຈາກລັດຖະບານເອງກໍມີນະໂຍບາຍສົ່ງເສີມລັກສະດຽວກັນນີ້ຢູ່ແລ້ວ. ພາຍຫຼັງທີ່ເຫັນວ່າຜະລິດຕະພັນຂອງຕົນເອງເລີ່ມເປັນທີ່ສົນໃຈ ແລະ ໄດ້ຮັບການຍອມຮັບຈາກສັງຄົມ ໃນເວລານັ້ນກໍບໍ່ລໍຊ້າ ຮີບຮ້ອນນຳເອົາຜະລິດຕະພັນເຄື່ອງຫັດຖະກຳຈັກສານເຂົ້າມາເສີມຮ້ານ ເພື່ອຮັບໃຊ້ໃນການເປັນເຄື່ອງຕ້ອນຂອງຝາກທີ່ມີຫຼາກຫຼາຍຊະນິດ ເຖິງຈະແມ່ນງານຫັດຖະກຳພື້ນບ້ານທີ່ຈຳຕ້ອງອາໄສນາຍຊ່າງຜູ້ຊຳນານງານໃນການຄວັດແກະ ແລະ ຈັກສານ 

ແຕ່ການອອກແບບໃຫ້ມີຄວາມທັນສະໄໝ ແລະ ຍັງຄົງຮັກສາໄວ້ເຊິ່ງກິ່ນອາຍຄວາມເປັນມໍລະດົກພື້ນບ້ານນັ້ນຖືວ່າແມ່ນສິ່ງທີ່ຂາດບໍ່ໄດ້ ເຊິ່ງນັ້ນໄດ້ກາຍເປັນຈຸດເດັ່ນໃຫ້ກັບຜະລິດຕະພັນຂອງພວກເຮົາ ທີ່ມີຄວາມສະດຸດຕາໃນເລື່ອງການອອກແບບ ແລະ ເອກະລັກສະເພາະ ໂດຍເນັ້ນເຖິງຄຸນຄ່າຂອງວັດສະດຸທຸກຊິ້ນງານ ເຖິງແມ່ນວ່າຈະເປັນພຽງເສດໄມ້ ທີ່ຖືກປະຖີ້ມໄວ້ຕາມຫົວໄຮ່ປາຍນາກໍຕາມ ພວກເຮົາກໍຈະຈັບມາເຈຍລະໄນໃຫ້ກາຍເປັນມູນຄ່າ ນາງຂັນທອງກ່າວ. 

ຫາກທ່ານໃດສົນໃຈຜະລິດຕະພັນຫັດຖະກຳອັນປານີເທີ່ເຮັດຂຶ້ນໂດຍສີມືຄົນລາວ ແມ່ນສາມາດຕິດຕໍ່ໄດ້ທີ່ຮ້ານຢາພື້ນເມືອງກາກະທິງທອງ ຕັ້ງຢູ່ບ້ານສະພານທອງໃຕ້ ເມືອງສີສັດຕະນາກ ນະຄອນ ຫຼວງວຽງວັນ ກົງກັນຂ້າມກັບໂຮງໝໍ 103 ຫຼື ຕິດຕາມສອບຖາມໄດ້ທີ່ເບີ 021 351 691 ຫຼື Facebook fanpage: Viengthong Herp.

ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ