ເຈົ້າໜ້າທີ່ພາສີລາວ ກັກຕົວຜູ້ຂົນເງິນອອກນອກປະເທດ

ຫນ້າທຳອິດ
ຂ່າວ
ຂ່າວເດັ່ນ

ເຈົ້າໜ້າທີ່ພາສີລາວ ກັກຕົວຜູ້ຂົນເງິນອອກນອກປະເທດ

ໂດຍ: ສີເປື້ອນມື 01 ພະຈິກ 2018 (17.44 ນ.) Read : 1,141

ເຈົ້າໜ້າທີ່ພາສີ ດ່ານພາສີສາກົນ ຂົວມິດຕະພາບ 1 (ນະຄອນຫຼວງວຽງຈັນ-ໜອງຄາຍ) ໄດ້ຕັ້ງໜ້າຈັດຕັ້ງປະຕິບັດວຽກງານຕ້ານ ແລະສະກັດກັ້ນປະກົດການຫຍໍ້ທໍ້ຕ່າງໆພາຍໃນດ່ານຢ່າງຕໍ່ເນື່ອງ. ຫຼ້າສຸດໃນວັນທີ 31 ຕຸລາ 2018 ເຈົ້າໜ້າທີ່ພາສີ ສາມາດຢຶດເງິນທີ່ກຽມນຳເງິນຕາອອກນອກປະເທດໄດ້ ຕື່ມອີກຫຼາຍສະກຸນ ມູນຄ່າ 1 ຕື້ກວ່າກີບ.

ອີງຕາມການລາຍຂອງ ທ່ານ ບຸນແອງ ພັນທະວົງ ຫົວໜ້າດ່ານພາສີສາກົນ ຂົວມິດຕະພາບ 1 ໃຫ້ຮູ້ວ່າ: ວັນທີ 31 ຕຸລາ 2018 ເວລາ 10:25 ໂມງ ເຈົ້າ ໜ້າທີ່ພາສີໄດ້ຮັບແຫຼ່ງຂ່າວວ່າຈະມີການລັກລອບລໍາລຽງເງິນຕາອອກນອກປະເທດ ພ້ອມກັນນັ້ນ, ທີມງານກວດກາພາຫະນະ-ຜູ້ໂດຍສານ ແລະໜ່ວຍງານທີ່ກ່ຽວຂ້ອງ ໄດ້ກຽມພ້ອມກວດກາ ພໍມາຮອດເວລາ 11:37 ໂມງ ໄດ້ພົບເຫັນລົດເປົ້າໝາຍ ຈຶ່ງຂໍອະນຸຍາດກວດກາລະອຽດພົບເຫັນເງິນໂດລາສະຫະລັດ 170.000 ໂດລາ, ເງິນໂດລາອົດສະຕຣາລີ 7.470 ໂດລາ ແລະເງິນເອີໂຣ 3.145 ເອີໂຣ ເຊື່ອງໃນກະເປົ໋າເປ້ໃນລົດກະບະ ໝາຍເລກທະບຽນ ຂກ 6633 ກໍາແພງນະຄອນ ກຽມນຳເງິນຕາອອກນອກປະເທດ ຕີເປັນມູນຄ່າເງິນກີບຫຼາຍກວ່າ 1,5 ຕື້ກີບ.

ປັດຈຸບັນເງິນຈໍານວນດັ່ງກ່າວ ແລະພາຫະນະເຈົ້າໜ້າທີ່ພາສີ ໄດ້ຢຶດໄວ້ເປັນຂອງກາງເພື່ອດຳເນີນ ການຕາມລະບຽບພາສີ ແລະລະບຽບການຕ່າງໆ. ສ່ວນຜູ້ຕ້ອງຫາຈໍານວນ 3 ຄົນ (ຊາຍ 1 ຄົນ ແລະ ຍິງ 2 ຄົນ) ໄດ້ມອບໃຫ້ເຈົ້າໜ້າທີ່ ຕມ ປະຈຳດ່ານສືບສວນ-ສອບສວນຕາມວິຊາສະເພາະ ແລະດໍາເນີນຄະດີຕາມລະບຽບການ ແລະກົດໝາຍຂັ້ນຕໍ່ໄປ.

ຂໍ້ມູນ: ວຽງຈັນໃໝ່.

ທີ່ມາ: Vientiane Mai