• ເຫດຜົນຂອງການປັບຂຶ້ນລາຄາລົດເມ

ໂດຍ: ສີເປື້ອນມື 06 ພະຈິກ 2018 (10.39 ນ.) Read : 515

ພາຍຫຼັງທີ່ມີແຈ້ງການປັບຂຶ້ນຄ່າລົດເມ 3 ສາຍທາງລະຫວ່າງທ່າງ່ອນ, ດົງໂດກ ແລະໂພນຕ້ອງ ທີ່ກ່ອນໜ້ານີ້ ມີນະໂຍບາຍຜ່ອນຜັນສຳລັບນັກສຶກສາ ເຮັດບັດຂີ່ລົດເມແບບມອບເໝົາ ແຕ່ຢູ່ໆມີການແຈ້ງປັບຂຶ້ນເກືອບທົບເທົ່າ ເຮັດໃຫ້ເກີດມີຄຳຖາມຈາກສັງຄົມຢ່າງຫຼວງຫຼາຍ.

ທ່ານ ທະ​ນົງ​ສີ ​ເດດ​ວົງ​ສອນ ຫົວໜ້າຂະ​ແຫນ​ງການ ​ແລະຂົນ​ສົ່ງ​ໂດຍສານລັດ​ວິ​ສາ​ຫະກິດ​ລົດ​ເມນະຄອນຫລວງ​ວຽງຈັນ ​ໄດ້​ຊີ້ແຈງຕໍ່ສື່​ມວນ​ຊົນກ່ຽວກັບ​ການ​ປັບ​ຂຶ້ນລາຄາ​ຂອງ​ບັດ​ລົດ​ເມ​ໃນ 3 ​ເສັ້ນທາງຄື: ທ່າ​ງ່ອນ, ດົງ​ໂດກ ​ແລະ​ໂພນ​ຕ້ອງ-ດົງ​ໂດກ ວ່າ: ທາງ​ລັດ​ວິ​ສາ​ຫະກິດ​ລົດ​ເມ ນະຄອນຫລວງ​ວຽງຈັນຮ່ວມ​ກັບ​ໂຄງການ​ປັບປຸງ​ລະບົບ​ຂົນ​ສົ່ງ​ສາທາລະນະ​ໃນ​ຕົວ​ເມືອງ ນະຄອນຫລວງ​ວຽງຈັນ​ຂອງ​ອົງການ​ໄຈ​ກາ ປະ​ເທດ​ຍີ່ປຸ່ນ ​ໄດ້​ປັບ​ລະບົບ​ການ​ນຳ​ໃຊ້​ບັດ​ລົດ​ເມມາ​ແຕ່​ປີ 2014, ​ເພື່ອ​ຫລຸດຜ່ອນ​ການ​ສັນຈອນ​ແອ​ອັດ ​ແລະ​ເຮັດ​ໃຫ້​ມວນ​ຊົນຫັນ​ມາ​ຊົມ​ໃຊ້​ລົດ​ເມສາ​ທາ​ລະນະ​​ຫລາຍ​ຂຶ້ນ.

ເຖິງຢ່າງໃດກໍຕາມ, ມາ​ຮອດ​ປັດຈຸບັນເຫັນ​ວ່າການ​ຊົມ​ໃຊ້ບັດ​ລົ​ດ​ເມ​ແມ່ນ​ມີ​ຈຳນວນໜ້ອຍ, ​ເມື່ອ​ສົມທຽບກັບ​ການ​ຄິດ​ໄລ່​ເບື້ອງຕົ້ນ, ບວກ​ທັງ​ການ​ເຫນັງ​ຕີງ​ຂອງ​ລາຄາ​ນ້ຳມັນ​ເຮັດ​ໃຫ້​ຫລຸບ​ທຶນ​ເປັນ​ຈຳນວນ​ຫລາຍ, ຊຶ່ງ​ນັບ​ແຕ່​ມີ​ການ​​ເປີດ​ໃຫ້​ມວນ​ຊົນ​ນຳ​ໃຊ້​ບັດ​ລົດ​ເມ​ເປັນ​ຕົ້ນ​ມາ ລັດ​ວິ​ສາ​ຫະກິດ​ລົ​ດ​ເມນະຄອນຫລວງ​ວຽງຈັນ ຫລຸບ​ທຶນ​ຫລາຍ​ກວ່າ 4 ຕື້ກີບ. ສະ​ນັ້ນ ​ເພື່ອ​ເຮັດ​ໃຫ້​ຂອດ​ບໍລິການ​​ດີ​ຂຶ້ນ ຈຶ່ງ​ຕ້ອງ​ໄດ້​ມີ​ການ​ປັບ​ລາຄາຄື: ສາຍ​ທາງ​ທ່າ​ງ່ອນຈາກ​ລາຄາ​ເດີມບັດ 6 ​ເດືອນ​ແມ່ນ 400.000 ກີບມາ​ເປັນ 800.000 ກີບ, ບັດ​ 1 ປີ, ຈາກ​ລາຄາ 800.000 ກີບ, ມາ​ເປັນ 1.500.000 ກີບ, ສ່ວນ​ສາຍ​ທາງດົງ​ໂດກ ​ແລະ ສາຍ​ທາງ​ໂພນ​ຕ້ອງ-ດົງ​ໂດກ ກໍ​ມີ​ການ​ປັບ​ລາຄາ​ຂຶ້ນ​ເຊັ່ນ​ກັນ.

ຮອງ​ຜູ້ອຳນວຍການ​ລັດ​ວິ​ສາ​ຫະກິດ​ລົດ​ເມ ນະຄອນຫລວງ​ວຽງຈັນ ​ໃຫ້​ຮູ້​ວ່າ: ປັດຈຸບັນ, ການ​ຊົມ​ໃຊ້​ລົດ​ເມສາ​ທາ​ລະນະ ຢູ່ນະຄອນຫລວງ​ວຽງຈັນ ຍັງ​ມີ​ຈຳນວນໜ້ອຍ ​ແລະພາຍຫລັງ​ມີ​ການ​ກໍ່ສ້າງ​ສະຖານີ​ລົດ​​ເມຂຶ້ນ​ໃໝ່, ​ເຮັດ​ໃຫ້​ມີ​ຄວາມ​ຫຍຸ້ງຍາກ ຈາກ​ມື້ໜຶ່ງສະ​ເລ່ຍມີ​ຜູ້​ຊົມ​ໃຊ້​ກ່ວາ 10 ພັນ​ຄົນ ຫລຸດ​ລົງ​ກວ່າ 30% ທັງ​ນີ້ ກໍ​ຍ້ອນ​ຄວາມ​ແອ​ອັດ ​ແລະການຈັດ​ສັນສະຖານ​ນີ​ຂົນ​ສົ່ງ​ຍັງ​ບໍ່​ເປັນ​ລະບຽບ.

ສະ​ນັ້ນ, ​ເພື່ອເປັນການ​ປັບປຸງ ​ແລະຮອງ​ຮັບ​ການ​ບໍລິການ​ລູກ​ຄ້າລັດ​ວິ​ສາ​ຫະກິດ​ລົດ​ເມນະຄອນຫລວງ​ວຽງຈັນ ຈະ​ນຳ​ໃຊ້​ລົດ​ເມ​ແບບ​ໃໝ່ທັນ​ສະ​ໄໝ, ພ້ອມ​ທັງ​ຂະຫຍາຍ​ສາຍ​ທາງ​ຕື່ມ​ອີກ 4 ​ເສັ້ນ, ຈາກ​ປັດຈຸບັນ​ມີ 10 ​ເສັ້ນທາງ​ທີ່​ລົດ​ເມ​ສັນຈອນ. ພ້ອມ​ກັນນັ້ນ, ກໍ​​ເລັ່ງ​ໂຄສະນາ​ປູກ​ຈິດ​ສຳນຶກ​ໃຫ້​ມວນ​ຊົນຫັນ​ມາ​ຊົມ​ໃຊ້​ລົດ​ເມສາ​ທາ​ລະນະ ​​ເພື່ອ​ຫລຸດຜ່ອນການ​ສັນຈອນ​ແອ​ອັດ​ໃນ​ຕົວ​ເມືອງ.

ຂໍ້ມູນ: LaoUpdate


ທີ່ມາ: https://www.sportsupdate.org/archives/5515?fbclid=IwAR1B9zAzjIteMXRx3qfAT6Ux8QvSFlDgDywNyJmQMl7trOBZqB-tohJNTGs
  • ຮູບພາບ

  • ແທັກທີ່ກ່ຽວຂ້ອງ