• ໄປຫຼິ້ນບຸນທາດຫຼວງທາງໃດລົດຈຶ່ງບໍ່ຕິດ (ກົດອ່ານ)

ໂດຍ: ສີເປື້ອນມື 14 ພະຈິກ 2018 (13.28 ນ.) Read : 1,541

      ຕາມແຈ້ງການສະບັບເລກທີ 366/ປກສ.ນວ ນະຄອນຫລວງວຽງຈັນ ລົງວັນທີ 07/11/2018

ເຖິງ: ບັນດາສຳນັກງານ, ຕຳຫຼວດ, ພໍ່ແມ່ປະຊາຊົນນະຄອນຫຼວງວຽງຈັນ, ຕະຫລອດຮອດຊາວຕ່າງປະເທດ ທີ່ຈະມາທ່ຽວງານບຸນນະມັດສະການພະທາດຫຼວງ ແລະງານວາງສະແດງ ສິນຄ້າປະຈຳປີ ພສ 2561.

ເລື່ອງ: ງານບຸນນະມັດສະການພະທາດຫລວງ ແລະງານວາງສະແດງສິນຄ້າ ທີ່ສູນການຄ້າລາວ-ໄອເຕັກ ນະຄອນຫຼວງວຽງຈັນ ໃນວັນທີ 16-25 ພະຈິກ 2018.

-    ອີງຕາມຂໍ້ຕົກລົງ ຂອງລັດຖະມົນຕີ ກະຊວງປ້ອງກັນຄວາມສະຫງົບ ສະບັບທີ 010/ ປກສ, ລົງ ວັນທີ 03 ມັງກອນ 2014 ວ່າດ້ວຍການຈັດຕັ້ງ ແລະການເຄື່ອນໄຫວຂອງກອງບັນຊາການປ້ອງກັນຄວາມສະຫງົບ ນະຄອນຫຼວງວຽງຈັນ.

-    ອີງຕາມກົດລະບຽບຊົ່ວຄາວສະບັບເລກທີ 381/ຈນວ, ລົງວັນທີ 31/10/2018 ຂອງເຈົ້າຄອງນະຄອນຫຼວງວຽງຈັນ ວ່າດ້ວຍການຄຸ້ມຄອງງານ ບຸນນະມັດສະການພະທາດຫຼວງ ແລະງານຕະຫຼາດນັດ ພສ 2561 ໃນລະຫວ່າງວັນທີ 16-25 ພະຈິກ 2018.

ເພື່ອເຮັດໃຫ້ ງານບຸນນະມັດສະການພະທາດຫຼວງ ແລະງານວາງສະແດງສິນຄ້າ ທີ່ລາວ-ໄອເຕັກ ປະຈຳປີ 2018 ດໍາເນີນໄປດ້ວຍບັນຍາກາດແຫ່ງຄວາມເບີກບານມ່ວນຊື່ນຮັກສາໄດ້ເອກະລັກວັດທະນະທໍາອັນດີງາມຂອງຊາດ, ຮັບປະກັນຄວາມສະຫງົບ, ເປັນລະບຽບຮຽບຮ້ອຍ ແລະມີຄວາມສະອາດສວຍງາມ.

   ກອງບັນຊາການປ້ອງກັນຄວາມສະຫງົບ ນະຄອນຫຼວງວຽງຈັນ ຈຶ່ງແຈ້ງມາຍັງທຸກພາກສ່ວນ ແລະທຸກຊັ້ນຄົນໃນສັງຄົມ ຈົ່ງພ້ອມໃຈກັນຈັດຕັ້ງປະຕິບັດດັ່ງນີ້:

1.   ວ່າດ້ວຍໃນການນຳໃຊ້ເສັ້ນທາງໃນຊ່ວງໄລຍະຈັດງານບຸນ.

1.1  ພາຫະນະທີ່ມາແຕ່ເສັ້ນທາງ 13 ໃຕ້, ເສັ້ນທາງເລກທີ່ 10 ຫຼືເສັ້ນທາງດອນໜູນ ຕໍ່ໃສ່ທາງໄກສອນ ຖ້າບໍ່ມີຈຸດປະສົງມາທ່ຽວງານບຸນມາຮອດໄຟແດງ ໜອງໜ່ຽງ ແລ້ວໃຫ້ລ້ຽວຊ້າຍເຂົ້າຕາມເສັ້ນທາງບ້່ານ ໜອງຫນ່ຽງ ອອກໃສ່ບ້ານ ວັງຊາຍ ແລ້ວໄປຕາມຈຸດປະສົງ ຫຼືລ້ຽວຂວາອອກໃສ່ທາງ 150 ຕຽງ ແລ້ວໄປຕາມຈຸດປະສົງ.

1.2  ສະເພາະລົດບັນທຸກທີ່ມາແຕ່ເສັ້ນທາງ 13 ເຫນືອ ມີຈຸດປະສົງຈະໄປຂວາມິດຕະພາບ ໃຫ້ໃຊ້ເສັ້ນທາງຫນອງບຶກ-ດົງໂດກ ອອກໃສ່ເສັ້ນທາງ 450 ປີ ໄປຫາຂົວມິດຕະພາບ.

1.3  ສະເພາະລົດບັນທຸກທີ່ມາແຕ່ເສັ້ນທາງ 13 ເຫນືອ ມີຈຸດປະສົງຈະໄປເສັ້ນທາງ 13 ໃຕ້ມາຮອດ 03 ແຍກໜອງບຶກ ໃຫ້ລ້ຽວຊ້າຍໄປຕາມເສັ້ນທາງໜອງບຶກຮອດໄຟແດງດົງໂດກລ້ຽວຊ້າຍໄປຕາມຈຸດປະສົງ.

1.4  ລົດບັນທຸກທີ່ມາແຕ່ຂົວມິດຕະພາບມີຈຸດປະສົງໄປເສັ້ນທາງ 13 ໃຕ້ໃຫ້ໃຊ້ເສັ້ນທາງ 450 ປີມາຮອດ 04 ແຍກໄຟແດງດົງໂດກໃຫ້ລ້ຽວຂວາໄປທາງດອນໜູນ ແລ້ວໄປຕາມຈຸດປະສົງ.

1.5  ສະເພາະລົດບັນທຸກທີ່ມາແຕ່ເສັ້ນທາງ 13 ໃຕ້ ມີຈຸດປະສົງຈະໄປຂົວມິດຕະພາບ ຮອດ 04 ແຍກໄຟແດງຫຼັກ  21 ໃຫ້ລ້ຽວຊ້າຍອອກໃສ່ເສັ້ນ 450 ປີ ແລ້ວລ້ຽວຊ້າຍໄປຂົວມິດຕະພາບ.

1.6  ກໍລະນີການສັນຈອນມີການສັບສົນ ເຈົ້າຫນ້າທີ່ຈະໄດ້ແຍກລົດຢູ່ຈຸດໄຟແດງດົງໂດກ ແລະ ຈຸດໄຟແດງຫນອງໜ່ຽງໃຫ້ລ້ຽວຂວາໄປເສັ້ນທາງດົງໂດກ-ໂພນຕ້ອງ ຫຼືຮອດໄຟແດງຕານມີໄຊ ໃຫ້ລ້ຽວຊ້າຍໄປຕາມເສັ້ນທາງຕານມີໄຊ-ດອນແດງ.

1.7  ພະຫະນະທົ່ວໄປທີ່ມາແຕ່ເສັ້ນທາງຫນອງໄຮ, ໂພນທັນ, ເສັ້ນທາງມິດຕະພາບທີ່ມີຈຸດປະສົງໃຊ້ເສັ້ນທາງກຳແພງເມືອງແຕ່ໄຟແດງສັງກະສີ ຫາ ໄຟແດງທາດຫຼວງ ໄປຮອດໄຟແດງແລ້ວລ້ຽວຂວາອອກໃສ່ບ້ານໂນນຄໍ້ ແລ້ວໄປຕາມຈຸດປະສົງ (ໃຊ້ແຕ່ມື້ຕັກບາດ ໃນງານບຸນພະທາດຫຼວງ).

2.   ວ່າດ້ວຍສະຖານທີ່ຈອດລົດປະເພດຕ່າງໆ.

2.1  VIP ອະນຸຍາດໃຫ້ຈອດ ເບື້ອງທິດຕາເວັນອອກ ເຂດເຮືອນຊົງລາວ (ບໍລິສັດ CNP).

2.2  P1 P2 ອະນຸຍາດຈອດຢູ່ສະໜາມຫລວງ ຫ້ອງການສະພາແຫ່ງຊາດ.

2.3  ສຳລັບລົດທີ່ມາສົ່ງເຄື່ອງ ເລີ່ມແຕ່ເວລາ 8:00 ໂມງເຊົ້າ ຫາ 12 ໂມງທ່ຽງ ພາຍຫຼັງທີ່ເອົາເຄື່ອງອອກຫມົດແລ້ວ ໃຫ້ເອົາລົດໄປຈອດໄວ້ບ່ອນທີ່ກຳມະການກຳນົດໄວ້.

2.4  ສຳລັບລົດຮັບສົ່ງມວນຊົນ ເຊັ່ນ: ຕຸກໆ, ຈໍາໂບ້, ລົດຂົນສົ່ງໂດຍສານສາມາດອະນຸຍາດໃຫ້ຈອດໄດ້ຊົ່ວຄາວ ເພື່ອສົ່ງຄົນໂດຍສານຕາມຈຸດທີ່ໄດ້ກຳນົດເຊັ່ນ: ເສັ້ນທາງຊ້າງເຜືອກ ເຂດບ້ານ ຮ່ອງໄກ່ແກ້ວ, ຕະຫຼາດທາດຫຼວງ, ສີສັງວອນ, ໂພນໄຊ, ໂພນສະອາດ ແລະໂຮງຮຽນມັດທະຍົມ ຫນອງສັງທໍ່.

2.5  ສະເພາະລົດຍົນ, ລົດຈັກ , ລົດຖີບ, ລົດສາມລໍ້ ມີຈຸດປະສົງໄປທ່ຽວງານບຸນນະມັດສະການພະທາດຫຼວງ ແລະງານວາງສະແດງສິນຄ້າລາວ-ໄອເຕັກ ແມ່ນໃຫ້ຈອດຕາມສະຖານທີ່ຈອດລົດທາງຂ້າງຄະນະກຳມະການຈັດງານກຳນົດໄວ້ ເຊິ່ງຈະມີເຈົ້າໜ້າທີ່ອຳນວຍຄວາມສະດວກຕາມຈຸດຕ່າງໆ.

2.6  ພາຫະນະທີ່ມາແຕ່ເສັ້ນທາງ 13 ເຫນືອ ແມ່ນອະນຸຍາດໃຫ້ ຈອດຢູ່ສະຖານທີ່ຈອດລົດປະຕູໄຊ ແລະຈອດຢູ່ສະຖານທີ່ຈອດລົດຂອງທະນາຄານ ອິນດູຈີນ, ຈອດຕາມທາງຊອຍ, ທາງຮ່ອມບ້ານ ສີບຸນເຮືອງ ທີ່ເຫັນວ່າມີຄວາມປອດໄພ ແລະບໍ່ເປັນການກີດຂວາງການສັນຈອນຂອງພະຫະນະອື່ນ.

2.7  ພາຫະນະທີ່ມາແຕ່ເສັ້ນທາງ 13 ໃຕ້ ແລະເສັ້ນທາງ ເລກ 10 ບ້ານ ເກີນ ແມ່ນອະນຸຍາດໃຫ້ຈອດລຽບຕາມທາງຊອຍ ທາງຮ່ອມເຂດບ້ານໂພນພະເນົາ ທີ່ເຫັນວ່າມີຄວາມປອດໄພແລະບໍ່ເປັນການກີດຂວາງການສັນຈອນຂອງພະຫະນະອື່ນ.

2.8  ພາຫະນະທີ່ມາແຕ່ທາງທ່າເດື່ອ ເມືອງ ຫາດຊາຍຟອງ, ອະນຸຍາດມໃຫ້ຈອດຢູ່ຕາມທາງຊອຍບ້ານ ສະພັງໝໍ້ ແລະເສັ້ນທາງ ບ້ານ ໂພນສີນວນ, ສະເພາະລົດເມ, ລົດໂດຍສານ ລົດ 06 ລໍ້ຂຶ້ນໄປ.

2.9  ພາຫະນະທີ່ມາແຕ່ບ້ານ ຊໍາເຄ້, ນາຄວາຍ, ດົງຄຳຊ້າງ, ຊຽງດາໃຫ້ຈອດຢູ່ສະຖານທີ່ຕະຫຼາດຫົວຂົວ.

2.10    ພາຫະນະທີ່ມີຈຸດປະສົງມາທ່ຽວງານວາງສະແດງສິນຄ້າ ລາວ-ໄອເຕັກ ໃຫ້ຈອດຢູ່ເດີ່ນສູນການຄ້າລາວ-ໄອເຕັກ ເລີຍ.

3 ວ່າດ້ວຍຂໍ້ຫ້າມຕ່າງໆ.

3.1. ຫ້າມໂຄສະນາທຸກຮູບແບບທີ່ຜິດຕໍ່ກົດຫມາຍຂອງ ສປປ ລາວ.

3.2. ຫ້າມຂາຍ ຫຼື ນໍາເອົາອາວຸດທຸກປະເພດ ລວມທັງ ມີດ-ພ້າ, ງ້າວ, ກະຖຸນ, ສະໜັບມື ເຂົ້າໄປໃນງານບຸນໂດຍເດັດຂາດ (ຍົກເວັ້ນໄດ້ຮັບອະນຸາດຈາກເຂົ້າໜ້າທີ່)​.

3.3. ຫ້າມຂາຍ ແລະນໍາເອົາຢາເສບຕິດ, ທາດລະເບີດ, ທາດແຕກ, ທາດເບື່ອ, ສານເຄມີ, ທີ່ອອກລິດ ຕໍ່ລະບົບປະສາດທຸກຊະນິດເຂົ້າມາໃນງານຢ່າງເດັດຂາດ.

3.4. ຫ້າມນຳເອົາຜະລິດຕະພັນທີ່ຮຽນແບບສິ້ນລາວນຳເຂົ້າມາວາງຂາຍພາຍໃນງານຢ່າງເດັດຂາດ.

3.5. ຫ້າມນໍາເຂົ້າ, ຊື້-ຂາຍ ໂຄມໄຟລອຍຟ້າ ແລະຈູດຫມາກກະໂພກ ທຸກຊະນິດ, ທຸກລະດັບ.

3.6 ຫ້າມວາງຂາຍເຄື່ອງເກີນຂອບເຂດອອກມາຫນ້າຮ້ານ ທີ່ຄະນະກໍາມະການຈັດງານຕະຫຼາດນັດກຳນົດໄວ້.

3.7. ຫ້າມຂາຍ ແລະນໍາເອົາຜະລິດຕະພັນ ວັດທະນາທໍາທີ່ລາມົກ ແລະເຊື່ອມເສຍຕ່າງໆເຂົ້າມາໃນຢ່າງເດັດຂາດ.

3.8. ຫ້າມຫລິ້ນການພະນັນທຸກປະເພດ.

3.9 ຫ້າມຂາຍເຄື່ອງໃສ່ລໍ້ຍູ້ຊະຊາຍໃນງານບຸນຢ່າງເດັດຂາດ.

3.10 ຫ້າມດື່ມເຫຼົ້າ, ເບຍ ແລະສິ່ງມຶນເມົາ ແລ້ວກໍ່ອາລະວາດຜິດຖຽງກັນ, ຕີກັນ, ສ້າງຄວາມບໍ່ສະຫງົບຢ່າງເດັດຂາດ.

3.11 ສໍາລັບນັກສະແດງສິລະປະຢູ່ໃນງານບຸນ, ວາງສະແດງສິນຄ້າ, ຕະຫຼາດນັດ ແຕ່ລະຈຸດຕ້ອງແຕ່ງກາຍ ແລະນຸ່ງເຄື່ອງສຸພາບຮຽບຮ້ອຍໃຫ້ຖືກຕ້ອງຕາມຮີດຄອງປະເພນີ.

3.12. ຫ້າມຕອກເຫຼັກ ຫຼືສິ່ງຂອງຕ່າງໆໃສ່ພື້ນເດີ່ນພະທາດຫຼວງຢ່າງເດັດຂາດ.

3.13 ຫ້າມນຳໃຊ້ໂດຼນ ຫຼືອຸປະກອນຖ່າຍພາບທທາງອາກາດ, ຍົກເວັ້ນແຕ່ທາງການອະນຸຍາດໃຫ້ພາກສ່ວນກ່ຽວຂ້ອງເທົ່ານັ້ນ.

4. ມາດຕະການຈັດຕັ້ງປະຕິບັດ:

4.1 ມອບໃຫ້ ປກສ ເມືອງ, ປກສ ກຸ່ມບ້ານ, ປກສ ບ້ານ ສົມທົບອໍານາດການປົກຄອງບ້ານ, ຈັດຕັ້ງເຜີຍແຜ່ແຈ້ງການສະບັບນີ້ ໃຫ້ປະຊາຊົນ ຊັ້ນຄົນຕ່າງໆ ຮັບຮູ້ຢ່າງເລິກເຊິ່ງ ແລະປະຕິບັດຢ່າງເຂັ້ມງວດ.

4.2 ໃນກໍລະນີ ເຈົ້າຫນ້າທີ່ກວດພົບເຫັນການປະພຶດຂອງບຸກຄົນ ຫຼືພາກສ່ວນໃດ ຝ່າຝືນກົດລະບຽບ ແລະຂໍ້ກຳນົດຕ່າງໆທີ່ວາງອອກ ຈະໄດ້ສຶກສາອົບຮົມກ່າວເຕືອນ, ປັບໃໝ ຫຼືດໍາເນີນມາດຕະການຕາມສະຖານຄວາມຜິດ ໂດຍບໍ່ມີຂໍ້ຍົກເວັ້ນຢ່າງເດັດຂາດ.

4.3 ມອບໃຫ້ຕໍາຫຼວດຈາລະຈອນເປັນຫຼັກແຫຼ່ງ, ເປັນໃຈກາງປະສານງານກັບທຸກພາກສ່ວນຂະແໜງການ, ອຳນາດການປົກຄອງທຸກຂັ້ນ ເພື່ອຈັດຕັ້ງປະຕິບັດແຈ້ງການສະບັບນີ້ ຢ່າງເຂັ້ມງວດ.

ດັ່ງນັ້ນ, ກອງບັນຊາການປ້ອງກັນຄວາມສະຫງົບນະຄອນຫຼວງວຽງຈັນ ຈຶ່ງແຈ້ງການເພື່ອປະຕິບັດ.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ