• ໂຈໂຈ້ ແນະນໍາຜົນງານເພງໃໝ່ “ຢືມ”

ໂດຍ: Admin Mahason 13 ພະຈິກ 2017 (14.48 ນ.) Read : 870

ໃນວັນທີ 27 ຕຸລາ 2017 ທາງສິລະປິນ ໂຈໂຈ້ ມິຣາໂຄ ໄດ້ເປີດໂຕຜົນງານເພງໃໝ່ຫຼ້າສຸດ “ຢືມ” ທີ່ສູນການຄ້າວຽງຈັນເຊັນເຕີ. ລວມມີບັນດາສິລະປິນທີ່ມີຊື່ສຽງເຂົ້າຮ່ວມຢ່າງຫຼວງຫຼາຍ ພ້ອມທັງມີເຊີໄພຼ້ ເອັມວີເພງໃໝ່ໃຫ້ທຸກຄົນທີ່ໄປຮ່ວມງານໄດ້ຮັບຊົມພ້ອມກັນກ່ອນມື້ປ່ອຍຢ່າງເປັນທາງການ ນັ້ນກໍຄືວັນທີ 1 ພະຈິກ 2017.

ໂຈໂຈ້ ມິຣາໂຄ ໄດ້ໃຫ້ສໍາພາດວ່າ: ຜົນງານເພງ “ຢືມ” ເປັນຜົນງານເພງທີ່ຕົນເອງຕັ້ງໃຈເຮັດຢ່າງສຸດຄວາມສາມາດ ເພື່ອໃຫ້ມັນອອກມາດີທີ່ສຸດ ບໍ່ວ່າຈະເປັນການເຮັດດົນຕຣີເປັນທໍານອງເສົ້າປະສົມປະສານສຽງສຽງແຊັກຈາກນັກດົນຕຣີມືໜຶ່ງຂອງປະເທດໄທມາຮ່ວມໃນໂປຼເຈັກດັ່ງກ່າວ. ເນື້ອຫາຂອງເພງ “ຢືມ” ຕົນເອງໄດ້ຖ່າຍທອດມາຈາກຊີວິດຈິງຂອງຕົນເອງທີ່ໄດ້ພົບປະສົບການແບບນັ້ນມາ ເພາະເຄີຍຢືມຄວາມຮັກຈາກຄົນໆນີ້ມາໂດຍທີ່ບໍ່ຮູ້ມາກ່ອນມາເຂົາເຈົ້າມີເຈົ້າຂອງ ແລະສຸດທ້າຍຕ້ອງໄດ້ສົ່ງເຂົາຄືນ.

ຜົນງານທີ່ຜ່ານມາ ໂຈໂຈ້ ມິຣາໂຄ ໄດ້ມີເພງອອກມາກ່ອນໜ້ານີ້ ແລະເປັນທີ່ຮູ້ຈັກຂອງທຸກຄົນ ຖືເປັນການແຈ້ງເກີດຂອງ ໂຈໂຈ້ ກໍວ່າໄດ້ ນັ້ນກໍຄືເພງ “ຮັກກັນວັນນີ້” ຕໍ່ມາກໍ່ໄດ້ມີການປ່ອຍເພງເຫງົາທີ່ຖ່າຍທອດຈາກຊີວິດຈິງເຂົ້າເຖິງອາລົມອອກມາໃຫ້ແຟນເພງໄດ້ຟັງ ຄື: ເພງ ເພາະເຫງົາຄໍາດຽວ ແລະຕໍ່ມາກໍໄດ້ປ່ອຍເພງປະກອບຮູບເງົາ ວັນຄົບຮອບ ນັ້ນກໍຄື: ເພງ “ຄິດເຖິງວັນນັ້ນ” ເປັນເພງກ່ຽວກັບຄວາມຮັກທີ່ສົດໃສ. ຫຼ້າສຸດກໍມີຜົນງານເພງ “ຢືມ” ອອກມາຕາມຄໍາຂໍຂອງບັນດາແຟນເພງ ແລະເປັນທີ່ປະທັບໃຈຂອງທຸກຄົນ. ສໍາຫຼັບມິວສິກເພງ ໂຈໂຈ້ ມິຣາໂຄ ກໍໄດ້ຮັບບົດສະແດງເປັນພະເອກເອງ ພ້ອມຍັງໄດ້ ສຸດາ ວັນທອງທິບ, ນູນີ່ ແລະໜຸ່ມອ໊ອບ ມາຮ່ວມຖ່າຍທໍາອີກດ້ວຍ.



ທີ່ມາ:
  • ແທັກທີ່ກ່ຽວຂ້ອງ

  • #JojoMiracle