• ລັດເຂັ້ມງວດ ກໍານົດຂາຍຢາສູບ ບໍ່ໃຫ້ຫຼຸດ 4000 ກີບ

ໂດຍ: ສີເປື້ອນມື 07 ມັງກອນ 2019 (13.59 ນ.) Read : 306

ການຄ້າພາຍໃນ ກະຊວງອຸດສາຫະກຳ ແລະການຄ້າ ໄດ້ຈັດກອງປະຊຸມເຜີຍແຜ່ຄຳສັ່ງ ກ່ຽວກັບການຄວບຄຸມຜະລິຕະພັນຢາສູບ ດ້ວຍການກຳນົດລາຄາຂາຍຍ່ອຍຕໍ່າສຸດບໍ່ໃຫ້ຫຼຸດ 4 ພັນກີບຕໍ່ຊອງ ແລະຂາຍຍົກຕໍ່າສຸດບໍ່ໃຫ້ຫຼຸດ 30,000 ກີບຕໍ່ຕຸດ, ຜູ້ລະເມີດປັບໃໝສູງສຸດ 6 ລ້ານກີບ ພ້ອມຮິບຜະລິດຕະພັນຢາສູບເປັນຂອງລັດ. ກອງປະຊຸມເຜີຍແຜ່ ຈັດຂື້ນໃນວັນທີ 4 ມັງກອນ 2019 ທີ່ກະຊວງອຸດສາຫະກຳ ແລະການຄ້າ ໂດຍການເປັນປະທານຂອງ ທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ.
 ທ່ານ ສົມຈິດ ອິນທະມິດ ໄດ້ກ່າວວ່າ: ໃນຄວາມຈິງຕົ້ນທຶນຢາສູບຕໍ່ຊອງໜຶ່ງ ສະເລ່ຍປະມານ 1,800 – 2,000 ກີບ ເພື່ອຫຼີກເວັ້ນບໍ່ໃຫ້ມີການຂາຍລາຄາຕໍ່າກ່ວາ 4000 ກີບຕໍ່ຊອງ ພວກເຮົາຈຶ່ງຕັ້ງລາຄາໄວ້ເຮັດໃຫ້ຜູ້ບໍ່ມີເງິນກໍເຂົ້າບໍ່ເຖິງ. ພ້ອມນັ້ນ, ກໍໄດ້ເພີ່ມອາກອນຊົມໃຊ້ຈາກ 500 ກີບ ມາເປັນ 600 ກີບຕໍ່ຊອງ ເຊິ່ງເປັນເຄື່ອງມືອັນຫນຶ່ງເພື່ອດັດສົມຊ່ວຍສັງຄົມ. ຈາກມາດຕະການດັ່ງກ່າວມັນຈະເຮັດໃຫ້ຢາສູບເຖື່ອນທີ່ນຳເຂົ້າບໍ່ຖືກຕ້ອງໝົດໄປ (ຈາກການສຳຫຼວດ ມີຢາສູບເຖື່ອນທົ່ວສັງຄົມ ປະມານ 36% ຈໍາຫນ່າຍໃນສັງຄົມລາວ) ເຮັດໃຫ້ລັດສູນເສຍລາຍຮັບ 77 ຕື້ກີບ.
 ນອກຈາກມາດຕະການດ້ານລາຄາແລ້ວ ໃນໜຶ່ງປີທີ່ຜ່ານມາ ກະຊວງສາທາລະນະສຸກ ຍັງມີມາດຕະການ ຕິດສະຫຼາກຮູບພາບຜົນຮ້າຍຂອງຢາສູບ ຈາກ 30% ຂື້ນເປັນ 75% ໃນເນື້ອທີ່ຊອງຢາສູບ, ສ່ວນຂະແໜງອຸສາຫະກຳ ແລະການຄ້າ ໄດ້ຄວບຄຸມຂອດຈໍາໜ່າຍ, ການຜະລິດ ເຊິ່ງໃນປີ 2018 ເຈົ້າຫນ້າທີ່ກວດກາຄ້າໃນຂອບເຂດທົ່ວປະເທດກໍໄດ້ຍືດ ແລະທຳລາຍຢາສູບທີ່ບໍ່ໄດ້ມາດຕະຖານຫລາຍສົມຄວນ. ພ້ອມນັ້ນ, ຜູ້ດຳເນີນທຸກລະກິດຢາສູບຕ້ອງຈ່າຍອາກອນກຳໄລ 26% ເຊິ່ງ 2% ແມ່ນຕ້ອງໂອນໄປກອງທຶນຄວບຄຸມຢາສູບ ກະຊວງສາທາລະນະສຸກ ເພື່ອຊ່ວຍໂຄສະນາຜົນຮ້າຍຊ່ວຍສະກັດກັ້ນ, ຊ່ວຍການປິ່ນປົວ, ແລະຜົນອື່ນໆກ່ຽວກັບຢາສູບ.
 ຈາກນັ້ນ, ທ່ານ ບຸນທຽນ ແກ້ວສີພາ ຫົວຫນ້າກົມການຄ້າພາຍໃນ ໄດ້ຜ່ານຄຳສັ່ງກ່ຽວກັບການຄວບຄຸມຜະລິດຕະພັນຢາສູບ ເລກທີ 1791/ອຄ.ກຄພນ ລົງວັນທີ 18 ທັນວາ 2018 ເຊິ່ງມີເນື້ອໃນຄື: ການກຳນົດລາຄາຂາຍຍ່ອຍຜະລິດຕະພັນຢາສູບຢູ່ພາຍໃນ ແລະຜະລິດຕະພັນຢາສູບທີ່ນຳເຂົ້າຈາກຕ່າງປະເທດ ເພື່ອຈຳໜ່າຍຢູ່ ສປປ ລາວ ຕໍ່າສຸດບໍ່ໃຫ້ຫຼຸດ 4000 ກີບຕໍ່ຊອງ, ສ່ວນຂາຍຍົກຕໍ່າບໍ່ໃຫ້ຫຼຸດ 30,000 ກີບຕໍ່ຕຸດ ເຊິ່ງແມ່ນໃຫ້ເຈົ້າໜ້າທີ່ອຸດສາຫະກຳ ແລະການຄ້່າ ໃນຂອບເຂດທົ່ວປະເທດຄຸ້ມຄອງລາຄາຂາຍຍ່ອຍຜະລິດຕະພັນຢາສູບທຸກຊະນິດ ທີ່ຜະລິດພານໃນ ແລະນຳເຂົ້າຈາກຕ່າງປະເທດທີ່ວາງຂາຍຕາມທ້ອງຕະຫຼາດ, ທາງຮ້ານ ແລະສະຖານທີ່ວາງຂາຍຜະລິດຕະພັນຢາສູບຕ່າງໆ, ໃຫ້ແນະນຳຂາຍໃນລາຄາຕໍ່າສຸດບໍ່ໃຫ້ລຸດ 4000 ກີບຕໍ່ຊອງ, ຖ້າພົບເຫັນການລະເມີດໃຫ້ດຳເນີນມາດຕະການຜູ້ລະເມີດໃຫ້ດຳເນີນມາດຕະການຕໍ່ຜູ້ລະເມີດຕາມທີ່ໄດ້ລະບຸໃນດຳລັດ 474/ນຍ ເຊິ່ງລະເມີດຄັ້ງທີ 1 ປັບໃໝແຕ່ 5 ແສນກີບ ຫາ 1 ລ້ານກີບຕໍ່ຄັ້ງຕໍ່ລາຍການ ພ້ອມຂຽນໃບປະຕິຍານ, ຖ້າລະເມີດຄັ້ງທີ 2 ປັບໃໝ 1 ຫາ 2 ລ້ານກີບ ຕໍ່ຄັ້ງຕໍ່ລາຍການ ພ້ອມຂຽນໃບປະຕິຍານ ແລະຖ້າລະເມີດຄັ້ງທີ 3 ໃຫ້ດຳເນີນການປັບໃໝ 2 ເທົ່າຕົວ ຂອງການປັບໃຫມຄັ້ງທີ 2 ຕໍ່ຄັ້ງຕໍ່ລາຍການ ພ້ອມທັງຢຶດຜະລິດຕະພັນຢາສູບເປັນຂອງລັດ.
 ແຫຼ່ງຂ່າວ: ໜັງສືພິມ ເສດຖະກິດ-ການຄ້າ.

ທີ່ມາ: https://laoedaily.com.la/42413/?fbclid=IwAR1Sj0DqA_9LmiVMsrthvJsS-VhcQ46XHSDG64_y2iL5n6Fgk0GUasuSC04
  • ຮູບພາບ

  • ແທັກທີ່ກ່ຽວຂ້ອງ