• Beerlao White ລົດຊາດ ນຸ່ມນວນ ຊະນະໃຈຄົນລາວ

ໂດຍ: ສີເປື້ອນມື 11 ກຸມພາ 2019 (13.27 ນ.) Read : 1,007

ໃນວັນທີ 11 ກຸມພາ 2019 ໄດ້ມີການປະກາດຜົນໂຫວດເບຍທີ່ຊະນະໃຈຄົນລາວທົ່ວປະເທດ ທີ່ສະໂມສອນໃຫຍ່ຂອງບໍລິສັດ ເບຍລາວ ຈໍາກັດ. ໃຫ້ກຽດເຂົ້າຮ່ວມໂດຍ ທ່ານ ຈັນສະໝອນ ຜ່ອງຈັນທາ ຜູ້ຈັດການຝ່າຍການຕະຫຼາດ ບໍລິສັດ ເບຍລາວ ຈໍາກັດ ພ້ອມດ້ວຍຜູ້ບໍລິຫານ ແລະພະນັກງານພາຍໃນບໍລິສັດ ເບຍລາວ ຈໍາກັດ ຢ່າງຫຼວງຫຼາຍ.

ເນື່ອງໃນໂອກາດຄົບຮອບ 45 ປີຂອງບໍລິສັດເບຍລາວ ໃນປີ 2018 ທາງບໍລິສັດໄດ້ອອກຜະລິດຕະພັນໃໝ່ ເພື່ອເປັນການຮ່ວມສະຫຼອງໃຫ້ກັບຄວາມສໍາເລັດຂອງບໍລິສັດ ຄື: ເບຍລາວ ໄວທ໌, ເບຍລາວ ແອມເບີ ແລະເບຍລາວ ຮັອບປີ ເພື່ອເພີ່ມທາງເລືອກໃຫ້ແກ່ຜູ້ບໍລິໂພກ. ເບຍລາວ ທັງ 3 ລົດຊາດ ໄດ້ເປີດໂຕໃນເດືອນ ກໍລະກົດ 2018 ຜ່ານມາ. ຫຼັງຈາກນັ້ນ, ກໍໄດ້ໃຫ້ຜູ້ບໍລິໂພກໄດ້ມີສ່ວນຮ່ວມ ໃນການໂຫວດເບຍທີ່ທ່ານມັກຜ່ານທາງເວັບໄຊ ເຊິ່ງມີຈໍານວນຫຼາຍກວ່າ 30.000 ໂຫວດ ພາຍໃນໄລຍະເວລາ 3 ເດືອນ.

ຈາກຜົນການໂຫວດດັ່ງກ່າວ ເຮັດໃຫ້ເບຍລາວ ໄວທ໌ (Beerlao White) ໄດ້ຄະແນນໂຫວດຫຼາຍທີ່ສຸດ ເຊິ່ງເບຍລາວໄວທ໌ ເປັນເບຍທີ່ມີສີຂາວຂຸ້ນອັນໂດດເດັ່ນ, ມີລົດຊາດທີ່ເປັນເອກະລັກສະເພາະທີ່ຜ່ານຂະບວນການຜະລິດທີ່ພິຖີພິຖັນ ເຮັດໃຫ້ໄດ້ເບຍທີ່ມີລົດຊາດນຸ່ມນວນ, ມີກິ່ນຫອມອ່ອນໆຂອງໝາກກ້ວຍ, ເປືອກໝາກກ້ຽງ ແລະໝາກໄມ້ປ່າຊະນິດຕ່າງໆ.

ດັ່ງນັ້ນ, ທາງບໍລິສັດເບຍລາວ ຈຶ່ງຈະສືບຕໍ່ຮັກສາ ເບຍລາວໄວທ໌ ໄວ້ເປັນສ່ວນໜຶ່ງຂອງເບຍລາວຕໍ່ໄປ ແລະຍິ່ງໄປກວ່ານັ້ນ ທາງບໍລິສັດເບຍລາວ ໄດ້ຜະລິດເບຍລາວໄວທ໌ ໃນຮູບແບບແກ້ວໃຫຍ່ ຂະໜາດ 640ມລ ອອກມາຮັບໃຊ້ສັງຄົມ. ສ່ວນເບຍລາວ ຮັອບປີ ແລະເບຍລາວ ແອມເບີ ທາງບໍລິສັດຈະຕໍ່ໄລຍະເວລາໃນການຈໍາໜ່າຍຈົນເຖິງທ້າຍເດືອນ ເມສາ 2019.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ

  • BeerlaoWhite