• ຫຼວງພະບາງ ເລືອກໄດ້ນັກຮຽນເກັ່ງເພື່ອຮ່ວມສອບເສັງໃນລະດັບຊາດ

ໂດຍ: ສີເປື້ອນມື 27 ກຸມພາ 2019 (13.58 ນ.) Read : 162

  ເພື່ອເປັນການທົດສອບຄວາມຮູ້ຄວາມສາມາດຂອງນ້ອງນ້ອຍນັກຮຽນສຶກສາລະບົບສາມັນ ແລະ ເປັນການ ຊຸກຍູ້ສົ່ງເສີມແຜນຍຸດທະສາດການພັດທະນາວຽກງານການສຶກສາ ແລະ ກິລາຂອງກະຊວງສຶກສາທິການ ແລະ ກິລາກໍ່ຄືປະຕິບັດຕາມແນວທາງນະໂຍບາຍໃໝ່ຂອງພັກ-ລັດໃນການພັດທະນາຊັບພະຍາກອນມະນຸດ ໃຫ້ມີຄຸນ ນະພາບຫຍັບເຂົ້າໃກ້ກັບພາກພື້ນ ແລະ ສາກົນໃນເທື່ອລະກ້າວທັງນີ້ກໍ່ເປັນການສົ່ງເສີມຄວາມຮູ້ຂອງຄູ-ອາຈານໃຫ້ ມີປະສິດທິພາບ ແລະ ປະສິດທິຜົນໂດຍເປັນໄປຕາມ 3 ຫຼັກສະນະ, 5 ຫຼັກມູນການສຶກສາ ແລະ ປະຕິບັດ 3 ຂໍ້ແຂ່ງຂັນຂອງ ກະຊວງສຶກສາທິການ ແລະ ກິລາວາງອອກ.

      ເມື່ອວັນທີ 26 ກຸມພາ ຜ່ານມາ ທີ່ສູນໄອຊີທີ( ICT ) ພະແນກສຶກສາທິການ ແລະ ກິລາແຂວງຫຼວງພະບາງໄດ້ຈັດພິທີສອບເສັງນັກຮຽນເກັງຂັ້ນແຂວງ ຊັ້ນປະຖົມ ປ5 ຊັ້ນມັດທະຍົມ ມ4 ແລະ ມ7 ທົ່ວແຂວງ ໂດຍການເປັນປະທານຂອງທ່ານ ນາງບົວທອງ ຕັນແສນສີ ຮອງຫົວໜ້າພະແນກສຶກສາທິການ ແລະ ກິລາແຂວງຫຼວງພະບາງ, ມີ ທ່ານ ວັນທອງ ແພງສະຫວັດ ຫົວໜ້າຂະແໜງມັດທະຍົມສຶກສາ,ຄູ-ອາຈານ,ນ້ອງນັກຮຽນພ້ອມດ້ວຍ ຄະນະຮັບຜິດຊອບການ ສອບເສັງເຂົ້າຮ່ວມຢ່າງພ້ອມພຽງ.

      ການສອບເສັງນັກຮຽນເກັ່ງຂັ້ນແຂວງຊັ້ນປະຖົມ ປ5 ມັດທະຍົມ ມ4 ແລະ ມ7 ໃນລະດັບແຂວງຄັ້ງນີ້ແມ່ນເພື່ອຄັດເລືອກເອົາ ນັກຮຽນຜູ້ທີ່ມີພອນສະຫວັນ ຮຽນເກັ່ງພຽບພ້ອມໄປດ້ວຍຄຸນສົມບັດເພື່ອເປັນຕົວແທນຂອງແຂວງເຂົ້າຮ່ວມ ການສອບເສັງນັກ ຮຽນເກັ່ງລະດັບຊາດ,ການສອບເສັງຄັ້ງນີ້ມີນັກສອບເສັງຕາງໜ້າຈາກ 11 ເມືອງ ແລະ 1 ນະຄອນຫຼວງພະບາງ, ໂຮງຮຽນອ້ອມຂ້າງທີ່ຂື້ນກັບ ພະແນກສຶກສາທິການ ແລະ ກິລາແຂວງ,ມີນັກຮຽນເຂົ້າຮ່ວມສອບເສັງທັງໝົດຈຳນວນ 184 ນ້ອງ,ໃນນັ້ນມີປະຖົມສຶກສາ ປ5 ໃນ 3 ວິຊາຫຼັກຈໍານວນ 36 ນ້ອງ,ມັດທະຍົມສຶກສາ ມ4 ໃນ 4ວິຊາຫຼັກຈໍານວນ 72 ນ້ອງ ແລະ ມ7 ມີ 76 ນ້ອງ,ແບ່ງຫ້ອງສອບເສັງອອກເປັນ 5 ຫ້ອງຄື: ປ5 ຈຳນວນ 1ຫ້ອງ,4 ຈຳນວນ 2 ຫ້ອງ ແລະ ມ7 ມີ 2 ຫ້ອງ.

      ຜ່ານການສອບເສັງຊັ້ນປະຖົມສຶກສາ ປ5 ອັນດັບທີ 1 ວິຊາພາສາລາວ ນາງເພັດມະນີ ວັນນະອິງ ຈາກໂຮງຮຽນປະຖົມ ເທບປັນຍາ ເມືອງນໍ້າບາກ,ວິຊາຄະນິດສາດ ທ້າວ ຫວັງ ລີເນີ ໂຮງຮຽນປະຖົມ ກິ່ວກະຈໍາ ເມືອງຊຽງເງິນ,ວິຊາໂລກອ້ອມຕົວ ນາງພອນອາລີ ເຊັງໄຊລີ ໂຮງຮຽນປະຖົມ SOS ເຮັກມານໄນເນີ, ຊັ້ນມັດທະຍົມຕົ້ນ ມ4 ອັນດັບທີ 1 ວິຊາພາສາລາວ-ວັນນະຄະດີ ນາງແກ້ວດາວ ຈາກໂຮງຮຽນ ມ.ສ ສັນຕິພາບ ນະຄອນຫຼວງພະບາງ,ວິຊາຄະນິດສາດ ທ້າວ ເຕັງຊົ່ງ ຈົ່ງດົວ ໂຮງຮຽນ ມ.ສ ສາມສຸມ ເມືອງວຽງຄຳ, ວິຊາເຄມີສາດ ທ້າວເຢີກື ຈາກໂຮງຮຽນ ມ.ສ ພູຄູນ ເມືອງພູຄູນ ແລະ ວິຊາຟີຊິກສາດ ທ້າວສົມຈັນ ທໍ່ ໂຮງຮຽນ ມ.ສ ເມືອງຮຶບ ເມືອງໂພນທອງ,ສ່ວນມັດທະຍົມຕອນປາຍ ມ7 ອັນດັບທີ 1 ວິຊາພາສາລາວ-ວັນນະຄະດີ ທ້າວບຸນມາ ຄຸນວິໄລ ຈາກໂຮງຮຽນ ມ.ສ ສັນຕິພາບ ນະຄອນຫຼວງພະບາງ,ວິຊາຄະນິດສາດ ທ້າວ ເຊັ່ງທໍ່ ໄຊຕົວ ໂຮງຮຽນ ມ.ສ ສັນຕິພາບ ນະຄອນຫຼວງພະບາງ,ວິຊາເຄມີສາດ ທ້າວ ຈ່າງມົ່ວ ໄຊຈູມົວ ໂຮງຮຽນ ມ.ສ ສັນຕິພາບ ນະຄອນຫຼວງພະບາງ ແລະ ວິຊາຟີຊິກສາດ ທ້າວບຸນແກ້ວ ວ່າເລັງວ້າ ຈາກໂຮງຮຽນ ມ.ສ ສັນຕິພາບ ນະຄອນຫຼວງພະບາງ.


ທີ່ມາ: ແຈັກກີ້ (ພະແນກສຶກສາ ແລະກີລາ ແຂວງ ຫຼວງພະບາງ)
  • ຮູບພາບ

  • ແທັກທີ່ກ່ຽວຂ້ອງ