• ຍົນເອທິໂອເປຍ ຕົກເສຍຊີວິດຍົກລຳ 157 ຄົນ

ໂດຍ: Admin Mahason 12 ມີນາ 2019 (16.43 ນ.) Read : 438

     ສຳນັກຂ່າວເອເອຟພີ ຂອງຕ່າງປະເທດ ໄດ້ລາຍງານຈາກນະຄອນຫລວງ ແອດດິສອາບາບາ ປະເທດເອທິໂອເປຍ, ເມື່ອວັນທີ 10 ມີນາ 2019 ວ່າ ສາຍການບິນເອທິໂອປ້ຽນ ແອລາຍ ຖ້ຽວບິນ ອີທີ 302, ພ້ອມຜູ້ໂດຍສານ 149 ຄົນ ແລະຈຸບິນ 8 ຄົນ, ຈາກເສັ້ນທາງບິນ ນະຄອນຫລວງ ແອດດິສອາບາບາ, ມຸ່ງຫນ້າສູ່ນະຄອນຫລວງໄນໂຣບີ ປະເທດເຄນຢາ ປະສົບອຸບັດຕິເຫດຕົກລະຫວ່າງທາງ ເມື່ອຕອນເຊົ້າວັນອາທິດທີ 10 ມີນາ.

     ຂະນະນີ້ກຳລັງຢູ່ລະຫວ່າງການກວດສອບໃນລາຍລະອຽດຈາກລາຍຊື່ຜູ້ໂດຍສານເທິງເຮືອບິນ, ແລະກຳລັງຢູ່ລະຫວ່າງການຄົ້ນຫາ ແລະກູ້ໄພ ຈຶ່ງຍັງບໍ່ມີລາຍລະອຽດກ່ຽວກັບຜູ້ລອດຊີວິດ, ຫລືຄວາມສູນເສຍໃດໆ ແລະຍັງໄດ້ຕັ້ງສູນຂໍ້ມູນແລະໝາຍເລກຕິດຕໍ່ທາງໂທລະສັບສຳລັບຄອບຄົວຂອງຜູ້ໂດຍສານ, ແລະຈຸບິນທີ່ຢູ່ເທິງເຮືອບິນ ໄດ້ຕິດຕໍ່ສອບຖາມຂໍ້ມູນເພີ່ມຕື່ມ.

     ດ້ານສຳນັກງານນາຍົກລັດຖະມົນຕີ ແຫ່ງເອທິໂອເປຍ ທ່ານ ອາບິຟ ອາເໝັດ, ໄດ້ທະວີດຂໍ້ຄວາມເພື່ອສະແດງຄວາມເສຍໃຈຢ່າງສຸດຊຶ້ງ ໄປຍັງຄອບຄົວຂອງຜູ້ໂດຍສານເທິງເຮືອບິນ, ສຳລັບເຮືອບິນໂດຍສານລຳທີ່ເກີດອຸບັດຕິເຫດ ເປັນເຮືອບິນໂດຍສານໂບອິ້ງ 737-800 MAX , ຮຸ້ນດຽວກັບເຮືອບິນໂດຍສານຂອງສາຍການບິນອິນໂດເນເຊຍ ໄລອ້ອນແອ, ເຊິ່ງປະສົບອຸບັດຕິເຫດຕົກໃນທະເລຊະວາ ເມື່ອເດືອນຕຸລາປີຜ່ານມາ ເຊິ່ງມີຜູ້ເສຍຊີວິດ 189 ຄົນ , ຂໍສະແດງຄວາມເສຍໃຈກັບຜູ້ເສຍຊີວິດໃນເຫດການໃນຄັ້ງນີ້ດ້ວຍ ,


ທີ່ມາ: ຟັງຂ່າວ99
  • ແທັກທີ່ກ່ຽວຂ້ອງ