• ສະຫວັນນະເຂດ ຈັດງານແລ່ນມາລາທອນ

ໂດຍ: ສີເປື້ອນມື 04 ເມສາ 2019 (17.07 ນ.) Read : 81

ໃນຕອນເຊົ້າຂອງວັນທີ 31 ມີນາ 2019 ນີ້, ແຂວງ ສະຫວັນນະເຂດ ຮ່ວມກັບກົງສູນໃຫຍ່ແຫ່ງຣາຊະອານາຈັກໄທປະຈໍາແຂວງສະຫວັນນະເຂດ ໄດ້ຈັດງານແລ່ນມາລາທອນ ສະຫວັນນະເຂດ 2019 ຂຶ້ນ ຢູ່ທີ່ ເດີ່ນພຣະທາດອີງຮັງ ນະຄອນໄກສອນ ພົມວິຫານ ໃຫ້ກຽດເປັນປະທານໃນພິທີໂດຍທ່ານ ສັນຕິພາບ ພົມວິຫານ ເຈົ້າແຂວງ ສະຫວັນນະເຂດ, ທ່ານ ສະຫຍັນ ສິຣິມາດ ຜູ້ວ່າຣາຊະການຈັງຫວັດມຸກດາຫານ, ທ່ານ ວໍຣະວຸດ ພົງປຣະພາພັນ ກົງສູນໃຫຍ່ແຫ່ງຣາຊະອານາຈັກໄທປະຈໍາແຂວງ ພ້ອມດ້ວຍບັນດາ ນັກກີລາຈາກສອງຝັ່ງຂອງລາວ-ໄທ ເຂົ້າຮ່ວມຢ່າງຫຼວງຫຼາຍ.
      ງານແລ່ນມາລາທອນ ສະຫວັນນະເຂດ 2019 ຈັດຂຶ້ນເພື່ອເປັນການສົ່ງເສີມ, ໂຄສະນາ ແລະສະໜັບສະໜູນການກີລາ, ການທ່ອງທ່ຽວຂອງ ແຂວງ ສະຫວັນນະເຂດ ແລະການກຸສົນໄປພ້ອມໆກັນ. ເຊິ່ງກິດຈະກໍາຂອງໂຄງການແລ່ນມາລາທອນໃນຄັ້ງນີ້ ແມ່ນແນໃສ່ເຮັດໃຫ້ປະຊາຊົນພາຍໃນປະເທດ ແລະປະເທດໃກ້ຄຽງ ແລະຊາວຕ່າງປະເທດໃນພາກພື້ນໄດ້ຮັບຮູ້ ແລະມີຄວາມສົນໃຈຢາກມາຮ່ວມ, ມາທ່ອງທ່ຽວ ແຂວງ ສະຫວັນນະເຂດ ໃຫ້ນັບມື້ຫຼາຍຂຶ້ນ, ທັງເປັນການຊຸກຍູ້ການພັດທະນາເສດຖະກິດ-ສັງຄົມໄປຄຽງຄູ່ກັນ. ການແລ່ນມາລາທອນໃນຄັ້ງນີ້ ມີນັກກີລາຈາກທາງຝັ່ງລາວ-ໄທ ເຂົ້າຮ່ວມທັງໝົດເກືອບ 1 ພັນຄົນ, ມີ 3 ໄລຍະທາງ ຄື: ໄລຍະ 5 ກິໂລແມັດ, ໄລຍະ 10 ກິໂລແມັດ ແລະໄລຍະ 30 ກິໂລແມັດ. ພິເສດສໍາລັບໄລຍະ 5 ກິໂລແມັດແມ່ນການນໍາຂອງແຂວງ ໄດ້ເຂົ້າຮ່ວມຂະບວນ, ສ່ວນໄລຍະ 10 ແລະ 30 ກິໂລແມັດແມ່ນມີຜູ້ເຂົ້າແຂ່ງຂັນທັງໝົດ 5 ຮຸ່ນຄື: ຮຸ່ນອາຍຸ 14-29 ປີ, ຮຸ່ນອາຍຸ 30-39 ປີ, ​ຮຸ່ນອາຍຸ 40-49, ​ຮຸ່ນອາຍຸ 50-59 ປີ ແລະຮຸ່ນອາຍຸ 60 ປີຂຶ້ນໄປ; ຜູ້ຊະນະແຕ່ລະຮຸ່ນຈະໄດ້ຮັບຂັນລາງຈາກທ່ານເຈົ້າແຂວງໆ ສະຫວັນນະເຂດ ແລະຜູ້ວ່າ​ຣາຊະການຈັງຫວັດມຸກດາຫານ. ພິເສດສໍາລັບຜູ້ທີ່ເຂົ້າເສັ້ນໄຊເປັນຄົນທໍາອິດທັງຍິງ ແລະຊາຍໃນໄລຍະທາງ 30 ກິໂລແມັດແມ່ນໄດ້ ຮັບເງິນປະກັນໄພອຸບັດຕິເຫດ ຜູ້ລະ 50 ລ້ານກີບ ຈາກບໍລິສັດ ທິບພະຍະປະກັນໄພ. ສ່ວນ ລາຍຮັບຈາກກິດຈະກໍາຄັ້ງນີ້ ແມ່ນຈະນໍາໄປສົມທົບທຶນບູລະນະ ແລະກໍ່ສ້າງກຸດຕິທີ່ຢູ່ວັດ ໜອງລໍາຈັນ ເມືອງ ຈໍາພອນແຂວງ ສະຫວັນນະເຂດ.


ທີ່ມາ: ສະຫວັນພັດທະນາ ຂ່າວ / Savanhphuttana News
  • ຮູບພາບ

  • ແທັກທີ່ກ່ຽວຂ້ອງ