• “ໜຶ່ງແລວໜຶ່ງເສັ້ນທາງ” ຈະສົ່ງຜົນຕໍ່ ບໍ່ເຕັນ ແນວໃດ?

ໂດຍ: ສີເປື້ອນມື 26 ເມສາ 2019 (14.48 ນ.) Read : 436

ຈາກ​ບ້ານ​ນ້ອຍ​ທາງ​ຊາຍ​ແດນ ຫັນ​ເປັນ​ດ່ານ​ເຂົ້າ​ອອກ​ເມືອງ​ທາງ​ບົກ​ລະ​ດັບ​ຊາດ​ພຽງ​ແຫ່ງ​ດຽວ​ລະ​ຫວ່າງ​ລາວ​-ຈີນ, ຈົນ​ຮອດ​ການ​ສ້າງ​ເຂດ​ຮ່ວມ​ມື​ເສດ​ຖະ​ກິດ​ຂ້າມ​ຊາດ​ລາວ-​ຈີນ, ໂດຍ​ຄຽງ​ຄູ່​ກັບ​ຄວາມ​ຄືບ​ໜ້າ​ຂອງ​ຂໍ້​ລິ​ເລີ່ມ ໜຶ່ງ​ແລວ​ໜຶ່ງ​ເສັ້ນ​ທາງແລະ​ການ​ຮ່ວມ​ມື​ຂອງ​ສອງ​ປະ​ເທດ​ລາວ​-ຈີນ​ກ້າວ​ສູ່​ລວງ​ເລິກ​ຢ່າງ​ບໍ່​ຢຸດ​ຢັ້ງ. ເມືອງ ບໍ່​ເຕັນ ແຂວງ ຫຼວງນໍ້າທາ ​ປະ​ເທດ​ລາວ ​ພວມ​ກາຍ​ເປັນ​ເຂດ​ທີ່​ໄດ້​ຮັບ​ຄວາມ​ສົນ​ໃຈຫຼາຍ ​ແລະຈະຄ່ອຍໆ​ຫັນ​ຈາກ​ບ້ານ​ນ້ອຍ​ໆ​ກາຍ​ເປັນ​ເມືອງ​ໃໝ່​ແບບ​ທັນ​ສະ​ໄໝ​ລຽບ​ຕາມ ໜຶ່ງ​ແລວ​ໜຶ່ງ​ເສັ້ນ​ທາງ”.

ເມື່ອ​ເວົ້າ​ເຖິງ​ບໍ່​ເຕັນ, ມີ​ເນື້ອ​ທີ່​ທັງ​ໝົດ 34,3 ກິ​ໂລ​ຕາ​ແມັດ, ໃນ​ປີ 2009, ລັດ​ຖະ​ບານ​ລາວ​ໄດ້​ສ້າງ​ຕັ້ງ​ເຂດ​ເສດ​ຖະ​ກິດ​ພິ​ເສດ​ບໍ່​ເຕັນ ເຊິ່ງ​ບຸກ​ເບີກ​ເນື້ອ​ທີ່ 16,4 ກິ​ໂລ​ຕາ​ແມັ​ດ; ກົງ​ກັນ​ຂ້າມ, ບໍ່​ເຕັນ​ກໍ​ມີ​ຄວາມ​ສຳ​ຄັນຫຼາຍ ເພາະ​ເປັນ​ດ່ານ​ເຂົ້າ​ອອກ​ເມືອງ​ທີ່​ສຳ​ຄັນ​ຂອງ​ທາງຫຼວງ​ຄຸນ​ໝິງ-ບາງກອກ​ຢູ່​ດິນ​ແດນ​ປະ​ເທດ​ລາວ, ເປັນ​ສະ​ຖາ​ນີ​ທຳ​ອິດ​ຂອງ​ເສັ້ນ​ທາງ​ລົດ​ໄຟ​ລາວ​ຈີນ​ເຂົ້າ​ສູ່​ດິນ​ແດນ​ປະ​ເທດ​ລາວ, ກໍ​ເປັນ​ດ່ານ​ສຳ​ຄັນ​ຂອງ​ທາງ​ລົດ​ໄຟ​ພາກ​ພື້ນ​ອາ​ຊີ​ຈາກ​ຈີນ​ເຂົ້າ​ສູ່​ອາ​ຊີ​ຕາ​ເວັນ​ອອກ​ສຽງ​ໃຕ້, ເປັນ​ຊຸ​ມ​ທາງ​ຄົມ​ມະ​ນາ​ຄົມ​ອັນ​ສຳ​ຄັນ​ທີ່​ເຊື່ອມ​ຕໍ່​ຈີນ ແລະ​ອ​າຊຽນ ​ໃນດ້ານ​ການ​ຂົນ​ສົ່ງ​ສິນ​ຄ້າ​ທາງ​ບົກ ແລະການ​ທ່ອງ​ທ່ຽວ​ຂ້າມ​ຊາດ, ທັງ​ເປັນເຂດ​ເຕົ້າ​ໂຮມ​ອຸດ​ສາ​ຫະ​ກຳ​ສຳ​ຄັນຫຼາຍ​ຢ່າງ. ສະ​ຖິ​ຕິ​ຂອງ​ດ່ານ​ພາ​ສີ​ບໍ່​ເຕັນ​ສະ​ແດງ​ໃຫ້​ເຫັນ​ວ່າ, ແຕ່​ປີ 2015 ຫາ ປີ2018, ຈຳ​ນວນ​ຄົນ ແລະລົດ​ທີ່​ເຂົ້າ​ອອກ​ເມືອງ​ຜ່ານ​ດ່ານ​ບໍ່​ເຕັນ​ໄດ້​ເພີ່ມ​ຂຶ້ນ​ທຸກ​ປີ, ​ສະ​ເລ່ຍ​ແລ້ວ​ຈຳ​ນວນ​ຄົນ​ຜ່ານ​ດ່ານ​ໄດ້​ເພີ່ມ​ຂຶ້ນ 20% ຕໍ່​ປີ ແລະຈຳ​ນວນ​ລົດ​ຜ່ານ​ດ່ານ​ເພີ່ມ​ຂຶ້ນ 34% ຕໍ່​ປີ.

ທ້າວ​ ໄມ​ຄຳ​ແພງ ​ມາ​ຈາກ ​ແຂວງ ຫຼວງ​ນ້ຳ​ທາ, ປະ​ຈຸ​ບັນ​ເປັນ​ຜູ້​​ຈັດ​ການຂອງ​ບໍ​ລິ​ສັດ ​ສີ​ມອນ​ ຂາ​ເຂົ້າ-ຂາ​ອອກ ​ໄດ້ກ່າວ​ວ່າ: ໄດ້​ເຫັນ​ບໍ່​ເຕັນ​ໄດ້​ມີ​ເງື່ອນ​ໄຂ​ອຳ​ນວຍ​ຄວາມ​ສະ​ດວກຫຼາຍ​ຢ່າງ. ໃນປີ 2018 ພວກ​ເຮົາ​ກໍ​ໄດ້​ຮ່ວມ​ຮຸ້ນ​ສ່ວນ​ກັບ​ນັກ​ທຸ​ລະ​ກິດ​ຈີນ​ສ້າງ​ບໍ​ລິ​ສັດ​ຢູ່​ບໍ່​ເຕັນ, ຕົ້ນ​ຕໍແມ່ນ​ໃຫ້​ການ​ບໍ​ລິ​ການ​ດ້ານ​ເດີ່ນ​ຈອດ​ລົດ, ຂ້າ​ເຊື້ອ ແລະ​ຊ່ວຍ​ແຈ້ງ​ດ່ານ​ໃຫ້​ແກ່​ຜະ​ລິດ​ຕະ​ພັນ​ກະ​ສິ​ກຳ​ທີ່​ຈະ​ສົ່ງ​ອອກ ​ໄດ້ອຳ​ນວຍ​ຄວາມ​​ສະ​ດວກ​ໃຫ້​ແກ່​ນັກ​ທຸ​ລະ​ກິດ​ທີ່​ດຳ​ເນີນ​ການ​ຄ້າ ​ຂາ​ເຂົ້າ​-ຂາ​ອອກ​ ໄດ້ຫຼາຍ​ຢ່າງ.

ຢູ່​ເຂດ​ເສດ​ຖະ​ກິດ​ພິ​ເສດ​ບໍ່​ເຕັນ​ແບ່ງ​ອອກ​ເປັນ 4 ເຂດ​ໃຫຍ່, ຄື: ເຂດ​ການ​ຄ້າ ແລະການ​ທະ​ນາ​ຄານ​ສາ​ກົນ, ເຂດ​ທ່ອງ​ທ່ຽວ, ເຂດ​ບໍ​ລິ​ການ​ສຶກ​ສາ ແລະປິ່ນ​ປົວ, ເຂດ​ຈໍ​ລະ​ຈອນ​ສິນ​ຄ້າ ແລະປຸງ​ແຕ່ງ. ໃນ​ອະ​ນ​ຄົດ, ບໍ່​ເຕັນ​ຈະພັດ​ທະ​ນາ​ຂະ​ແໜງ​ການ​ວັດ​ທະ​ນ​ະ​ທຳ ແລະທ່ອງ​ທ່ຽວ​ເປັນ​ບຸ​ລິ​ມະ​ສິດ, ພັດ​ທະ​ນາ​ການ​ຄ້າ​ປອດ​ພາ​ສີ ການ​ຈໍ​ລະ​ຈອນ​ສິນ​ຄ້າ ແລະການ​ປຸງ​ແຕ່ງ​ເປັນ​ຂະ​ແໜງ​ການ​ໃຈ​ກາງ ແລະພັດ​ທະ​ນາ​ຂະ​ແໜງ​ການ​ບໍ​ລິ​ການ​ດ້ານ​ການສຶກ​ສາ ແລະປິ່ນ​ປົວ​ເປັນ​ຂະ​ແໜງ​ການ​ແບບ​ຍືນ​ຍົງ.

ທ່ານ ​ຄ່າງ​ເພີງ ຜູ້​ຮັບ​ຜິດ​ຊອບ​ວຽກ​ດຶງ​ດູດ​ການ​ລົງ​ທຶນຄະ​ນະ​ກຳ​ມະ​ການ​ຄຸ້ມ​ຄອງ​ ເຂດ​ເສດ​ຖະ​ກິດ​ພິ​ເສດ​ບໍ່​ເຕັນ​ລາວ​ ໄດ້ກ່າວ​ວ່າ: ເຖິງວ່າ​ຍັງ​ຢູ່​ໃນ​ຂັ້ນ​ເບື້ອງ​ຕົ້ນ​ຂອງ​ການ​ພັດ​ທະ​ນາ, ແຕ່​ປັດຈຸ​ບັນ​ໄດ້​ສ້າງ​ໂອ​ກາດ​ວຽກ​ເຮັດ​ງານ​ທຳ​ໃຫ້​ແກ່​ປະ​ຊາ​ຊົນ​ບໍ່​ເຕັນ​ປະ​ມານ 1000 ຕໍາ​ແໜ່ງ​ແລ້ວ, ນອກ​ນັ້ນ​ຍັງ​ສົ່ງ​ເສີມ​ໃຫ້​ປະ​ຊາ​ຊົນ​ດຳ​ເນີນ​ການ​ຄ້າ​ຂາຍ​ຕາມ​ຊາຍ​ແດນ ແລະ​ການ​ບໍ​ລິ​ການ​ທ່ອງ​ທ່ຽວ​ເປັນ​ຕົ້ນ ໄດ້​ສ້າງ​ລາຍ​ຮັບ​ໃຫ້​ແກ່​ຄອບ​ຄົວຫຼາຍ​ຂຶ້ນ. ສິ່ງ​ສຳ​ຄັນ​ກວ່າ​ນັ້ນ ຄືພໍ່ແມ່​ປະ​ຊາ​ຊົນ​ເຫັນ​ການ​ພັດ​ທະ​ນາ​ຂອງ​ເຂດ​ເສດ​ຖະ​ກິດ​ພິ​ເສດ​ບໍ່​ເຕັນ​ແລ້ວ ຈະ​ປ່ຽນ​ແປງ​ແນວ​ຄິດ​ໃນ​ເມື່ອ​ກ່ອນ ແລະ​ຈະ​ບັນ​ດານ​ແນວ​ຄິດ​ໃຫ້​ກວ້າງ​ອອກ​ໃນ​ການ​ດຳ​ເນີນ​ທຸ​ລະ​ກິດ.

ທ່ານ​ ຄ່າງ​ເພີງ ​ໃຫ້​ຮູ້​ວ່າ: ປັດຈຸ​ບັນ ຢູ່​ເຂດ​ເສດ​ຖະ​ກິ​ດ​ພິ​ເສດ​ບໍ່​ເຕັນ​ ໄດ້​ມີ​ບໍ​ລິ​ສັດ​ລົງ​ທະ​ບຽນ​ທັງ​ໝົດ 148 ແຫ່ງ, ມີ​ທຸ​ລະ​ກິດ​ເອ​ກະ​ຊົນ 171 ແຫ່ງ, ທຶນ​ລົງ​ທະ​ບຽນ​ມີ ເງິນຢວນ 725 ລ້ານກວ່າ​ຢວນ, 21 ລ້ານກວ່າ​ໂດ​ລາ​ສະ​ຫະ​ລັດ ແລະ255 ຕື້ກວ່າ​ກີບ.

ເມື່ອ​ເວົ້າ​ເຖິງ​ອະ​ນາ​ຄົດ​ຂອງ​ບໍ່​ເຕັນ, ທ່ານ​ ຄ່າງ​ເພີງ​ ເຂດ​ເສດ​ຖະ​ກິດ​ພິ​ເສດ​ບໍ່​ເຕັນ​ຈະ​ກາຍ​ເປັນ​ໃຈ​ກາງ​ເສດ​ຖະ​ກິດ​ຢູ່​ພາກ​ເໜືອ​ຂອງ​ປະ​ເທດ​ລາວ​ ທີ່​ມີ​ປະ​ຊາ​ກອນ​ເຖິງ 3 ແສນ​ຄົນ ແລະ​ຈະ​ກາຍ​ເປັນ​ເຂດ​ການ​ຄ້າ​ເສ​ລີ​ສາ​ກົນ​ທີ່​ຈະ​ເລີນ​ໃໝ່ ພ້ອມທັງ​ເປັນ​ແດນ​ສະ​ຫວັນ​ສຳ​ລັ​ບ​ການ​ຊື້​ສິນ​ຄ້າ​ປອດ​ພາ​ສີ ແລະການ​ທ່ອງ​ທ່ຽວ​ ໃຫ້ສົມ​ຊື່​ເປັນ​ເມືອງ​ໃໝ່​ແບບ​ທັນ​ສະ​ໄໝ​ລຽບ​ຕາມ ໜຶ່ງ​ແລວ​ໜຶ່ງ​ເສັ້ນ​ທາງ”.


ທີ່ມາ: ABC Laos news ສຳນັກຂ່າວເອບີຊີລາວ
  • ຮູບພາບ

  • ແທັກທີ່ກ່ຽວຂ້ອງ