• ສະຖານທູດໄທ ຮ່ວມກັບ ເອັດສຊີຈີ ຈັດໂຄງການຮັກສາ ສຸຂະພາບແຂ້ວແກ່ ພຣະສົງ ແລະສໍາມະເນນໃນລາວ ຟຣີ!

ໂດຍ: Admin Mahason 06 ມິຖຸນາ 2019 (14.49 ນ.) Read : 159

ສະຖານເອກອັກຄະຣາຊະທູດໄທ ປະຈໍານະຄອນຫຼວງວຽງຈັນ ສປປ ລາວ ຮ່ວມກັບ ເອັດສຊີຈີ ເຊິ່ງເປັນອົງກອນຊັ້ນນໍາທີ່ມຸ້ງສ້າງຄວາມຍືນຍົງໃນອາຊຽນ ຮ່ວມກັນຈັດກິດຈະກໍາກວດສຸຂະພາບ ແລະ ຮັກສາແຂ້ວໃຫ້ແກ່ພຣະສົງ ແລະສໍາມະເນນຫຼາຍກວ່າ 999 ອົງ ເພື່ອຖວາຍເປັນພຣະຣາດຊະກຸສົນ ເນື່ອງໃນພຣະຣາດຊະພິທີບໍຣົມຣາຊາພິເສກພຣະບາດສົມເດັດພຣະປະຣະເມນທະຣະຣາມາທິບບໍດີສີສິນມະຫາວະຊິຣາລົງກອນ ພຣະວະຊິຣະເກົ້າເຈົ້າຢູ່ຫົວ ຣາດຊະການທີ 10 ແລະສະເຫຼີມສະຫຼອງວັນຄ້າຍວັນເກີດຂອງພຣະລາຊິນີ ປະຈໍາປີ 2019 ໂດຍມີຄະນະທັນຕະແພດ ຈາກໜ່ວຍທັນຕະກໍາພຣະຣາດຊະທານ ຄະນະແພດສາດ ຈຸລາລົງກອນມະຫາວິທະຍາໄລພ້ອມເຈົ້າໜ້າທີ່ສະໜັບສະໜູນຫຼາຍກວ່າ 70 ຄົນ ມາໃຫ້ບໍລິການໃນວັນທີ 5 ແລະ6 ມິຖຸນາ 2019 ທີ່ວັດອົງຕື້ມະຫາວິຫານ ນະຄອນຫຼວງວຽງຈັນ.

      ທ່ານ ກຽດຕິຄຸນ ຊາດປະເສີດ ເອກອັກຄະຣາຊະທູດໄທ ປະຈໍານະຄອນຫຼວງວຽງຈັນ ໄດ້ກ່າວວ່າ: ການບໍລິການທັນຕະກໍາໃນຄັ້ງນີ້ຈັດຂຶ້ນເນື່ອງໃນໂອກາດ ພຣະຣາດຊະພິທີບໍຣົມຣາຊາພິເສກ 2019 ແລະ ສະເຫຼີມສະຫຼອງວັນຄ້າຍວັນເກີດຂອງພຣະລາຊິນີ ປະຈໍາປີ 2019 ໂດຍເປັນຄວາມຮ່ວມມືລະຫວ່າງ ສະຖານເອກອັກຄະຣາຊະທູດໄທ ປະຈໍານະຄອນຫຼວງວຽງຈັນ ຄະນະທັນຕະແພດສາດ ຈຸລາລົງກອນມະຫາວິທະຍາໄລ ແລະວິທະຍາໄລສົງອົງຕື້ /ວັດອົງຕື້ມະຫາວິຫານ ແລະນັບເປັນຄັ້ງທໍາອິດທີ່ມີການອອກໜ່ວຍທັນຕະກໍາເຄື່ອນທີ່ຂອງໄທຖວາຍແກ່ພຣະສົງ ແລະສໍາມະເນນລາວ ແລະຍັງເປັນການສົ່ງເສີມຄວາມຮ່ວມມືດ້ານສາທາລະນະສຸກໄທ-ລາວ.

      ທ່ານ ນິທິ ພັດທະຣະໂຊກ, President ທຸລະກິດຊີມັງ ແລະຜະລິດຕະພັນກໍ່ສ້າງ ເອັດສຊີຈີ ໄດ້ກ່າວວ່າ: ການມີສຸຂະພາບທີ່ດີ ເປັນປັດໄຈພື້ນຖານໃນການດໍາລົງຊີວິດ ທາງເອັດສຊີຈີ ເຫັນເຖິງຄວາມສຳຄັນໃນການພັດທະນາຄຸນນະພາບຊີວິດ ເພື່ອນໍາໄປສູ່ການພັດທະນາຢ່າງຍືນຍົງ ທາງດ້ານສັງຄົມ ແລະວັດທະນະທໍາ ກິດຈະກໍາໃນຄັ້ງນີ້ ຈະເປັນການຊ່ວຍຫຼຸດບັນຫາສຸຂະພາບທີ່ເກີດຂຶ້ນແກ່ພຣະສົງ ຊ່ວຍໃຫ້ພຣະສົງສາມາດປະຕິບັດກິດ ແລະສືບທອດພຸດທະສາສະໜາຕໍ່ໄປໄດ້ແບບຍືນຍົງ.

ກິດຈະກໍາຄັ້ງນີ້ ເກີດຂຶ້ນຍ້ອນການຮ່ວມມືຂອງຫຼາຍພາກສ່ວນ ທັງສະຖານເອກອັກຄະຣາຊະທູດໄທ ຢູ່ນະຄອນຫຼວງວຽງຈັນ, ຜູ້ປະກອບການໄທໃນ ສປປ ລາວ, ຄະນະທັນຕະແພດ ແລະເຈົ້າໜ້າທີ່ສະໜັບສະໜູນ ໂດຍຍິນດີທີ່ໄດ້ເຫັນທຸກຄົນຮ່ວມເປັນຈິດອາສາ ເຮັດຄວາມດີຕາມແນວທາງພຣະຣາດຊະດໍາຣິ ມີຄວາມສາມັກຄີປອງດອງ ຮ່ວມແຮງ ຮ່ວມໃຈປະກອບກິດຈະກໍາສາທາລະນະເພື່ອປະໂຫຍດສຸກຂອງສ່ວນລວມ ໂດຍບໍ່ຫວັງສິ່ງຕອບແທນ ແລະ ຍັງໄດ້ນັກສຶກສາທຶນມະຫາວິທະຍາໄລຈາກໂຄງການ SCG Sharing the Dream ມາເປັນອາສາສະໝັກຮ່ວມກິດຈະກໍາອີກດ້ວຍ ນອກຈາກນີ້ ຂໍຂອບໃຈມາຍັງພຣະອາຈານໃຫຍ່ ປອ. ພວງປະເສີດ ພູມມາວົງ ຜູ້ອໍານວຍການ ວິທະຍາໄລສົງວັດອົງຕື້ ແລະເຈົ້າອາວາດວັດອົງຕື້ມະຫາວິຫານ ທີ່ອະນຸຍາດໃຫ້ໃຊ້ສະຖານທີ່ຂອງວັດ ແລະອໍານວຍຄວາມສະດວກໃນການຈັດກິດຈະກໍາ.

      ນອກຈາກນີ້ ເອັດສຊີຈີ ໄດ້ມອບເງິນຈໍານວນ 850,000 ບາດ ເພື່ອເປັນຄ່າອຸປະກອນການແພດ ແລະການຈັດໂຄງການກິດຈະກໍາ ແລະຄາດວ່າຈະມີພຣະພິຂຸສົງ ແລະສໍາມະເນນຈາກທົ່ວນະຄອນຫຼວງວຽງຈັນ ເດີນທາງມາຮັບບໍລິການຮັກສາທາງທັນຕະກໍາຫຼາຍກວ່າ 999 ອົງ ເຊິ່ງ ເອັດສຊີຈີ ຫວັງວ່າຜົນສໍາເລັດຈາກຄວາມຮ່ວມມືຄັ້ງນີ້ ຈະເປັນສ່ວນໜຶ່ງໃນການສົ່ງເສີມໃຫ້ພາກເອກກະຊົນໄທຮ່ວມມືກັນຈັດກິດຈະກໍາເພື່ອສັງຄົມ ສປປ ລາວ ໃນດ້ານຕ່າງໆ ເພີ່ມຂຶ້ນຕໍ່ເນື່ອງແບບຍືນຍົງໃນອະນາຄົດ.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ

  • SCG