• ອັດສະຈັນ ຖຳ້ຈອມອອງ ເມືອງໄຊ ແຂວງອຸດົມໄຊ

ໂດຍ: Admin Mahason 28 ມິຖຸນາ 2019 (10.00 ນ.) Read : 1,322

     ອຸດົມໄຊ ເປັນແຂວງໜຶ່ງທີ່ອຸດົມສົມບູນໄປດ້ວຍສະຖານທີ່ທ່ອງທ່ຽວທີ່ສວຍສົດງົດງາມຫຼາຍແຫ່ງ ເຊິ່ງມີທັງແຫຼ່ງທ່ອງທ່ຽວທາງທໍາມະຊາດ, ປະຫວັດສາດ ແລະວັດທະນະທໍາ. “ຖຳ້ຈອມອອງ” ເປັນສະຖານທີ່ທ່ອງທ່ຽວທໍາມະຊາດທີ່ສວຍງາມ ບັນຍາກາດພາຍໃນຖໍ້າ ຄ້າຍຄືກັບມະນຸດເຮົາຕົກແຕ່ງຂຶ້ນ.
     ຖຳ້ຈອມອອງ ໄດ້ຖືກຄົ້ນພົບໃນປີ 2005 ແລະເປີດບໍລິການໃຫ້ທ່ຽວຊົມ ໃນປີ 2007. ຖໍ້າຈອມອອງ ແມ່ນເອີ້ນຕາມຊື່ຂອງບ້ານ, ເມື່ອກ່ອນຖໍ້ານີ້ຖືກເອີ້ນວ່າ: “ຖໍ້າເຈຍ ຫຼືຖໍ້າຂີ້ເຈຍ” ຍ້ອນສະໄໝກ່ອນ ມີໂຕເຈຍມາອາໄສຢູ່ເປັນຈຳນວນຫຼວງຫຼາຍ, ປະຊາຊົນເຂດ ບ້ານ ຈອມອອງ ໄດ້ພາກັນຂຸດເອົາຂີ້ໂຕເຈຍຢູ່ໃນຖຳ້ມາເຮັດໝື້ປືນແກັບ. ດັ່ງນັ້ນ, ປະຊາຊົນເຂດຈອມອອງ ຈຶ່ງໄດ້ພາກັນເອີ້ນຊື່ຂອງຖຳ້ນີ້ວ່າ: ຖໍ້າເຈຍ ຫຼືຖໍ້າຂີ້ເຈຍ. ແຕ່ທາງພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວ ໄດ້ປ່ຽນຊື່ໃໝ່ໂດຍໃສ່ຊື່ວ່າ: ຖຳ້ຈອມອອງŽ ຕາມຊື່ຂອງບ້ານມາຈົນເຖິງປັດຈຸບັນນີ້.
     ຖຳ້ຈອມອອງ ຕັ້ງຢູ່ບ້ານ ຈອມອອງ ເມືອງ ໄຊ ແຂວງ ອຸດົມໄຊ ຫ່າງຈາກເທດສະບານ ເມືອງປະມານ 45  ກິໂລແມັດ ໄປທາງແຂວງ ຫຼວງນຳ້ທາ, 24 ກິໂລແມັດ ເປັນທາງປູຢາງ, ແຍກເຂົ້າເໜືອບ້ານ ນຳ້ບໍ່ຕາ ປະມານ 21 ກິໂລແມັດ ເປັນທາງດິນແດງ ຈາກບ້ານຈອມອອງສາມາດເຂົ້າເຖິງໄດ້ 2 ທາງຄື: ຍ່າງລັດແຕ່ບ້ານ ຜ່ານທົ່ງນາໄປຫາຖໍ້າ 2 ກິໂລແມັດ ແລະທາງລົດເຂົ້າຮອດ (ທາງດິນແດງ). ຖຳ້ຈອມອອງ ຕັ້ງຢູ່ຫ່າງຈາກບ້ານ ຈອມອອງ ປະມານ  3 ກິໂລແມັດ, ເປັນເສັ້ນທາງລົດສາມາດແລ່ນເຂົ້າເຖິງບໍລິເວນຖຳ້.
     ຖໍ້າຈອມອອງເປັນຖຳ້ໃຫຍ່, ຍາວ ແລະສວຍງາມທີ່ສຸດຂອງແຂວງ ອຸດົມໄຊ ເຊິ່ງປະກອບດ້ວຍລະບົບນິເວດທຳມະຊາດທີ່ອັດສະຈັນ ແລະມີຫຼາຍຊ່ອງທາງເຂົ້າ-ອອກພາຍໃນຖຳ້. ຖໍ້າມີຄວາມເລິກປະມານ 16 ກວ່າກິໂລແມັດ, ຄວາມກວ້າງ ປະມານ 15-50 ແມັດ ແລະຄວາມສູງປະມານ 25-100 ແມັດ. ຢູ່ໃນຖຳ້ບາງບ່ອນມີສາຍນຳ້ໄຫຼຜ່ານ, ມີນົມຜາ, ຫີນຍ້ອຍທີ່ມີລວດລາຍສວຍງາມ, ຫີນແກ້ວ ເປັນສີຂາວເຫຼື້ອມຄືກັບເພັດພອຍເປັນກ້ອນໃຫຍ່ ປະດັບປະດາຫ້ອຍຢູ່ຕາມຝາຫີນຄືກັບດອກໄຟປະດັບຢ່າງສວຍງາມ. ຢູ່ໃນຖຳ້ຍັງເປັນລັກສະນະເດີມທີ່ຍັງບໍ່ໄດ້ຮັບການດັດແປງແຕ່ຢ່າງໃດ.
     ຖຳ້ນີ້ໄດ້ຜ່ານການສຳຫຼວດຂອງນັກວິທະສາດຈາກສະຫະພັນເອີລົບ ໃນປີ 2009 ແລະໃນປີ 2010 ໄດ້ສຳຫຼວດ 4 ປີ ເປັນຖຳ້ໃຫຍ່ລະດັບຊາດ, ASEAN ແລະລະດັບໂລກ. ລັດຖະບານແຫ່ງ ສປປ ລາວ ໄດ້ຮັບທຶນຈາກທະນາຄານພັດທະນາອາຊີ (ADB) ໃຫ້ທຶນຊ່ວຍເຫຼືອ ເພື່ອພັດທະນາເສັ້ນທາງ ແລະສິ່ງອຳນວຍຄວາມສະດວກຕ່າງໆ ໃຫ້ແກ່ນັກທ່ອງທ່ຽວທີ່ເຂົ້າໄປທ່ຽວຊົມຖໍ້າດັ່ງກ່າວ.


ທີ່ມາ: ສະຫະພັນແມ່ຍິງລາວ

  • ຮູບພາບ

  • ແທັກທີ່ກ່ຽວຂ້ອງ