• ຜາທໍ່ໜໍ່ຄໍາ ແຫຼ່ງທ່ອງທ່ຽວທຳມະຊາດທີ່ໜ້າຄົ້ນຫາ

ໂດຍ: Admin Mahason 13 ພະຈິກ 2019 (11.48 ນ.) Read : 722

     ຜາທໍ່ໜໍ່ຄໍາ ເປັນສະຖານທີ່ທ່ອງທ່ຽວທາງທໍາມະຊາດແຫ່ງໜຶ່ງ ທີ່ມີທິວທັດທໍາມະຊາດອ້ອມຂ້າງສວຍສົດງົດງາມ, ເຕັມໄປດ້ວຍຕົ້ນໄມ້ນ້ອຍ-ໃຫຍ່ຂຽວສົດໃສ ຫຼາກຫຼາຍຊະນິດປົກຄຸມພື້ນທີ່ ແລະມີສັດສາວ່າສິ່ງຫຼາຍຊະນິດ ເຊິ່ງໂຕຜາມີລັກສະນະແປກຕາບໍ່ຄືຜາບ່ອນອື່ນ ນັບວ່າເປັນແຫຼ່ງທ່ອງທ່ຽວທີ່ມະຫັດສະຈັນ ແລະມີຄວາມເລິກລັບໜ້າຄົ້ນຫາ.
     ຜາທໍ່ໜໍ່ຄໍາ ຕັ້ງຢູ່ຍ້ານ ນາທົ່ວ ເມືອງ ເຟືອງ ແຂວງ ວຽງຈັນ ຫ່າງຈາກເທດສະບານເມືອງ ປະມານ 3,5 ກິໂລແມັດ. ຜາດັ່ງກ່າວເປັນຜາທີ່ແປກປະຫຼາດ, ມີທິວທັດທໍາມະຊາດທີ່ໜ້າມະຫັດສະຈັນຢູ່ບ່ອນຮ່ອມຜາລະຫວ່າງຜາສອງເບື້ອງຕິດກັນ, ເປັນຊັບສົມບັດອັນລໍ້າຄ່າ, ເລິກລັບ ແລະມະຫັດສະຈັນ ຄື: “ໜໍ່ຄໍາ”. ນອກນັ້ນ, ຜາທໍ່ໜໍ່ຄໍາ ເປັນຜາຫີນປູນ ຕັ້ງໂດດ່ຽວສະຫງ່າຢູ່ໃຈກາງເມືອງ, ມີຄວາມສູງຈາກລະດັບໜ້ານໍ້າທະເລປະມານ 700 ແມັດ ແລະເປັນເອກະລັກທີ່ບົ່ງບອກເຖິງຮູບຮ່າງສັນຖານຂອງເມືອງ ເຟືອງ.
     ນອກຈາກຈະເປັນເອກະລັກຂອງເມືອງແລ້ວ ຍັງໄດ້ເຊື່ອງຊ້ອນຄວາມເລິກລັບທີ່ຍັງບໍ່ທັນມີໃຜຮູ້. ໜ້າຜາທີ່ສູງຊັນນັ້ນ ຖ້າເຮົາແນມຂຶ້ນໄປຈະເຫັນແສງປະກາຍສີຄໍາຢູ່ຫຼາຍຈຸດ ແຕ່ມີຈຸດໜຶ່ງຈຸດດຽວເທົ່ານັ້ນທີ່ເຫັນແສງນັ້ນ ເດັ່ນປະກາຍກວ່າຈຸດອື່ນໆ. ປະຊາຊົນໃນພື້ນທີ່ເຊື່ອກັນວ່າແສງນັ້ນແມ່ນແສງຂອງຄໍາທີ່ມີຄຸນຄ່າມະຫາສານ ພວກເຂົາຮຽກຈຸດດັ່ງກ່າວວ່າ: “ໜໍ່ຄໍາ” ຍ້ອນມີລັກສະນະເປັນທ່ອນກົມແຍກເປັນ 2 ຍອດ ນັ້ນເປັນທີ່ມາຂອງ “ຜາທໍ່ໜໍ່ຄໍາ” ຫຼາຍຄັ້ງມີບາງກຸ່ມຄົນພະຍາຍາມປີນໄຕ່ຂຶ້ນໄປເອົາໜໍ່ຄໍາ ແຕ່ຕ້ອງພົບກັບສິ່ງເລິກລັບເຊິ່ງນໍາມາໄດ້ແກ່ ຄວາມຫາຍະນະ.
     ສະຖານທີ່ທ່ອງທ່ຽວທີ່ຫຼາຍຄົນເຊື່ອກັນວ່າ ມັນມີຄວາມເລິກລັບ ແມ່ນຢູ່ພາຍໃຕ້ການຄຸ້ມຄອງຂອງບ້ານ ເຊິ່ງໃນຂະນະນີ້ແມ່ນກໍາລັງຢູ່ໃນຂັ້ນຕອນຂອງການລະດົມທຶນ ເພື່ອນໍາມາພັດທະນາ ແລະເຖິງວ່າຈະບໍ່ທັນໄດ້ຮັບການປະກາດເປັນແຫຼ່ງທ່ອງທ່ຽວຢ່າງເປັນທາງການ ແຕ່ປັດຈຸບັນສະຖານທີ່ທ່ອງທ່ຽວແຫ່ງດັ່ງກ່າວ ກໍໄດ້ມີບັນດານັກທ່ອງທ່ຽວທັງພາຍໃນ ແລະຈາກຕ່າງປະເທດ ໃຫ້ຄວາມສົນໃຈໄປທ່ຽວຊົມເປັນຈໍານວນຫຼວງຫຼາຍໃນແຕ່ລະວັນ ໂດຍສະເພາະແມ່ນໃນຊ່ວງວັນບຸນເທດສະການຕ່າງໆ.
     ສໍາລັບທ່ານໃດທີ່ສົນໃຈຢາກໄປທ່ອງທ່ຽວ ຫຼືກໍາລັງຊອກຫາບ່ອນຜ່ອນຄາຍໃນວັນພັກຜ່ອນ ກໍສາມາດລອງໄປທ່ຽວຊົມ “ຜາທໍ່ໜໍ່ຄໍາ” ໄດ້ ເຊື່ອວ່າຈະຕ້ອງຕື່ນຕາຕື່ນໃຈຢ່າງແນ່ນອນ.


ທີ່ມາ:

  • ຮູບພາບ

  • ແທັກທີ່ກ່ຽວຂ້ອງ