• ເລັ່ງພັດທະນາຂຸນກອງແລງ ໃຫ້ທັນປີໃໝ່ລາວ

ໂດຍ: Admin Mahason 30 ມັງກອນ 2020 (14.24 ນ.) Read : 445

     ໂຄງການພັດທະນາແຫຼ່ງທ່ອງທ່ຽວຂຸນກອງແລງ ແມ່ນໜຶ່ງໃນໂຄງການທີ່ທາງບໍລິສັດ ອິນທຣາ ໂຄໂປເຣຊັ່ນ ຈໍາກັດຜູ້ດຽວ ໄດ້ຮັບອະນຸມັດໃນການສໍາປະທານ ເພື່ອພັດທະນາແຫຼ່ງທ່ອງທ່ຽວ ແລະພັດທະນາກະສິກໍາແບບອະນຸຮັກທໍາມະຊາດ, ຍືນຍົງ ແລະສີຂຽວ ໂດຍການມີສ່ວນຮ່ວມກັບປະຊາຊົນບັນດາເຜົ່າ (The Green World @ Khammouane). ຂຸນກອງແລງເປັນສະຖານທີ່ທ່ອງທ່ຽວທາງທໍາມະຊາດ ສະຖານທີ່ຕັ້ງຢູ່ບ້ານ ນາຄ ເມືອງ ຫີນບູນ ແຂວງ ຄໍາມ່ວນ ເດີນທາງຕາມເລກທີ 13 ໃຕ້ ຫ່າງຈາກຕົວເມືອງຫີນບູນ ປະມານ 20 ກິໂລແມັດ.
     ທ່ານ ພັນທະຈິດ ອິນທິລາດ ປະທານບໍລິສັດ ອິນທຣາໂຄໂປເຣຊັ່ນ ຈໍາກັດຜູ້ດຽວ ໄດ້ກ່າວວ່າ: ພາຍຫຼັງທີ່ໄດ້ເຊັນສັນຍາສໍາປະທານໃນທ້າຍເດືອນ ມີນາ 2019 ຜ່ານມາກັບແຂວງ ຄໍາມ່ວນ ເພື່ອດໍາເນີນການກໍ່ສ້າງ ແລະປັບປຸງແຫຼ່ງທ່ອງທ່ຽວຂຸນກອງແລງ ມາຮອດປັດຈຸບັນແມ່ນສໍາເລັດໄປແລ້ວ 50%.
     ໂຄງການດັ່ງກ່າວແມ່ນ ເປັນໂຄງການອະນຸຮັກໂດຍປະຊາຊົນມີສ່ວນຮ່ວມ ເຊິ່ງມີເນື້ອທີ່ປະມານ 30 ເຮັກຕາ, ໃນນີ້ໄດ້ເວັ້ນຄືນແລ້ວ 10 ເຮັກຕາ ທີ່ເຫຼືອແມ່ນພວມດໍາເນີນການເວັ້ນຄືນ ໂດຍເລັງໃສ່ໜ້າວຽກໃນຈໍານວນພື້ນທີ່ 10 ເຮັກຕາ ທີ່ໄດ້ຮັບສໍາປະທານແລ້ວເຖິງປັດຈຸບັນແມ່ນສໍາເລັດ 50%. 
     ບໍ່ວ່າຈະເປັນວຽກປັບປຸງທັດສະນີຍະພາບຕ່າງໆອ້ອມຂຸນ, ການສ້າງຝາຍ, ສ້າງນໍ້າຕົກ, ປ້ອງກັນຕະຝັ່ງເຈື່ອນຕາມສາຍນໍ້າ, ວຽກຂຸດສະນໍ້າ ເພື່ອທີ່ຈະເຮັດເປັນສວນນໍ້າ ອໍານວຍຄວາມສະດວກໃຫ້ແກ່ນັກທ່ອງທ່ຽວທີ່ຈະມາທ່ຽວຫຼິ້ນ ເພາະວ່າໃນຂຸນຈະບໍ່ໃຫ້ຄົນລົງຫຼິ້ນນອກຈາກຜູ້ຊ່ຽວຊານ ຫຼືນັກວິທະຍາສາດທີ່ຈະເຂົ້າມາສໍາຫຼວດ.
     ສໍາລັບເຮືອນພັກທີ່ກະກຽມໄວ້ໃຫ້ແຂກມາພັກເຊົາແມ່ນສໍາເລັດແລ້ວ ຈໍານວນ 50 ກວ່າຫຼັງ; ໃນນີ້ ມີເຮືອນໄມ້ຊົງລາວ ຈໍານວນ 25 ຫຼັງ, ເຮືອນແຄັບຊູນແບບທັນສະໄໝ ຈໍານວນ 26 ຫຼັງ ແລະຄັບເຮົ້າອີກ 5 ຫຼັງ. ສ່ວນຄັບເຮົ້າແມ່ນຈະບໍລິການແຂກພາຍໃນ ແລະຕ່າງປະເທດ ທີ່ມາທ່ຽວໃນໄລຍະເວລາທີ່ສັ້ນ ພ້ອມທັງມີກິດຈະກໍາຕ່າງໆໄວ້ຄອຍບໍລິການ. ກິດຈະກໍາທີ່ຈະກະກຽມໄວ້ຄອຍບໍລິການໃຫ້ແກ່ນັກທ່ອງທ່ຽວໃນເຂດພັດທະນາມີທັງໝົດ 30 ລາຍການ ເຊິ່ງສ່ວນຫຼາຍແມ່ນກິດຈະກໍາຮູບແບບພະຈົນໄພໃນທໍາມະຊາດ ເຊັ່ນ: ສໍາຫຼວດທ່ຽວຊົມ, ຍ່າງປ່າ, ປີນພູ, ປັ່ນລົດຖີບເສືອພູເຂົາ, ອ໋ອບໂຣດ (ຂັບລົດວິບາກ), ກິດຈະກໍາທາງນໍ້າ ແລະອື່ນໆ.
     ສ່ວນວຽກທີ່ສໍາຄັນໃນການສ້າງຕຶກອາຄານໄວ້ບໍລິການ ແລະປັບປຸງການປູກປ່າຄືນໃໝ່ ພວກເຮົາໄດ້ມີການເຄື່ອນຍ້າຍຕົ້ນໄມ້ມາປູກປະມານ 200 ກວ່າຕົ້ນ ເພື່ອຢາກໃຫ້ພື້ນທີ່ດັ່ງກ່າວເປັນພື້ນທີ່ສີຂຽວ ໃຫ້ສົມກັບຄໍາວ່າ: “Green World” ເພາະການພັດທະນາແມ່ນແນໃສ່ທ່າແຮງບົ່ມຊ້ອນ ໂດຍຈະບໍ່ແຂ່ງກັບໃຜ ເພາະຈະປັບປຸງໃຫ້ດີທີ່ສຸດເທົ່າທີ່ຈະເຮັດໄດ້ ແລະຕາມຈຸດປະສົງຂອງພວກເຮົາ ຄາດວ່າຈະໃຫ້ທັນເປີດການນໍາໃຊ້ໃນປີໃໝ່ລາວ 2020.


ທີ່ມາ: Soupsip Update

  • ຮູບພາບ

  • ແທັກທີ່ກ່ຽວຂ້ອງ