• “ຕາດຄາ” ນໍ້າຕົກຕາດທີ່ສູງທີ່ສຸດໃນແຂວງ ຊຽງຂວາງ

ໂດຍ: Admin Mahason 18 ພຶດສະພາ 2020 (14.10 ນ.) Read : 448

ເປັນແຫຼ່ງທ່ອງທ່ຽວທາງທໍາມະຊາດທີ່ມີຄວາມສວຍງາມ ແລະສູງທີ່ສຸດຂອງແຂວງ ຊຽງຂວາງ ຕັ້ງຢູ່ບ້ານ ຄັງພະນຽນ ເມືອງ ໜອງແຮດ ຫ່າງຈາກເທດສະບານເມືອງ ແປກ ປະມານ 104 ກິໂລແມັດ ຕາມເສັ້ນທາງເລກ 7 ແລະຫ່າງຈາກເສັ້ນທາງດັ່ງກ່າວ ເຂົ້າສູ່ແຫຼ່ງທ່ອງທ່ຽວ ປະມານ 5 ກິໂລແມັດ ເປັນທາງທີ່ປູດ້ວຍຫີນ.

ຕາດຄາເປັນຕາດທີ່ມີຄວາມສວຍສົດງົດງາມເປັນຢ່າງຍິ່ງ, ມີນໍ້າຂາວໃສສະອາດໄຫຼອອກມາຈາກຮ່ອມຜາລົງມາໂຕນໃສ່ຕາດທີ່ເປັນຫຼາຍຂັ້ນກະແຈກກະຈາຍ, ມີຄວາມສູງ ປະມານ 141 ແມັດ ເຊິ່ງເປັນ 3 ຕາດ ໂດຍຈຸດຕົ້ນນໍ້າຫາຈຸດພັກທີ 3 ມີຄວາມສູງປະມານ 81 ແມັດ ແລະຕາດທີ 3 ລົງຮອດຕີນຕາດມີຄວາມສູງ 60 ແມັດ, ກວ້າງ ປະມານ 40-50 ແມັດ ແລະມີຂັ້ນໄດຍ່າງຕໍ່ກັນເປັນຂັ້ນໆເພື່ອເຊື່ອມຕໍ່ຕາດແຕ່ລະຂັ້ນເຂົ້າຫາກັນຢ່າງງາມຕາ.

ຕາມການເລົ່າຂານກັນມາໃນສະໄໝກ່ອນ ຕາດແຫ່ງນີ້ເປັນຕາດຫວງຫ້າມສໍາລັບຜູ້ຍິງ ແລະຫ້າມຈູງສັດທຸກຊະນິດຂ້າມມາຕາດແຫ່ງນີ້ເດັດຂາດ ເພາະຖ້າຫາກຜູ້ຍິງຄົນໃດໄດ້ມາຂ້າມແມ່ນໍ້າແຫ່ງນີ້ແລ້ວ ກໍຈະບໍ່ສາມາດມີລູກ ຫຼືອາດຈະຫຼຸລູກນັ້ນເອງ. ນອກນັ້ນ, ຖ້າຫາກໃຜຈູງສັດເຂົ້າມາ ໂດຍສະເພາະແມ່ນໝາ ແລະແບ້ ຂ້າມນໍ້າແຫ່ງນີ້ແມ່ນຈະກໍ່ໃຫ້ເກີດໄພພິບັດ ເພາະຜິດກັບພະຍານາກ. ດ້ວຍເຫດນີ້ ຈຶ່ງໄດ້ໃສ່ຊື່ວ່າ ຕາດຄາເພາະຜູ້ຍິງ ແລະສັດບາງຊະນິດບໍ່ສາມາດຂ້າມໄດ້ ແລະຕ້ອງຄາຢູ່ສະຖານທີ່ແຫ່ງນີ້ນັ້ນເອງ.

ບໍລິເວນອ້ອມຂ້າງຕາດຄາ ມີທໍາມະຊາດທີ່ອຸດົມສົມບູນ, ມີປ່າໄມ້ທີ່ຂຽວກະຈີງົດງາມຍິ່ງ, ປະກອບດ້ວຍຕົ້ນໄມ້ນ້ອຍ-ໃຫຍ່ ລວມທັງຊີວະນານາພັນອາໄສຢູ່ ແລະໄດ້ເລີ່ມເປີດໃຫ້ບໍລິການເປັນແຫຼ່ງທ່ອງທ່ຽວ ຕັ້ງແຕ່ປີ 2005 ເປັນຕົ້ນມາ. ການເຂົ້າຫາແຫຼ່ງທ່ອງທ່ຽວແຫ່ງນີ້ ນັກທ່ອງທ່ຽວຈະຕ້ອງໄດ້ຊື້ປີ້ ລາຄາສໍາລັບຄົນລາວ ແມ່ນ 5,000 ກີບ ແລະຄົນຕ່າງປະເທດ ແມ່ນ 10,000 ກີບ.

ເມື່ອມາທ່ອງທ່ຽວ ຕາດຄາແຫ່ງນີ້ ນັກທ່ອງທ່ຽວຈະໄດ້ສໍາຜັດກັບນໍ້າທີ່ໃສສະອາດ, ອາກາດທີ່ເຢັນສົດຊື່ນ, ເພີດເພີນກັບບັນຍາກາດທີ່ຜ່ອນຄາຍ, ໄດ້ສໍາຜັດທ່ຽວຊົມຄວາມສວຍງາມທີ່ແຕກຕ່າງກັນຂອງຕາດຄາ ທັງ 3 ຈຸດ ໂດຍການຄ່ອຍໆຍ່າງຂຶ້ນຕາມເສັ້ນທາງຂ້າງຕາດ ຫຼືຂຶ້ນມາຕາມຕາດເລີຍ ເພື່ອສໍາຜັດກັບສາຍນໍ້າເຢັນສົດຊື່ນ ເມື່ອນໍ້າຕົກຟົ້ງໃສ່ ພ້ອມທັງສາມາດເຂົ້າຫຼິ້ນນໍ້າເຂົ້າໄປໃນກ້ອງຕາດທີ່ມີນໍ້າໄຫຼຜ່ານຢ່າງໜ້າຕື່ນຕາຕື່ນໃຈ ເໝາະສໍາລັບຜູ້ທີ່ມັກການທ່ອງທ່ຽວໃນຮູບບແບບພະຈົນໄພ.

ຕາດຄາ ແຫ່ງນີ້ມີນັກທ່ອງທ່ຽວທັງພາຍໃນ ແລະຕ່າງປະເທດໃຫ້ຄວາມສົນໃຈຫຼາຍ ໂດຍສະເພາະແມ່ນການທ່ອງທ່ຽວເພື່ອສຶກສາຮຽນຮູ້, ຄົ້ນຄວ້າຊີວະນານາພັນຢູ່ບໍລິເວນຕາດ ແລະເພື່ອການພັກຜ່ອນຢ່ອນໃຈ. ສໍາລັບລະດູການທີ່ນັກທ່ອງທ່ຽວມາທ່ອງທ່ຽວຫຼາຍທີ່ສຸດແມ່ນໃນລະຫວ່າງເດືອນ ມີນາ ຫາ ພຶດສະພາ ຫຼືໃນຍາມປີໃໝ່ສົງການທີ່ຈະມາເຖິງນີ້ ເນື່ອງຈາກມີອາກາດທີ່ຮ້ອນອົບເອົ້າຫຼາຍ ຈຶ່ງເໝາະແກ່ການຫຼິ້ນນໍ້າເຢັນໆ. ນອກນັ້ນ, ໃນຍາມລະດູຝົນຕາດຄາແຫ່ງນີ້ຍັງຄົງຄວາມງົດງາມຄືເກົ່າ ແລະເໝາະສໍາລັບຜູ້ທີ່ມັກທ່ອງທ່ຽວແບບພະຈົນໄພສຶກສາຄົ້ນຄວ້າທາງທໍາມະຊາດ.


ທີ່ມາ: ຂໍ້ມູນ ແລະຮູບພາບ: Muan.la

  • ຮູບພາບ

  • ແທັກທີ່ກ່ຽວຂ້ອງ