• ຍົມມະລາດ ເມືອງແຫ່ງຜູພາ ທົ່ງນາຂຽວງາມໜ້າທ່ອງທ່ຽວ

ໂດຍ: Admin Mahason 02 ກໍລະກົດ 2020 (09.40 ນ.) Read : 464

     ຍົມມະລາດ ເມືອງແຫ່ງຜູພາ ທົ່ງນາຂຽວງາມໜ້າທ່ອງທ່ຽວ ດິນແດນແຂວງ ຄໍາມ່ວນ ໃນປະເທດລາວ ມີຄວາມຫຼາກຫຼາຍທາງດ້ານພູມສັນຖານ ແລະມີສະຖານທີ່ທ່ອງທ່ຽວທີ່ສວຍງາມ ທີ່ຂຶ້ນຊື່ລືຊາຂອງປະເທດຫຼາຍແຫ່ງ ບໍ່ວ່າຈະເປັນຖໍ້ານໍ້າລອດເຊບັ້ງໄຟ, ຖໍ້າກອງລໍ, ພະທາດສີໂຄດຕະບອງ, ຈຸດຊົມວິວພູຜາມ່ານ, ຕົວເມືອງທ່ານແຂກ, ທ່າຝຣັ່ງ, ທ່າລັງ ແລະສະຖານທີ່ອື່ນໆອີກຢ່າງຫຼວງຫຼາຍ. 
     ແຂວງ ຄໍາມ່ວນ ປະກອບມີ 12 ເມືອງ ຄື: ເມືອງ ທ່າແຂກ, ມະຫາໄຊ, ໜອງບົກ, ຫີນບູນ, ຍົມມະລາດ, ບົວລະພາ, ນາກາຍ, ເຊບັ້ງໄຟ, ໄຊບົວທອງ ແລະເມືອງ ຄູນຄໍາ ເຊິ່ງໃນສະບັບນີ້ເຮົາຈະພາມາຮູ້ຈັກກັບເມືອງ ຍົມມະລາດ. ເມືອງ ຍົມມະລາດ ເປັນເມືອງໜຶ່ງຂອງແຂວງ ຄໍາມ່ວນ ຕັ້ງຢູ່ລຽບຕາມເສັ້ນທາງເລກທີ 12, ຫ່າງຈາກເທດສະບານເມືອງ ທ່າແຂກ ປະມານ 56 ກິໂລແມັດ ແລະມີອານາເຂດຕິດກັບ 5 ເມືອງ ຄື: ທິດເໜືອຕິດກັບເມືອງ ນາກາຍ, ຕິດໃຕ້ຕິດກັບເມືອງມະຫາໄຊ, ທິດຕາເວັນອອກຕິດກັບເມືອງ ບົວລະພາ, ທິດຕາເວັນຕົກຕິດກັບເມືອງ ທ່າແຂກ ແລະທິດຕາເວັນຕົກສ່ຽງເໜືອຕິດກັບເມືອງ ຫີນບູນ. ຄໍາຂັວນຂອງເມືອງ: “ງາມທໍາມະຊາດຖໍ້າທໍລະພີ ຕໍ່າສິ້ນໝີ່ເມືອງສ້າງແຄນກອງຂຸ່ຍຊໍ ມະຫາໄຊລໍາພື້ນບ້ານ ລົດອາຫານແກງໄກ່ໃສ່ສານ ຫຼາມອ່ຽນໃສ່ບັ້ງໄມ້ໄຜ່ ໃຈຊາວເມືອງຍາວກວ່າສາຍນໍ້າຍົມ” 
     ເມືອງ ຍົມມະລາດ ມີສະຖານທີ່ທ່ອງທ່ຽວຫຼາຍແຫ່ງ ເຊັ່ນ: ຖໍ້າໄຂ່ມຸກ, ຖໍ້າລົມເຢັນ, ຖໍ້ານໍ້າລອດ, ຕາມສອງຊູ້, ຈຸດຊົມວິວຜາກະຕ່າຍ, ພະອົງຕື້... ດ້ວຍຄວາມງົດງາມຂອງພູຜາປ່າໄມ້ ແລະທົ່ງນາ ເຮັດໃຫ້ເມືອງແຫ່ງນີ້ ມີຄວາມງົດງາມ ແລະດຶງດູດສາຍຕາແກ່ຜູ້ທີ່ມາພົບເຫັນ. ຖ້າຫາກມາທ່ອງທ່ຽວເມືອງ ຍົມມະລາດ ແລ້ວຢາກສໍາຜັດກັບບັນຍາກາດຍາມເຊົ້າ ແລະຍາມແລງທີ່ເມືອງ ຍົມມະລາດ ຫຼືເລາະທ່ຽວໃຫ້ອີ່ມໃຈແລ້ວ ກໍມີຫຼາຍສະຖານທີ່ພັກຫຼາຍແຫ່ງໄວ້ໃຫ້ເລືອກໃຊ້ບໍລິການ ບໍ່ວ່າຈະເປັນທັງເຮືອນພັກ ແລະຣີສອດ ເຊິ່ງລ້ວນແຕ່ເປັນສະຖານທີ່ພັກທີ່ລາຄາບໍ່ແພງ, ສະອາດ ແລະບັນຍາກາດດີ ພ້ອມທັງມີຮ້ານອາຫານຫຼາຍຮ້ານໄວ້ໃຫ້ເຮົາໄດ້ເລືອກຊິມ. 
     ຖ້າຫາກໃຜຢາກມາທ່ອງທ່ຽວແນະນໍາໃຫ້ໄປໃນຍາມຕົ້ນລະດູຝົນ ກໍຄືຊ່ວງນີ້ນັ້ນເອງ ເພາະເປັນຊ່ວງທີ່ຊາວນາກໍາລັງທໍາການດໍານາປີ ຈົນເຖິງເດືອນ ກໍລະກົດ. ນອກນັ້ນ, ກໍແມ່ນໄລຍະທີ່ເຂົ້າກໍາລັງສຸກເຫຼືອງຈົນເຖິງການເກັບກ່ຽວປະມານຕົ້ນເດືອນກັນຍາ ເຖິງເດືອນ ພະຈິກ ເພາະຈະໄດ້ເຫັນວິຖີຊີວິດກັບຄວາມງົດງາມຂອງທົ່ງນາປະສານກົມກືນກັບພູຜາປ່າໄມ້. ສ່ວນລະດູອື່ນກໍສາມາດໄປພັກຜ່ອນໄດ້ຕາມກາລະໂອກາດທີ່ທ່ານສະດວກ. 
     ສໍາລັບທ່ານໃດທີ່ມັກດື່ມກາເຟ ຢູ່ທີ່ເມືອງ ຍົມມະລາດ ກໍມີຮ້ານກາເຟໄວ້ໃຫ້ເຮົາໄດ້ທົດລອງຊິມ ເພື່ອຕື່ມພະລັງ ສ້າງຄວາມສົດຊື່ນໃນຍາມເຊົ້າ ເຊິ່ງບໍ່ໄກຈາກສະຖານທີ່ພັກພໍປານໃດ ຂ້າມຂົວນໍ້າເທີນມາ ຮ້ານກາເຟ ຈະຕັ້ງຢູ່ຈຸດສາມາແຍກ ເສັ້ນທາງເລກທີ 12 ກັບເສັ້ນທາງ 1E ດ້ານຊ້າຍມື ຕາມເສັ້ນທາງ 1E ໄປສູ່ງເມືອງ ນາກາຍ.

ທີ່ມາ: ຂໍ້ມູນ ແລະຮູບພາບ: ຄົນມັກທ່ຽວ (Life is Journey)

  • ຮູບພາບ

  • ແທັກທີ່ກ່ຽວຂ້ອງ