• ໄປທ່ຽວ ທ່າຝຣັ່ງວັງສີຄາມ ງາມສົມຄຳລືຊາ

ໂດຍ: Admin Mahason 18 ເມສາ 2019 (17.03 ນ.) Read : 2,584

     ຖ້າທ່ານເບື່ອໜ່າຍຄວາມວຸ່ນວາຍ ແລະແອອັດໃນເມືອງໃຫຍ່ຜູ້ຂຽນຂໍເຊີນຊວນທ່ານໄປລ່ອງເຮືອ, ລອຍນ້ຳ ແລະຊົມທຳມະຊາດໃຫ້ສະບາຍໃຈຢູ່ທີ່ ທ່າຝຣັ່ງ.
     “ທ່າຝຣັ່ງ” ເປັນສະຖານທີ່ທ່ອງທ່ຽວແບບອະນຸລັກຕັ້ງຢູ່ ບ້ານທອກ, ເມືອງທ່າແຂກ, ແຂວງຄຳມ່ວນ, ຫ່າງຈາກເທດສະບານແຂວງ ຄຳມ່ວນ ພຽງ 10 ກິໂລແມັດຕາມເສັ້ນທາງເລກທີ່ 12A. ເຊິ່ງໄດ້ເປີດໃຫ້ບໍລິການເຂົ້າທ່ຽວຊົມໃນທ້າຍປີ 2018, ຍ້ອນເປັນສາຍນ້ຳທີ່ໄຫຼຜ່ານຮ່ອມພູຫີນປູນທີ່ໃຫຍ່ທີ່ສຸດໃນ   ສປປ ລາວ ໄດ້ແກ່: “ຂຸນໂດນ” ຈຶ່ງເຮັດໃຫ້ນໍ້າມີຄວາມເຢັນ ແລະມີສີຟ້າເປັນສາຍນ້ຳທີ່ຍາວ 20 ກວ່າກິໂລແມັດ ພ້ອມທັງມີຜາຫີນຕັ້ງຄູ່ຂະໜານກັນທັງສອງຟາກຝັ່ງຕັ້ງແຕ່ຈຸດຕົ້ນນ້ຳຈົນສຸດສາຍ, ເຊິ່ງຖືວ່າເປັນມົນສະເໜ່ພິເສດ, ເຮັດໃຫ້ ທ່າຝຣັ່ງ ແຫ່ງນີ້ສາມາດດຶງດູດຄວາມສົນໃຈນັກທ່ອງທ່ຽວທັງພາຍໃນ ແລະຕ່າງປະເທດເຂົ້າມາທ່ຽວຊົມແບບບໍ່ຂາດສາຍ. ພ້ອມດຽວກັນນີ້ ນັກທ່ອງທ່ຽວກໍສາມາດເລືອກກິດຈະກຳໄດ້ຫຼາຍຢ່າງ ບໍ່ວ່າຈະເປັນ: ການລ່ອງເຮືອກາຍັກຊົມຄວາມງາມຂອງທຳມະຊາດສາຍນ້ຳສອງຟາກຝັ່ງ, ຂີ່ກົງເບັງ, ລອຍນໍ້າ, ຍ່າງຊົມທໍາມະຊາດ ແລະກິນເຂົ້າປ່າ. ນອກຈາກນີ້ ຍັງມີຕູບໃຫ້ນັກທ່ອງທ່ຽວໄດ້ນັ່ງພັກຜ່ອນ, ມີບໍລິການອາຫານ ແລະເຄື່ອງດື່ມຕ່າງໆ. ໂດຍສະເພາະໃນໄວໆນີ້ກໍຈະມີກິດຈະກຳຂີ່ສະລິງ ແລະມີບັງກາໂລເພື່ອໃຫ້ນັກທ່ອງທ່ຽວໄດ້ພັກຜ່ອນແບບຂ້າມຄືນ ທັງເປັນການອຳນວຍຄວາມສະດວກໃຫ້ຫຼາຍຂຶ້ນຕື່ມອີກ ເຊິ່ງຄາດວ່າຈະສຳເລັດໃນ ເດືອນເມສານີ້.
     ພິເສດ, ການເຂົ້າຊົມນັກທ່ອງທ່ຽວຈະບໍ່ໄດ້ເສຍຄ່າຜ່ານປະຕູ ແລະຈະມີພຽງການເກັບຄ່າບໍລິການກິດຈະກຳເທົ່ານັ້ນ ເຊັ່ນ: ລ່ອງເຮືອກາຍັກ 60,000 ກີບ/ຄົນ, ຂີ່ກົງເບັງແມ່ນ 20,000 ກີບ/ຄົນ.



ທີ່ມາ: ເສດຖະກິດ-ການຄ້າ

  • ຮູບພາບ

  • ແທັກທີ່ກ່ຽວຂ້ອງ