• ທ່ຽວຫາດດອນກາງ ຫຼິ້ນນໍ້າໃນຍາມຮ້ອນ

ໂດຍ: Admin Mahason 23 ເມສາ 2019 (09.41 ນ.) Read : 1,643

     ສະຖານທີ່ທ່ອງທ່ຽວທີ່ເໝາະແກ່ການພາຄອບຄົວໄປພັກຜ່ອນ ເພື່ອຜ່ອນຄາຍໃນຍາມຮ້ອນໆແບບນີ້ ແລະສະຖານທີ່ທ່ອງທ່ຽວຍອດນິຍົມ ກໍໜີບໍ່ພົ້ນການຫລິ້ນນໍ້າ, ລ່ອງແພ, ລ່ອງເຮືອ ແລະແກ້ງຕາດຕ່າງໆ ເຊິ່ງມີຢ່າງຫລວງຫລາຍຢູ່ປະເທດເຮົາ. ແຕ່ສະບັບນີ້ ພວກເຮົາຂໍແນະນຳແຫລ່ງທ່ອງທ່ຽວໃໝ່ ທີ່ພວມໄດ້ຮັບຄວາມນິຍົມຈາກປະຊາຊົນຊາວ ແຂວງ ວຽງຈັນ ກໍຄືບັນດາແຂວງໃກ້ຄຽງນັ້ນກໍຄື: “ຫາດດອນກາງ” ເມືອງເຟືອງ ແຂວງ ວຽງຈັນ ເຊິ່ງມີທຳມະຊາດທີ່ສວຍສົດງົດງາມ ແລະນໍ້າໃສໄຫຼເຢັນເໝາະແກ່ການເຮັດກິດຈະກຳຕ່າງໆທາງນໍ້າຄາຍຄວາມຮ້ອນໄດ້ເປັນຢ່າງດີ.
     ແຫຼ່ງທ່ອງທ່ຽວຫາດດອນກາງ ແມ່ນຫາດຊາຍຕາມສາຍນໍ້າລີກ ທີ່ຕັ້ງຢູ່ຫ່າງຈາກເທດສະບານ ເມືອງປະມານ 3 ກິໂລແມັດ ແລະຫ່າງຈາກນະຄອນຫລວງວຽງຈັນ ປະມານ 122 ກິໂລແມັດໄປຕາມ ເສັ້ນທາງເລກ 13 ເໜືອ ແລ້ວລ້ຽວຊ້າຍເຂົ້າທາງແຍກເມືອງ ຫີນເຫີບ ດ້ວຍຫົນທາງທີ່ສະດວກສະບາຍ ຈົນເຖິງສະຖານທີ່ທ່ອງທ່ຽວ. ໃນເມື່ອກ່ອນ ຫາດດອນກາງ ຍັງບໍ່ມີຄວາມຟົດຟື້ນແຕ່ພາຍຫຼັງໄດ້ເລີ່ມພັດທະນາ ແລະເປີດໃຫ້ບໍລິການ ໃນປີ 2018 ທີ່ຜ່ານມາກໍໄດ້ຮັບຄວາມສົນໃຈຈາກມວນຊົນເປັນຈໍານວນຫຼາຍ ເພາະວ່າເປັນການພັດທະນາແບບມີສ່ວນຮ່ວມ ແລະຍັງຮັກສາຄວາມສົມບູນທາງທຳມະຊາດໄວ້.
     ໃນປີຜ່ານມາມີນັກທ່ອງທ່ຽວເຂົ້າໄປທ່ຽວຊົມ, ຮ່ວມເຮັດກິດຈະກຳຕ່າງໆເກືອບ 5.000 ຄົນ, ສ່ວນໃຫຍ່ແມ່ນນັກທ່ອງທ່ຽວມາຈາກນະຄອນຫຼວງວຽງຈັນ ກວມເອົາປະມານ 40%. ໃນປີ 2019 ນີ້ ຄາດວ່າຈະມີນັກທ່ອງທ່ຽວຈະເພີ່ມຂຶ້ນຫຼາຍກວ່າເກົ່າ ເພາະມີການໂຄສະນາຜ່ານທາງສື່ໂທລະພາບ, ວິທະຍຸ ແລະສື່ອອນລາຍຕ່າງໆ ບວກກັບການເພີ່ມກິດຈະກຳສົ່ງເສີມການທ່ອງທ່ຽວຫຼາຍຂຶ້ນ.




ທີ່ມາ: ຂອບໃຈຮູບພາບຈາກ: Layou Photographer

  • ຮູບພາບ

  • ແທັກທີ່ກ່ຽວຂ້ອງ