• ໜີຄວາມວຸ້ນວາຍ ໄປຜ່ອນຄາຍທີ່ຕາດວັງຟອງ

ໂດຍ: Admin Mahason 29 ພຶດສະພາ 2019 (10.57 ນ.) Read : 906

     ຕາດວັງຟອງ ເປັນແຫຼ່ງທ່ອງທ່ຽວທາງດ້ານທໍາມະຊາດອີກແຫ່ງໜຶ່ງທີ່ກໍາລັງໄດ້ຮັບຄວາມນິຍົມ ແລະເປັນອີກສະຖານທີ່ທ່ອງທ່ຽວໜຶ່ງທີ່ມີຊື່ສຽງຂອງເມືອງ ປາກກະດິງ ແຂວງ ບໍລິຄໍາໄຊ ທີ່ສາມາດດຶງດູດນັກທ່ອງທ່ຽວທັງພາຍໃນ, ຕ່າງແຂວງ ແລະຕ່າງປະເທດໄດ້ເປັນຢ່າງດີ.
     ນໍ້າຕົກຕາດແຫ່ງນີ້ ແມ່ນໜຶ່ງໃນໃນຕາດທີ່ຢູ່ສາຍນໍ້າກະດິງ ເຊິ່ງເປັນສາຂາຂອງແມ່ນໍ້າຂອງ ສະຖານທີ່ທ່ອງທ່ຽວດັ່ງກ່າວຈະເດີນທາງໄປທາງນໍ້າ ດ້ວຍການໃຊ້ເຮືອຈັກ ຈາກບ້ານ ໂພນງາມ ໃຊ້ເວລາປະມານ 1 ຊົ່ວໂມງ (ຂັບເຮືອຕາມປົກກະຕິ ແບບໄດ້ຊົມວິວທິວທັດທໍາມະຊາດໄປພ້ອມ) ກໍຈະເຖິງຕາດວັງຟອງ.
     ຄວາມໂດດເດັ່ນຂອງນໍ້າຕົກຕາກແຫ່ງນີ້ແມ່ນ ເປັນນໍ້າຕົກຕາດທີ່ສູງຊັນ ແລະຍາວໄປຕາມລໍານໍ້າ, ສາຍນໍ້າໃສເປັນສີຂຽວມໍລະກົດ ໄຫຼຢູ່ເທິງພະລານຫີນທີ່ຢັ່ງຢາຍໄປທົ່ວບໍລິເວນຕາດ ເນື່ອງຈາກການໄຫຼເຊາະຂອງສາຍນໍ້າມາເປັນເວລາດົນນານ ຈຶ່ງເຮັດໃຫ້ສະຖານທີ່ແຫ່ງນີ້ສວຍງາມໂດຍທີ່ບໍ່ຕ້ອງຕົບແຕ່ງ, ບໍລິເວນຕາດຖືກອ້ອມຮອບໄປດ້ວຍປ່າທໍາມະຊາດທີ່ສວຍສົດງົດງາມ, ຕົ້ນໄມ້ໃຫຍ່ຂຽວອຸ່ມທຸ່ມທັງສອງຟາກຝັ່ງ ແລະພືດພັນນາໆຊະນິດ.
     ສໍາລັບໃຜທີ່ຢາກທົດລອງໄປສໍາຜັດກັບບັນຍາກາດຊົມວິວທໍາມະຊາດ, ອາກາດອັນບໍລິສຸດ, ໜີບັນຫາຝຸ່ນຄວັນຈາກໃນເມືອງໃຫຍ່ ກໍສາມາດໄປໄດ້ ໄລຍະທາງຫ່າງຈາກນະຄອນຫຼວງວຽງຈັນ ພຽງແຕ່ 200 ກວ່າກິໂລແມັດເທົ່ານັ້ນ ແລະຫ່າງຈາກຕົວເມືອງ ປາກຊັນ ແຂວງ ບໍລິຄໍາໄຊ ປະມານ 65 ກິໂລແມັດກໍຈະເຖິງເມືອງ ປາກກະດິງ.


ທີ່ມາ:

  • ຮູບພາບ

  • ແທັກທີ່ກ່ຽວຂ້ອງ